Ntsiab lus tsem ceeb:
- Tsoom fwv xeev Queensland tau pab cov nyiaj First Home Owner Grant ntau tuaj ntxiv txog ob npaug.
- Cov nyiaj First Home Owner Grants no yog coj los pab kom tej neeg yuav tau tej tsev nyob tab sis tej zaum kuj yuav muaj qhov tsis zoo thiab.
- Tej neeg paub zoo txog lagluam hais tias tib txoj xub ke yuav pab kom tej neeg yuav tau tsev nyob ces tsuas yog tsim kom tau vaj tse ntau ntxiv xwb.
ces raug tsim coj los pab kom neeg Australia yuav tau lawv thawj lub tsev nyob kom yooj yim me ntsis thiab pab kom tsis txhob ntsib tej teeb meem muaj nyiaj tsis txaus siv them tej nuj nqes siv ua lub neej me ntsis.
Xeev Queensland kuj tau nces cov nyiaj no ntau tuaj ntxiv ua ob npaug coj los pab tej neeg yuav thawj lub tsev nyob lawm. Txawm li cas los raws li tej kws paub zoo txog lagluam hais, ces cov kev pab tej nyiaj rau tej neeg yuav thawj lub tsev nyob no tej zaum kuj haj yam yuav ua rau neeg Australia yuav tau lawv thawj lub tsev nyuaj zog ntxiv thiab.
First Home Owner Grant (FHOG) yog dab tsi?
FHOG ces yog haiv neeg no tej nom tswv xeev tej nyiaj uas coj los pab tej neeg yuav tsev them se GST thaum yuav tsev rau yus nyob.
Thiab raws li cov kev pab cuam no tau teev tseg, ces tsuas yog ib cov kev pab cuam uas tsuas pab tib zaug rau tej neeg yuav thawj lub tsev nyob uas muaj cai tau tej nyiaj pab cuam no ntawm tej xeev lawv nyob xwb.
Leej twg yog cov neeg muaj cai tau tej nyiaj First Home Owner Grant no?
Ib lub xeev twg nyias yeej muaj nyias cov cai sib txawv teev tias leej twg thiaj yog cov neeg muaj cai tau tej nyiaj FHOG no. Txawm li cas los yeej xav kom tag nrho txhua tus neeg xav thov tej nyiaj no siv yuav tsum yog ib tug neeg muaj hnoob nyoog yam tsawg li 18 xyoo, yog ib tug pej xeem Australia los sis yog ib tug neeg muaj cai nyob ruaj ntawm Australia. Muaj tej xeev muaj cov kev pab cuam cov nyiaj FHOG raws li hauv qab no:
Queensland: Txij hnub tim 20 lub 11 hlis ntuj 2023 mus ces tej neeg nyob ntawm xeev Queensland yuav tau cov nyiaj FHOG ntau tuaj ntxiv li ob npaug, uas nces ntawm $15,000 mus ua $30,000 lawm. Yuav tau cov nyiaj pab cuam no yog tias ib tug twg yuav ib lub tsev tus nqe tsawg dua $750,000, uas nrog thaj av ua ke los yog ho muaj cov contract txawv.
NSW: Tej neeg ntawm xeev NSW yuav tau cov nyiaj no $10,000 rau tej tsev tshiab uas twb ua tau lawm uas tus nqe tsev raug nqe txog $600,000 los yog lub tsev tshiab ntawd tus nqe tsev txog li $750,000 yog tias lawv muaj cov contract yuav ua lub tsev tshiab los sis yog yus yog tus neeg yuav ua tus tsim lub tsev tshiab rau yus nyob.
Victoria: Ces yeej muaj ntsis zoo sib xws li xeev NSW thiab, uas tej neeg nyob ntawm xeev Victoria yeej muaj cai thov tau cov nyiaj no txog $10,000 yog tias lawv yuav los yog ua dua ib lub tsev tshiab tus nqe tsawg dua los yog tus nqe txog $750,000.
Tasmania: Nrog rau xeev Queensland thiab xeev Tasmania ces yog cov xeev uas pab cov nyiaj FHOG ntau dua. Tej zaum tej neeg nyob ntawm xeev Tasmania uas tseem tab tom tsim tsev tshiab los yog yuav tsev tshiab kuj yuav muaj cai tau cov nyiaj no txog li ntawm $30,000 thiab.
South Australia: Tej neeg nyob ntawm xeev South Australia ces yuav tau cov nyiaj no txog li $15,000 yog tias lawv yuav ib lub tsev tshiab los yog kho ib lub tsev twg kom zoo tshaj qub ntxiv uas muaj tus nqe tsev txog li $625,000, tsuas nyob rau ntawm seb tau kos xyeem mem tes rau daim contract ntawd ntau twg xwb.
Western Australia: Tej neeg nyob ntawm lub xeev no yuav muaj cai tau cov nyiaj no txog li $10,000 yog tias yuav ib lub tsev tshiab los yog kho ib lub tsev twg kom zoo tshaj qub ntxiv uas tus nqe tsev txog li ntawm $750,000 rau tej tsev uas yuav rau sab qab teb raws tus ciam teb uas kem xeev South Australia, Northern Territory thiab xeev Queensland suav nroog Perth nrog, thiab yuav tej tsev tus nqe txog li $1 million rau sab qaum kab kem ciam teb ntawm lub xeev no.
Northern Territory: Tej neeg ntawm xeev Northern Territory ces yuav tau cov nyiaj FHOGs txog $10,000 yog tias yuav tej tsev tshiab. Thiab yeej tsis txwv tias lub tsev ntawd tus nqe tsev yuav raug npaum li cas li.
Australian Capital Territory: Lub 7 hli ntuj xyoo 2019 ces xeev ACT tsis siv cov nyiaj FHOG no lawm thiab tau coj cov Home Buyer Concession Scheme coj los siv rau tag nrho tej vaj tse uas tej neeg yuav ntawm xeev ACT no lawm. Tej nyiaj no yog ib cov nyiaj coj los pab them se thaum yuav tsev los yog txo kom tej neeg muaj cai yuav tau tsev lawv xav yuav kom tsawg ntxiv.
The first home guarantee scheme is being expanded. Here's what you need to know
The first home guarantee scheme is being expanded. Here's what you need to know
Puas yog tej nyiaj First Home Owner Grants (FHOGs) ua rau tej nqe tsev kim tuaj ntxiv?
Lub caij xyoo 2005 txog rau xyoo 2023 ces yeej muaj tej neeg Queensland thov tau cov nyiaj no ntau tshaj 61,000 cov uas coj mus yuav thawj lub tsev nyob ntawm tej zos toj siab ntawm lub xeev no. Txawm li cas los kuj tau muaj cov kev sib teev theev (sib cav) ntawm tej chaw uas muaj neeg nyob coob tias seb puas yog tej nyiaj FHOGs no ua rau tej nqe tsev kim thiab.
Thiaj ua rau tej tsev uas tej neeg yuav thawj zaug ntawd tej nqe kim tuaj lawm .... thiab yeej pab tsis tau kom tej nqe tsev pheej yig thiab tej neeg yuav tau nyob li. Yog tias koj mus koom sib tw auction ib lub tsev twg thiab muaj neeg coob heev mus koom, ces yog tias tus neeg ntawd thov tau nyiaj $30,000 ntxiv ces yuav ua rau lub tsev tus nqe kim ntxiv li ntawm $30,000 lawm thiab.Senior economist, Australia Institute, Matt Grudnoff.
Xyoo 2021 ces lub chaw teeb txheeb Grattan Institute thiaj tau xa ib tsab ntawv tawm tswv yim rau tsev tsoom fwv teb chaws kom txheeb txog thiaj li tau taw qhia kom tsoom fwv teb chaws thiab tsoom fwv xeev tso tseg tsis txhob pab tej nyiaj FHOGs no rau tej neeg yuav thawj lub tsev nyob ntxiv lawm, vim nws hais tias cov kev pab no ua rau tej nqe tsev kim tuaj ntxiv.
Ces thiaj ua rau tsoom fwv xeev Victoria tseem tab tom txiav txim siab tias seb puas yuav tsis pab tej nyiaj FHOGs ntxiv thiab tsuas siv cov kev pab cuam Victorian Home Buyer and Shared Equity scheme uas tsoom fwv pab them yuav laug txog li ib nrab kom yus tsis txhob tau them nyiaj deposit ntau es thiaj yuav tau tsev nyob, tab sis yus mam li them tej nyiaj no rov qab rau tsoom fwv.
Xoo 2016, ces Auckland City Council tau kho nws tej cai tswj tej chaw tsim vaj tse kom tsim tau vaj tse rau tej neeg nyob coob ntxiv tuaj ces thiaj ua rau tej nqe tsev pheej yig lawm. Source: Getty / REDA & Co
Yuav tsum daws tej teeb meem ntawm tej zejzog coj los daws tej teeb meem uas muaj rau haiv neeg no
Grudnoff ceeb toom tias tej nyiaj pab tej neeg yuav tsev no yuav pab tsis tau tej neeg yuav tsev kom muaj peev xwm yuav tau nyob.
Tsuas muaj ob txoj xub ke xwb xws li ua kom tej neeg tsis xav yuav tsev lawm los yog tsim kom tau vaj tse ntau ntxiv tuaj xwb.Senior economist, Australia Institute, Matt Grudnoff.
Chris Richardson uas yog ib tug economist tuaj nruab nrab tau hais tias yuav tsum siv tej tswv yim los daws kom tau tej teeb meem vaj tse ntawm tej zejzog ua ntej mas thiaj yuav daws tau tej teeb meem vaj tse ntawm haiv neeg no.
Yog tias yus xav kom tej nqe tsev pheej yig ces yuav tsum xyuas kom tej nom tswv zos tsim vaj tse kom ntau ntxiv. Auckland tau hloov tej cai tswj tej chaw tsim faj tse rau tej nom tswv zos siv kom thiaj los tso cai ua tau tej vaj tse.Indepenent economist Chris Richardson
Xyoo 2016 ces nroog Auckland thiab teb chaws New Zealand tau tso tseg cov kev txwv tias tsuas pub tsim vaj tse rau thaj chaw twg no lawm, thiab tig los tso cai tsim tej vaj tse rau ntawm tej zos kom muaj neeg nyob tau coob tuaj ntxiv, ces thiaj ua rau tej nqe tsev pheej yig zog lawm.
Tej no thiaj yog qhov sib txawv ntawm tej laj fai kum xeeb zoo thiab tej cai zoo.Independent economist Chris Richardson
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
