2025 Ramkomh cozah thar thimnak ah Anthony Albanese le a hruai lio mi ramkhel phu nih teinak an hmuh, thimfung vialte cu Labor nih an hui dih cikcek. Cucaah, term hnihnak Labor ramkhel phu nih cozah an tlaih than lai.
Ka nunchung ah Ram hruaitu Prime Minister rian ka tuan mi hi ka lunghmuih kho tuk tiin Sydney ah a um mi, amah ttanpitu mipi sin ah a chim.
“Ka nunnak cu lawmhnak in a khah lawng siloin, Australia mipi sinah lawmhnak chim ding tuanvo nganpi ka ngei tiah ka ruat, atu bantuk in vawlei cungah ram tha bik pakhat a si mi ram hruai kho dingin caan tha nan ka pek rih caah Australia mipi nan zate cungah lawmhnak chim cawk lo ka ngei,” tiin a chim.
“Nihin ni ah Australia mipi nih Australia nunphung: dinfelnak, khat le khat i dirpinak le a mi kip nih caan tha an hmuhnak lam a sial piaktu ding thimfung nan thlak.”
Labor ramkhel phu cu ramkulh kip ah teinak a hmuh caah phungsernak parliament cu labor hruainak tangah, dodaltu um loin rian hma kalpi a si lai.
Labor dotu ramkhel phu hruaitu Peter Dutton cu amah thutden cia hmanh a veng kho lo, Labor lei a zuamcawhtu nih a chuh diam ai.
Labor lei a zuamcawhtu Ali France nih tuanbia thar a tial, zuamcawhtu ramkhel phu i an hruaitu thuden chuh timi hi a um bal lo mi a si.
Australian Liberal Party leader Peter Dutton, third left, stands with his family as he makes his concession speech following the general election in Brisbane. Source: AP / Pat Hoelscher/AP
“Thimnak lai i kan cawlcanghning, mipi lungthin laknak ding caah rian kan tuan ning hrim kha duhning in a rak tha lo, cucu tuzan ah a phichuak kan zun”, tiin a chim.
“Australia le Australia ram ah khua a sa mi mipi caah a tha bik in rian tuan hi ka duh zungzal mi a si.”
“Labor ramkhel phu nih tuanbia thar an tial, cucu upatnak he kan cohlan.”
Albanese nih an pawlisi tampi mipi sinah a thanhmi chungin thil pakhat ka rak thlir duhmi cu inn khatnak a caw dingmi hna caah 5% inn cawk khawh lam a sial, cu pinah tangka $10 billion dih in inn thar 100,000 sak dingin mipi bia a kamh hna.
Cun, siibawi ton dingin siikhan kan kal tikah liam dingmi tangka a tlawm deuh nak hnga, medicare bawmhnak caah tangka $8.5 billion hman dingin mipi bia a kamh hna.
Pawlisi he pehtlaiin a chim nolh rih mi pakhat cu Solar power hmannak kong a si i, solar power hman a duhmi hna caah bawmnak $2.3 billion hman dingin thimhlamhnak a ngei. Cu lawng hlah, ningcang loin supermarket nih thil man an kaihmi he pehtlaiin tuanvo lak a tim fawn.
