Abiapi Mi
- Pulrai puan lioah upat lei a panh cang mi hna chungin cheuthum chungah cheukhat cu rian in an dinhter hna a silole an riantuan caan an tawiter deuh tiah Brotherhood of St Laurence nih an langhter.
- Rianngeitu chungin cheuthum ah cheuhnih nih kum 50 cung upa cu rian an pek duh ti hna lo i pulrai puan chuah lioah kum khua upat lei a panh cuahmah hna caah ruahchannak a tlawm.
- Rian a kawl liomi chungin kum 45-70 kar hna caah cozah nih rian a thleng duhmi caah bawmhnak a timhtuah.
Rian pek duh lonak hrampi cu phaisa hi a si ko tiah Thinkerbell ngeitu Adam Ferrier nih a chim.
Mi tam deuh cu rian a thiam lo mi pawl hna kha nihlawh niam deuh in rian pek an duh hna.
Australia cozah nih a langhterning ah hin, riantuantu nih a rian ah tei an mak bik lio caan hi a buaktlakin kum 38 velchum a si lio caan hi a si.
Nikum June thla ah khan, kum 51 in kum 65 kar a si mi riantuantu 400,000 tluk dengmang cu COVID-19 nih an rian tuan caan le riantuannak a hnursuan ngai hna tiah Brotherhood of St Laurence nih a langhter.
Cozah nih bawmhnak (government-funded skills Checkpoint program) hmangin kum upat lei a panh cang mi pawl hna cu rian an i thlen khawh nak hnga kan buaipi hna caah kan i manh lo ngai tiin Ron Maxwell nih a chim. Ron Maxwell cu rian a kawl lio mi le rian cawn a duh mi hna a lak tein a bawmtu phu a simi VERTO ah lutlai rian a tuan liomi a si.
Rian cawnnak an rak ngeimi hngalhpinak cu nile caan a liam men dih cang ko lai nain an zungthiamnak le hngalhnak an ngei mi belte cu rianngeitu caah hman rua tha tuk a si rih thiamthiam ko lai
Cozah bawmhnak cu Australia chung ramkulh pathum hna ah tuah a si. Cu hna pathum cu Australian Capital Territory, New South Wales le Victoria hna an si. Papek in riantuantu kum 45 in kum 70 caah tawlrelmi bawmhnak a si.
Kum khua upatnak lawng si loin nunphung i dannak, holh le ca i dannak hna hi kum khua upa hna caah cun dawn khantu ngai a rak si, holh an thiam an i harh cang.
An khua le an ram ah cun cawnnak lei ah thiamsang an si kho ko men, sihmansehlaw hika hmun ah rianngeitu an hmuh sak hna tikah rianngeitu cheukhat nih an rak hngalh piak thiam ti hna lo.
Rian an hmuh khawh nak ding caah ruahnak a cheu hna:
1. Na umnak hmun pawngkam ah rian a lawngmi va kawl.
2. Na nunphung a sunhsakmi rianngeitu hna kha pehtlai hna
3. Australia nih an pom mi ramleng lei rian thiamnak an herh mi rian na kawl ah a tha
4. Rian tam deuh na thiam chin nak dingah rian cawng.
Kum 57 tluk upa si cang mi Raymond Han cu mawtaw remh lei ah thiamnak a ngeimi a si nain pulrai puan lio ah rian hmuh cu a caah a har ngaingei ve. An ram lei ah kir ding a si cang nain ramri khar a si dih cang caah an ram ah kir kho loin a tang.
Vanlawng a zuang dingmi a um ti lo caah thil cu ruahning bantuk in a kal ti lo.
Australia ram cu pulrai ruangah rianngeitu he hmaitonh in bia i ruah khawh a si lo tikah cu nih cun Han a khuaruahnak a hun thlen ngaingai.
Online hmangin zeitindah chawlehthal ning le hruaitu tha sining cawnpiaknak a tuah.
Raymond Han Source: Raymond Han
"Hi thil hi mah cancan a rau lai ti zong ka ruat bal lo. Caan a rauh hnu cu thil dang caah khua ruah ngai a hau".
Kum khua upa cang mi chungin rian a kawl lio mi pawl cu rian dang an i hmuh hlan chung khawnrek a latu rian tuan dingin Maxwell nih a forh hna. Rianngeitu thinlung zong a thlen khawh tiah a chim chap.
Na tuah le tuan cia cang mi rian a si mi ah va luh le tuan cu a fawi deuh, zarhkhat ah ni tlawmte na tuan zongah a bawm chan ngaingai.
Han cu pulrai puan chuah lioah a mah tein cawnnak a kai, rian a cawng i vawlei pi sining a thleng cuahmah mi dawi khawh a zuam.
Kan tuan cia mi tuah lengmang ko buin a phichuak dang i ruahchan cu a si kho lo. A phichuak dang hmuh kan duh ahcun kan tuahmi thil zong kan thlen a hau
Source: Getty Images: Nicolas McComber
Cozah nih tawlrelmi rian cawnnak cu a tanglei ah hin zoh khawh a si: e.
Holhletu bawmh hal na duh ahcun 13 14 50 chawnh khawh an si.
