Tlamtling tein raikhamsii na chunhnak hngalhpinak ca na kut cungah a phak khawh nak dingah na tuah a herh mi a um. Hi hngalhpinak ca cu catlap siloin na phone chungah a um dingmi a si i Digital Certificate ti zongin an auh.
Raikhamsii na chunh cangnak cu khoika cazin chungah dah fim le chiah a si?
Australian Immunisation Register timi nih hin raikhamsii kan I chunhnak konglam vialte cu an fimtawl dih I an mah sin ah cun raikhamsii kan I chunh cangnak konglam zoh khawh a si.
Raikhamsii na chunh sin in, na chunhnak konglam cu an cazin chungah a lut, cu dih hnu ah na Medicare account chungah zoh khawh dingin an langhter. Medicare account chung I ‘Immunisation History Statement’ timi ah khan a um. Raikhamsii chunhnak tawlretu phu nih na konglam remh le chap a hau mi pawl cu suimilam 24 chungah raikhamsii na chunhnak kong vialte cu an tawlrel dih.
Immunisation History timi cazin chungah hin COVID-19 raikhamsii na chunhnak konglam lawng si loin, tlangrai zawtnak khamsii na chunhnak konglam zong a um dih.
Kum 14 in a cunglei poah nih raikhamsii an I chunhnak konglam cu pumpak in cazin cu an I ngeih.
Medicare card Source: AAP Image/Mick Tsikas
Raikhamsii na chunhnak konglam cu zoh khawh dingin Ni 10 chungah a um lo a si ahcun, Raikhamsii chunhnak tawlreltu phu kha pehtlai hna. Thil sining kha AIR sin ah theihternak an in tuah piak lai.
Raikhamsii I chunh cangnak hngalhpinak ca (vaccination certificate) cu raikhamsii tlamtling tein a chun cangmi pawl lawng nih an cotin. Raikhamsii voikhat lawng a chun mi pawl belte cu raikhamsii an I chunhnak konglam khumhnak cazin kha a hngalhpinak ca ah an hman chung a hau lai.
Vaccination Certificate lak khawh ningcang
“A hmasa bikah na tuah awk a si ti ka ruah mi cu myGov account na ser lai na ngeih rih lo a si ahcun” tiin Service Australia lutlai a simi Hank Jongen nih a ti.
“Mygov account na ser dih khawh a si ahcun, Medicare he na link a hau lai.”
Cun, Express Plus Medicare timi app kha na phone ah download na tuah lai.
Mr Jorgen nih “Na online account na link khawh dih hnu ah raikhamsii na chunh cang nak konglam vialte cu na kut cungah fawi zaang tein na zoh khawh cang lai” a ti.
Phone chung I a ummi app hman kha na duh lo sual zongah lam dang a um thiam ko. Immunisation History ah khan na kal lai i COVID-19 Digital Certificate timi kha na hmeh piak lai cun, na Download lai I na phone silole na computer ah na chiah khawh.
Source: Services Australia
Medicare nih na konglam an ngeih mi pawl kha a hman lo ahcun na account kha link na tuah kho lai lo.
Service Australia nih zeitin dah Medicare account le myGov account link tuah ningcang hmuhsaknak muicawl tawi an ser.
Medicare na ngeih lo sual a si zongah, na konglam pawl hna cu myGov account chungah a ummi Individual Healthcare Identifier Service timi ah zoh le hmuh khawh a si. Cuka ah cun Hngalhpinak ca (Certificate) zong cu download na tuah khawh thiam thiam.
Kum 14 tang hngakchia caah hngalhpinak ca
Nule pa silole zohkhentu hna nih an fale kum 14 tang a si mi raikhamsii an chunhnak konglam pawl zohkhawh nak le a herhning in tawlrel khawh nak nawl an ngei.
Raikhamsii chunhnak tawlreltu phu zong nih nafa raikhamsii a chunhnak konglam cu catlap in print piak na duh ahcun AIR pehtlaihnak na tuah khawh hna, 1800 653 809 ah na chawh khawh hna I catlap in rak kan kua uh ti khawh an si.
Digital Wallet ah Certificate chiah ningcang
Digital wallet cu na phone chungah a ummi phaisa bawm a si. Service Australia nih digital wallet ah certificate chiah ning fianternak an tuah. A tuah ningcang cu Medicare na ngeih le ngeih lo le, phone app na hman le hman lo nih lai a rel lai.
Online hmangin certificate chiah na duh lo, silole phone na hman lo sual ah tah zeitin?
Jorgen nih “A hohmanh myGov hi hman dingah a tlak cemmi le a tha cemmi a si kan timi a si hlei lo. Online hmangin certificate I chiah na duh lo sual a si zongah Services Australia na pehtlaih hna lai I hngalhpinak ca kha a catlap in rak ka kua uh na khawh ko hna. Thil fawi te khi a si ko, 1800 653 809 ah chawn hna law an in bawmh ko lai” a ti.
Raikhamsii na chunhnak ah khan na duh ahcun, immunisation history ka print piak uh tiah na hal khawh thiam thaim hna.
COVID-19 Raikhamsii I chunhnak hngalhpinak ca cu man lo a si.
Mi cheukhat cu email le phone cakuat in link an rak kuat hna I, COVID-19 passport kha $2 hna in an zorh hna. Lih le hrokhrol a si caah, link na donmi kha hmet hlah cun hloh colh ah a tha cem.
Jorgen nih “Mi hrokhrol thil tuah a si caah link na donmi na hmeh sual a si ahcun, na pumpak kong lam theih awk a tha lomi pawl hna kha an hal lai. Na pek sual hna a si ahcun, $2 nak tam deuh an in fir piak lai” a ti.
Authorities are warning against sharing personal details through links contained in unsolicited text messages offering COVID-19 passports. Source: ACCC Scamwatch
