Vawleicung Ziknawh einak Tlawmbik Ram 20 Chungah Australia Cu 13nak Lawng A Si
Australia cu vawleicung ziknawh einak tlawmbik ram 20 thimmi chungah 13nak lawng ah a um tiah hlathlaitu, Transparency International Corruption Perceptions Index nih a langh ter.
Acunglei langhtermi hlathlaitu nih ram 180 cu anmah ram chung I cozah zung le cozah rian cu dothlatnak a tuah.
Tahfung ah an hmanmi cu ram ramkhat nih cozah riantuannak chung ah riantuantu nih mah pumpak miaknak ah hmanmi’ ‘ziknawh einak’, ‘thutnak, ropnak’ ‘uktu nih chungle lawng zawnruahnak ngeih’ tbk ah an ngiathlatmi cu a si.
Tahfung cu mark 0 in 100 tiang pek a si, mark an pekning hrilhfiahnak ah mark ziro (0) cu ziknawh einak a sanbiknak a si I, mark zakhat (100) cu a um lo, a thiang tinak a si.
Tukum ah Australia cu 13nak a si, aluancia kum 2017 ahkhan Australia nih a dihlak fonh ah a hmuhmi mark cu 77 a rak si.
Vawlei cung ah ziknawh einak a tlawmbiknak ram tiah an langhter micu Denmark a si I a dihlak mark ah 88 a si. Denmark hnu ah a hun changtu ram hna cu New Zealand, Finland, Singapore, Sweden le Switzerland hna an si.
United States of America cu mark 4 in a tlak caah, a dihlak fonh in a hmuhmi mark hi 71 a si. Vawleicung ziknawh einak tlawmbik ram 20 thimmi ah aa tel ti lo. Cucu, aluancia kum 2011 thok in a voikhatnak aatel tilo hi a si. Cuve bantuk in ram 16 zong an mark tla ngai hna. Cu mark tlaknak chungah aa telmi ram hna cu Chile, Malta, Hungary le Turkey hna an si.
Aluancia kum ah hlathlainak nih a rak langhter cang bang in ziknawh einak a sanbiknak ram tiah min pekmi hna cu Africa ram chung thiamthiam in a hun si. An ram min hun chim ahcun, Yemen, South Sudan, Somalia le Syria hna an si I, an hmuhmi mi mark hi 10 a si.
