Online in rammi sinak bia thanhnak tuahmi ah minung 170 an I tel tiah ramhuap acozah nih a chim. Aralai mi zarh chungah nikhat ah minung zakhat hrawng ca hi zung lei nih an tawlrel khawh a si ahcun caan saupi ngah-caan cu a thian ter lai i, minung tampi nih a rauh hlan ah Australia cu ka run-inn tiah an kawh-auh khawh cio cang lai tiah ruahchannak a um. Online in rammi sinak a lattu sin ah a chimmi cu,
A hmasabik ah chim ka duhmi cu kan conglawmhpi hna ti hi a si.....
Sydney ah a ummi Fadi le Faris Masarweh cu, an innchung thutdan cung te ah an thu, an laptop te i tlaih in Australia rammi sinak a la mi an si. An chimmi cu,
Zumhtlak tein ka nung lai tiah Australia le a rammi sin ah bia kaa kam…
An hawi le an chungkhar an I tello tik ah, a tubantuk tein rammi sinak puai ni cu a si te lai tiah an rak i ruahchanmi cu a si lai lo dah. Sihmanhsehlaw, online in chiatserh biakamnak cu a changchang tein an hun tuah tik ah an chimmi cu a tubantuk ni le caan hi kum saupi kan rak i hngalhhlaang mi cu a si tiah Faris nih nawlngeitu pakhat sin ah a chim. A chim rihmi cu,
Nizan kha kum 30 ka tlin ni a si, nihin ah rammi sinak puai kan tuah. Chuahni laksawng ka co mi vialte lak ah a thabik bak a si....
Annih tafar cu rian thiamtlinnak ruang ah Jordan in Australia ah kum 2015 ah a rak pemmi an si. Thla 18 a rauh hnu ah Australia rammi sinak an co.
Rammi Sinak tiah chunmang an rak manh tawnmi cu COVID-19 nih a tlerh tu in a rak tlerh lei hna. Sihmanhsehlaw, online in rammi sinak an tuah khawh hnu cun, lei harnak philh ta in an unau in an pet, an per i lungdiriam tein an rak i hlawt. Fadi nih a chimmi cu,
Atlai cangmi kha a rak tlai chinchin lengmang tik ah, inpuan bu tein ka rak um bak ko. Sihmanhsehlaw, acozah nih online in rammi sinak puai tuah ding in tiah an chim ahkhan, kaa lawm kho taktak khi a si.
Acozah nih thla hramthok lei ahkhan rammi sinak cohlan a si cangmi pawl nih Khawrawnarungrul ruangah puai tuah piak lo in an kan um sual lai tiah thinphan, lungrethei in a um mi hna caah tiah online in rammi sinak tuah siseh tiah thawng thanhnak an rak ngei.
Pemluhnak Minista, Alan Tudge nih a chimmi cu rammi sinak aa tlak komi minung cu a rankhawh chungin si hna seh tihi acozah nih a duhmi cu a si tiah a chim. A chimmi cu,
Kan duhmi cu Australia le a minung sin ah zumhtlak tein an nun dingmi le biakamnak an tuah ding mi kha a si. Cucaah, online in rammi sinak tuah kho ding in lam kan ser piak hna. A sokmi cu an tuah dingmi le chek a herhmi vialte cu an tuah ve thiamthiam ko.
Pemhluhnak Bu lei in an I timhmi cu nikhat ah minung 750 nih rammi sinak an tuah khawh a si ahcun minung 90,000 leng a hngakmi caah lam a thian ter deuh lai tiah an ti.
Pemluhnak Minista nih a chim rihmi cu rammi sinak sok a duhmi nih sok khawh peng a si ko nain zatlang mibu he ihlatnak zulhphung ruangah zunglei in a soktu he ton in biaruahnak le hneksaknak bel a tuah kho lo. A nolh rihmi cu, online in lamthar an kawl ko nain, a-tu-ah an I hmaithlak hmasa mi cu a hlan ah a rak sokcangmi le cohlan cangmi ca’h tu hi a si. A chimmi cu,
Rammi Sinak Hneksaknak a awng cangmi, holh hneksaknak a tei cangmi le a dangdang herhhaimi tuahdingmi paoh ah teinak a hmuh cangmi kha atucu kan tawlrel piak cuahmah hna. Annih cu Australia rammi sinak caah kar khat te karhlan ding in a baumi an si.
Ahmanungbik Khawrawnarungrul kong nan holh tein ngaih le rel a duhmi nih sbs.com.au/coronavirus ah len khawh a si.
