Sam komuniti lo Ostrelia mo sam nara kantri stap wari from wan media rilis blong Pauline Hanson’s One Nation we i bin koko olbaot onlaen.
Rilis ia i bin kamaot lo namba 11 blo Febreri, mo i bin eksplenem tingting blo olgeta lo saed blo imikreson polisi we bae “75,000 ilekal imikrant” i kobak lo fes kantri blem.
Lida blo parti, Senator Pauline Hanson i bin talem se 75,000 pipol we i stap lo Ostrelia “lo wan fasin agensem law”, olsem se oli we i bin stap bitim stret taem blo visa blem, i wok lo wan fasin we i no stret insaed lo law o i bin mekem wan kraim, bae oli nidim ko from Ostrelia mo oli neva save janis blo askem apil lo Australian Review Tribunal.
Hemia rilis we i stap lo website blo One Nation Credit: One Nation Website
From se i stap lo wan pepa wetem coat of arms blong Ostrelia antap lem, rilis ia i bin mekem sam pipol wari mo no andastandem gud ol samting blem lo taem we oli bin sharem lo sosal media.
Lo wan aktiv Ni-Vanuatu Facebook krup, wan postman i bin postem blo talem ol famli we i stap se i kat janis bae oli deportem hem.
“Messagem olgeta blong oli stap kambak before bae operation i tekem ples” hemi bin raetem.
“Sori tumas ol family blo umi blo Vanuatu” wan nara postman i bin sharem.
Sam post i bin konektem polisi ia wetem President Trump's fokas lo imikreson lo United States.
“Trump stap kivim order ia kam lo Australia blo Australia too deportem pipol we oli live illegally lo Aussie...” i wan post we SBS Bislama i bin luk lem.
Nara pipol i bin postem lo sapot blo polisi ia.
SBS Tetum i bin toktok wetem tufala maikran woka blo Timor-Leste, Leo mo Maria*, from hem tu i bin luk rilis ia lo sosal media.
"Mifala i bin wari from se taem yu kam lo Ostrelia i olsem wan janis blo helpem ol famli lo ples blo mifala. Mifala i bin folem stret rod lo saed blo sistem yet, be taem we mifala i bin harem nius ia i bin mekem mifala stap fraet we," oli bin talem.
Carla Chung, blong ACRATH's (Australian Catholic Religious Against Trafficking in Humans) maikran woka sapot i talem se hemi bin luk sam mesaj lo taem we rilis ia i bin kamaot festaem onlaen.
"Mi bin lukse ol woka ia i bin fraet mo harem no gud lo taem we oli bin luk rilis blong Pauline Hanson ia," hemi bin talem.
"Mi bin talem olgeta se hemia i wan tingting blo wan smolsmol parti nomo...yufala no wari lem, bae yu stap fokas lo wok blo yu nomo."
Leo mo Maria i bin wari lo polisi ia sapos tufala bae i kat janis blo oli lo kavman i traem deportem tufala i bin talem SBS Tetum se tufala i nomo fraet afta oli bin luk sam nara post lo Facebook blo eksplenem rilis ia.
"Wan gudfala samting blong sosal media i se mifala i bin andastandem se rilis ia i no ofisal blong kavman," tufala i bin talem.
Wan blo One Nation i bin talem lo SBS Examines se parti ia i "no save eni toktok lo saed blo talem se rilis ia i no isi blo save, mo One Nation i no save eni 'maikran komuniti' we oli bin talem se rilis i mekem se oli 'fraet'."
Rilis ia i bin mekem sam pipol i fraet lem, be hemi "stret fasin" blo One Nation, lo tingting blo klobol maikreson ekspet Associate Professor Anna Boucher.
"Hemia wan kaen polisi blo One Nation we i bin stap long taem finis, blo stretem imikreson"
Hemi tingse rilis ia i moa blo "ol man we i lovem parti ia finis".
A/Prof Boucher i wan senia tija blo Pablik Polisi mo Politikol Saens lo University blo Sydney, mo wan memba blo Ministerial Advaeseri Kaonsil blong Skil Maikreson blong kavman blo Ostrelia.
Hemi bin talem lo SBS Examines se polisi we i stap lo rilis i no kat tumas janis blo kam "stret lo law o save wok".
Hem tu i bin talem se deportem fulap pipol lo wan taem i no isi, mo One Nation i nokat pawa blo "sakemaot raet blo apil long Administrative Review Tribunal".
LISTEN TO
Migrants aren't being hired in the jobs they're qualified for. It's costing Australia billions
SBS English
04/11/202406:15
'Stap leftemap wari ia'
Rilis ia i bin talemaot se fulap maikreson blo kavman blo naoia i bin mekem se oli nokat enaf haos lo kantri, praes blo evri samting i ko antap mo sevis blo pablik i kat tumas pipol we i traem yusum hem.
Lo taem we oli bin askem hem blong kivim data o save we i sapotem konekson blong maikreson, enaf haos blo evriwan mo praes blo evri samting i kam antap, hemi bin kivim wan mo wan .
"Hemia i no wanwan samting nomo blo talemaot wan tru samting ia se sapos moa pipol bae i kam lo Ostrelia i minim se moa pipol bae i yusum servis, haos mo ol nara kaen samting," hemi bin talem.
Be, Emeritus Professor blo Demography lo Crawford School blo Public Policy long Australian National University Peter McDonald i bin talem SBS Examines
"Long taem we pipol blong saed blo toktok fulap lem mo MP i talem se evri malmal samting we i stap lo haos blo evriwan i kamaot from imikreson, oli stap lusum tingting lo saed blo ol nara samting we i nidim stap tu blo helpem hemia," hemi bin talem.
Hemi bin talem se ol maikran i kat smolsmol ifek lo praes blo haos mo sapos yu daonem imikreson, jalenj ia i stap yet.
Associate Professor blo Urban Planning long University blong Queensland Dr Dorina Pojani i talem se yumi kat wan problem nomo, olsem se plesia i nokat enaf haos we i stap.
"Yumi nokat enaf haos blo yumi we i stap finis, mo hemia i no wan samting blo imikreson nomo. Yumi no bildim enaf haos ia," hemi bin talem.
"Klosap long yia 2000 ia, yumi bin daonem namba blong niufala haos mo afta praes blo ol haos ia i kam antap."
A/Prof Boucher i bin talem se tingting blo One Nation blong mekem koneksen blong namba blong haos long kantri wetem imikreson, "sapos i tru o kiaman toktok ia, i stap blong mekem ol vota i wari long hemia".
"Hemia stret samting from wanem oli bin mekem."
LISTEN TO
Is immigration worsening the housing crisis?
SBS English
15/07/202405:09
Afta bae sapot blo ol maikran i olsem wanem?
Pauline Hanson's One Nation hemi wan smolsmol parti nomo, mo i nokat enaf MP blong mekem wan kavman blong olgeta nomo o blong mekem polisi we i stap long law.
Be A/Professor Boucher i bin talem se hemi kat konsen long ifek blong "kaen toktok ia" mo "leftemap wari blo ol pipol" long saed blo mekem se komuniti i save stap strong lo fiuja.
"Hemia i kat janis blong mekem toktok long saed blong maikreson long wan malmal fasin lo Ostrelia. Afta i kat janis blong jenjem tingting blo wan bigfala parti lo saed blong yusum sam samting blong polisi tingting ia," hemi bin talem.
LISTEN TO
Living in limbo
SBS English
07/10/202407:12
* Ol nem ia i no tru nem blo olgeta
