Anthony Albanese tau yeej cov kev xaiv tsa tsoom fwv teb chaws xyoo 2025 lawm, thiab tus tsoom fwv Labor kuj tau rov qab los ua nom zum 2 uas yeej tej rooj nom feem coob lawm.
Albanese tau qhia rau tej neeg txhawb nqa nws ntawm Sydney tias cov kev tau los ua thawj pwm tsav yog ib lub meej mom tshwj xeeb tshaj plaws ntawm nws lub neej.
Nws tau hais tias "Kuj yog tej meej mom tshwj xeeb tshaj plaws thiab yog ib lub luag hauj lwm tseem ceeb tshaj plaws rau kuv yuav tau ua thawj yam hmo no yog yuav tau los hais lo lus ''ua tsaug'' rau tej neeg ntawm teb chaws Australia uas pub lub cib fim no rau kuv rov qab los ua hauj lwm pab rau haiv neeg zoo tshaj plaws hauv ntiaj teb no,''
"Hnub no, ces neeg Australia yeej tau xaiv nom raws lawv cov kev xav: li xaiv kev ncaj ncees, xaiv tej lawv xav ua, thiab xaiv cov kev muaj cib fim rau sawv daws.
"Neeg Australia tau xaiv lub neej pem suab haum raws li lawv cov kev xav, lub neej pem suab uas tsim txhua yam kom peb koom npoj.''
Labor thiaj yuav tau los ua tus tsoom fwv tswj hwm rau lub caij nws yeej tej rooj nom ntau tuaj ntxiv hauv tsev tsoom fwv tom qab uas tau muaj ntau lub rooj nom thoob plaws ntawm tej xeev tau tig mus xaiv nws pab nom.
Ib lub ntawm ntau cov rooj nom uas pab nom Labor yeej ntawd ces yog Peter Dutton uas yog tus coj ntawm lwm pab nom teb chaws lub rooj nom Dickson ntawm xeev Queensland.
Dutton tau swb rau pab nom Labor tus nom Ali France, uas yog thawj zaug uas tus coj ntawm lwm pab nom teb chaws tau swb nws lub rooj nom rau ib co kev sib tw xaiv tsa tsoom fwv teb chaws.
Peter Dutton uas yog tus coj pab nom Australian Liberal Party , tus peb ntawm sab laug, sawv nrog nws tsev neeg hais lus thaum muaj kev xaiv tsa ntawm Brisbane. Source: AP / Pat Hoelscher/AP
Nws tau hais tias "Peb yeej tsis muaj peev xwm ua tau tej hauj lwm nrhiav suab zoo rau thaum tseem nrhiav suab sib tw xaiv nom, ces thiaj ua rau peb swb hmo no.''
"Kuv yeej xav ua zej tsoom lub neej uas zoo tshaj plaws rau peb lub teb chaws thiab zoo tshaj plaws rau txhua tus neeg Australia.''
"Txawm li cas los kuj yog lub tsam thawj keeb kwm tseem ceeb rau pab nom Labor, thiab peb yeej lees paub.''
Qee yam cai ntawm ntau cov cai uas Albanese tau qhia ntawd ces nws yuav pub tej neeg yuav thawj lub tsev nyob tsuas siv 5 feem pua ntawm tus nqe tsev mus zoj yuav tsev nyob, thiab kuj tau cog lus tias yuav siv nyiaj $10 billion los tsim kom tau 100,000 lub tsev tshiab.
Nws kuj tau cog lus tias yuav siv nyiaj $8.5 billion kom tej neeg tau mus siv tej chaw kho mob txog 18 million zaug ib xyoo twg tam li yog ib cov kev pab kom siv tau Medicare zoo tshaj qub ntxiv.
Labor los kuj kub siab yuav siv nyiaj $2.3 billion pab tej cuab yig yuav roj teeb los khaws hluav taws xob uas tsim tau los ntawm tej phiaj ziab tshav siv, thiab cog lus tias yuav rau txim rau tej supermarkets uas pheej nce tej nqe muag khoom kim.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
