Tukum a dong lei ah Voice referendum thimfung thlaknak a um lai. Australian Electoral Commission (AEC) nih thimfung a thla ding mi sin ah nawlnak an tuah duh mi a um.
AEC lei in nawlnak an tuah mi cu thimfung thlaknak catlap cungah mirang ca in ‘Yes’ silole ‘No’ ti mi biafang lawng tial dingin nawlnak thawng an thanh.
Thimfung thlaknak kongah lungtuainak a um sual lai, thimfung an thlak mi rel lo a si sual nak hnga lo thimfung thlakning theihternak tuah an duh hi a si. Caan dang i thimfung thlaknak ah cun lung tlinnak langhter can ah zah (tick) hman tawn a si. Nain a tutan cun a cafang in tial dingin an lungduh an langhter.
Australian Electoral Commission (AEC) ah hoatu rian a tuan lio mi Tom Roger nih thimfung thlak ning fiang ngai in Sky News ah a chim. Catlap cungah Yes silole No biafang lawng kan cohlan lai tiin muicawl thawngzamhnak ah chim.
“Atu ah fianter nak tuah ka duh mi cu thimfung thlakning hi a si, mipi nih an theih fian a hau mi cu an lungtlinnak langhter can ah zah (tick) an hman khawh cun do a tla mi thimfung ah kan rel lai. Asinain, an lungtlin lonak langhter can ah arke (x) an hmang kho lo, ‘no’ timi biafang an hman a hau lai.”
AEC nih caan tampi pek in mipi sin ah zei bantuk dah do a tla mi thimfung a si timi chim relnak zong kan ngei kho tiin Roger nih a chim.
Thimfung thlaknak hmun zongah thimfung kong zong fiang tein chim relnak siseh cun catlap cungah ah fiang tein tial le langhter dingin timhlamhnak kan ngei. Thimfung thlaknak ding timhlamhnak caah Phung ning le upadi ning tein cawlcangh le riantuan kan I zuam tiin Roger nih a chim chap.
Referendum, phunghrampi thlennak ding caah thimfung thlak ding ni le thla cu ram hruaitu Anthony Albanese nih thaizing (cawn nithum ni) ah a fianter cang lai.
A hlawhtling mi referendum a si khawh nak ding caah cun ramkulh pa 6 chungah pa li nih an lung a tlin a hauh pin ah, ram mi zatuak 50 le 1 nak tam deuh nih an lung a tlin a hau.
Zapi nih an ruahnak ah cun Oct 14 ah thimfung thlak a si te theo lai an ti.
