Lub koom txoos ASEAN-Australia txwm 50 xyoo yuav tham txog ntau yam hauj lwm tseem ceeb li hauj lwm kev ruaj ntseg ntawm lub koom haum ASEAN thiab cheeb tsam Indo-Pacific, lagluam Blue Economy, thiab Digital transformation nrog rau Australia cov tswv yim npaj tseg yuav ua raws ntawm Australia-ASEAN 2040.
Lub rooj sab laj ASEAN-Australia txwm 50 xyoo yog qhia txog cov kev sib raug zoo ntawm Australia nrog lub koom haum ASEAN los tau 50 xyoo thiab kev nom tswv, kev lagluam thiab kev koom tes ntawm ob tog.
Australia tus thawj pwm tsav kuj tau tos txais 9 tug coj ntawm lub koom haum ASEAN tuaj koom lub rooj sab laj ntawm nroog Melbourne ntawm lub chaw sab laj Melbourne Convention Exhibition Centre txij hnub tim 4-6 lub 3 hlis ntuj xyoo 2024.
Tham txog kev ruaj ntseg ntawm cheeb tsam Indo-Pacific ces kuj muaj tej kws paub zoo txog tej hauj lwm no qhia tias lub koom haum ASEAN yeej tau koom tes nrog lwm lub teb chaws ua ke los yog muaj kev koom tes ntawm lub koom haum no, thiab lawv los kuj tsis xav xaiv thiab yuav koom Meskas, los koom Australia. Tab sis yeej paub tseeb tias muaj kev koom tes zoo dua nrog Suav tuam tshoj vim Suav yog ib lub teb chaws muaj kev sib raug zoo nom tswv thiab nqes peev lagluam nrog lub koom haum ASEAN no ntau dua.
Yog tham txog tej kev ruaj ntseg ntawm cheeb tsam no lawm ces lub koom haum no yeej tau koom tes nrog pej kum haiv los daws cov ua txhaum cai.
Kuj muaj lus nug tias lub koom haum ASEAN no ua tsis tau dab tsi thiab vim tsuas pom saj laj nkaus xwb tab sis tsis ua dab tsi li. Ces Ms Charadine Pich uas yog tus lwm coj ntawm Cambodian Institute for Cooperation and Peace thiaj hais tias yuav tsum tau npaj los xyuas kom muaj lub tswv yim P.O.A 'Plan of Action.' Tab sis yog tham txog teb chaws Phabmab lawm ces kuj tsis muaj peev xwm ua tau dab tsi, vim lub koom haum no muaj tsab cai 'tsis raus tes rau lwm lub teb chaws tub koom siab tej hauj lwm.'
Tab sis Dr Rizal Sukma uas yog tus Senior Fellow ntawm lub chaw teeb txheeb Centre for Strategic and International Studies ntawm teb chaws Indonesia hais tias, 'peb yuav tsum tau siv kev nom tswv los sib kho thiab yuav tsum tau los tswj tej kev phom sij, peb yeej xav kom muaj kev pauv hloov thiab daws tau tej teeb meem no tab sis zoo li pheej ua tsis tau dab tsi li, yog li peb yuav tsum tau nqes tes los daws tej teeb meem no.'
Dr. Pichamon Yeophantong uas yog ib tug neeg ntawm lub koom haum Member of Asia-Pacific states in UN Working Group on Business and Human Rights, thiab yog tus coj ntawm lub chaw teeb txheeb Centre for Future Defence and National Security ntawm tsev kawm qib siab Deakin University ntawm Australia no hais tias, lub koom haum ASEAN no yeej muaj los ntev thiab ua tau ntau yam lawm txawm tias nws tseem tsis tau muaj peev xwm ua tau raws li qhov nws xav ua.
Thiab thaum nug txog tias yog Meskas tus nom dhau los uas yog Donald Trump hos rov qab yeej los ua nom, los yog Joe Biden ho rov qab yeej los ua nom no ho yuav siv lub tswv yim twg, ces Dr Yeophantong hais tias ''yuav tsum tau siv ASEAN lub zog nruab nrog, thiab txheeb tias seb lub zog ntawm cheeb tsam no los yog lub zog hauv ntiaj teb no ho puas yuav nrog daws tau tej kev phom sij geopolitic risks no. Yog li thiaj yuav tau siv kev nom tswv thiab kev koom tes los kho thiab daws tej teeb meem no.'
Yog tham txog Blue Economy los yog tej lagluam cuam tshuam txog cov kev siv tej peev txheej dej, tej tsiaj nruab deg kom siv tau ntev yav tom ntej ces kuj tau tham txog pej kum haiv cai tswj kev nuv ntses thiab tej ciam dej hiav txwv, cov kev tsim pas dej tauv los tsim hluav taws xob, thiab Tonle Sap Lake yuav muaj teeb meem li cas los ntawm tus dej Mekong raug tauv thiab tsis muaj dej.
Kuj tau muaj Michelle Voyer uas yog ib tug Associate Professor ntawm lub chaw teeb txheeb Australian National Centre for Ocean Resources thiab Security ntawm tsev kawm qib siab University of Wollongong ntawm teb chaws Australia no hais tias muaj 4 yam laj thawj uas nws xav tham txog Blue Economy. Thawj yam yog cov kev nuav ntses txhaum cai (Illegal, unreported and unregulated (IUU) fishing), kev dawb huv, tej kev pom zoo txog cov kev nuv ntses thiab cov kev hloov los yog tig ntawm cov kev nuv ntses siv tam sim no mus siv dua cov kev nuv ntses tshiab.
Dr Asmiati Malik ntawm Indonesia kuj tau hais tias cov lagluam nuv ntses feem ntau txog li 90 feem puas yog cov lagluam nuv ntses me xwb yog piv rau cov kev nuv ntses ntawm lub pas dej Tonle Sap Lake ntawm yeej tau lagluam los ntawm cov kev txhom tej ntses ntawm lub pas dej no ntau tshaj 10 billion dollars rau xyoo 2020.
Dr. Keoduangchai Keokhamphui, Deputy Dean of Water and Natural Resources ntawm tsev kawm qib siab Lao National University tau hais tias, Nplog yeej muaj tej niam dej thiab peev txheej dej ntau heev ces tam sim no thiaj tab tom muaj 38 cov projects pas dej tauv uas ua coj los tsim hluav taws xob. Tab sis vim tseem muaj kev cog qoob loo thiab cog ntoo roj hmab sab qaum teb, ces tej zaum thiaj yuav ua rau muaj kev paug tsuas rau tus dej Mekong River system thiab tej zaum tej water contaminated no kuj yuav raug tshoob mus rau hiav txwv tau thiab.
Dr Ratha Sor, uas yog tus Dean of Graduate School National University of Cheasim Kamchaymear ntawm teb chaws Cambodia kuj hais tias cov kev muab tej dej tauv ua pas dej tsim hluav taws xob no tau ua rau muaj teeb meem rau tej eco-system nram qab deg thiab muaj teeb meem rau txoj kev ua lub neej vim ua rau tsis muaj tej ntses loj li qub, me dua qub lawm xwb.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
