Humarap sa korte ang half-sister ni Pangulong Ferdinand ‘Bongbong’ Marcos Jr. na si Analisa Josefa Corr, 53, at partner nitong si James Alexander Corr, 45, matapos akusahan ng umano’y pag-inom ng alkohol, lasing at nanggulo habang nasa Jetstar flight mula Hobart papuntang Sydney.
Pumayag ang dalawa na hindi iinom o kokonsumo ng alkohol sa mga paliparan sa Australia o eroplano habang nakapyansa. Napagkasunduan din na ibabalik sa kanila ang kanilang mga pasaporte sa ilalim ng ilang kondisyon.
Inakusahan si Analisa ng assault ng isang kapwa pasahero sa labas ng plane toilet matapos na umano’y uminom ang alkohol na bitbit ng dalawa sa flight noong ika-28 ng Disyembre.
Inaresto ang mga ito matapos lumapag ang eroplano sa Sydney at dinala sa pulisya at kinasuhan.
Sa ulat ng BBC, si Analisa Josefa Corr ay anak ng dating Pangulong Ferdinand Marcos Sr sa dating modelo mula Sydney na si Evelin Hegyesi.
