Nyob sab plawv xeev Victoria los kuj muaj hav zoov kub hnyiab tej tiaj nyom tswj tsis tau vim muaj cua hloob heev ces thiaj ua rau cov zos yaj sab muaj plua tshauv nco thoob.
Ces thiaj ua rau muaj kev ceeb toom tias muaj teeb meem phom sij tau los ntawm tej hav zoov kub hnyiab no rau plawv xeev, sab qaum teb hnub poob qee cheeb tsam ntawm lub xeev no.
Thiaj tau ua rau muaj hav zoov kub loj heev rau ntawm lub zos Bonn thiab Strathanllan uas tej zaum ua rau muaj teeb meem rau tej vaj tse tau thiab ntshe lig rau tej neeg zejzog khiav tawm lawm.
Muaj neeg coob tshaj 30 leej raug mob thiab tej vaj tse ntau lub thiab tej tsev ntim khoom ntau lub puas tsuaj tag rau lub caij nom tswv tseem tua tej hav zoov kub hnyiab ntwm suam hav Yorke Pennisula ntawm xeev South Australia.
Kob hluav taws uas kub sai heev twb kub tej chaw dav txog 4,500 hectares lawm thiab kub ntaug me ntsis lawm tab sis yeej tseem kub mus rau cov zos Edithbrugh thiab Coobowie.
Rob Sandford uas yog tus coj sawv cev rau tus lwm coj Country Fire Service hais tias nws txhawj xeeb heev vim zoo li nyuam qhuav pib muaj hav zoov kub hnyiab xwb.
Hos lub caij no ces kuj tau txwv tsis pub tej neeg rau taws nraum zoov thoob plaws xeev NSW vim tseem muaj 50 kob hav zoov kub hnyiab thoob lub xeev no.
Ces thiaj ua rau pa taws pos huab niab thoob nroog Sydney thiab muaj tej neeg tua hluav taws ntau tshaj 1,000 tus tseem sam sim mus tua hluav taws tam sim no.
Hos ntawm xeev Victoria los nom tswv kuj tau nqua hu kom tej neeg zejzog uas tej zaum yuav raug kub hnyiab tau mus rau thaj chaw ze lawv uas tsis kub hnyiab ntawd.
Ntawm xeev Tasmania los kuj yuav muaj tau hav zoov kub hnyiab rau ntau thaj chaw rau lub caij huab cua kub sov no thiab, thiab ntawm Australian Capital Territory ces yeej tau txwv tsis pub tej neeg rauv taws nraum zoov li.
Tau muaj lub koom haum Chartered Accountants Australia and New Zealand tau coj ib cov checklist los pab tej lagluam uas txom nyem nyiaj txiaj rau lub caij hav zoov kub hnyiab no.
Peter O’Regan uas yog tus coj lub koom haum tej zejzog yaj sab hasi tias txawm tau muaj tsoom hwv ntau cov nyiaj pab cuam emergency lawm los yeej tseem tsis muaj peev xwm mus thov tau tej nyiaj no siv vim lawv tsis muaj ntaub ntawv.
"Muaj ib txhia nyiaj qev pab cuam no yuav coj mus pab rau xeev Queensland thiab New South Wales tab sis yuav tsum muaj ntaub ntawv teev seb lawv tej tsiaj txhu xiam li cas, qoob loo puas tsuaj li cas, siv nyiaj kho dab tsi li cas thiaj thov tau nyiaj pab cuam."
Mr O’Regan hais tais xav kom tej neeg sawv daws yuav tsum txheeb xyuas lawv cov insurance policies, thiab ua tib zoo saib xyuas lawv tus kheej cov teeb meem mob hlwb thiab nyuaj siab ntxhov plawv, thiab yuav tsum tau teev zwm lawv tej ntaub ntawv txog tej hais dhau los khaws zoo cia thiab nqa nrog yus mus yog tias hav zoov kub hnyiab los txog yus zos los sis yus tsev.
Hos Australia tus thawj pwm tsav Scott Morrison los kuj hais tias yeej tsis muaj kev cuam tshuam dab tsi los ntawm tej pa tsis huv paug tsuas rau tej ib puag ncig thiab tej xwm txheej hav zoov kub hnyiab thoob teb chaws Australia no dab tsi.
Tsis tas li no los thawj pwm tsav yeej tau los pov puag nws tus tsoom hwv tej cai tswj cov teeb meem hloov quag ntuj (Climate change policies) rau lub caij uas tseem muaj hav zoov kub thoob lub teb chaws no rau thaum ntxov yuav txog lub caij ntuj so uas yuav muaj hav zoov kub hnyiab ntawd.
Mr Morrison hais tias Australia yeej tseem tso tau tej pa tsis huv no rau tej huab cua yam tsis muaj teeb meem dab tsi cuam tshuam rau lub caij hav zoov tseem kub loj zuj zus tuaj no thiab.
Nws tau qhia rau tsev nthuav xov xwm ABC tias yeej tsis muaj pov thawj tim khawv dab tsi yuav qhia tau tias yog Australia txo tej pab tsis huv kom tsawg lawm es ho puas yuav pab kom tsis txhob muaj tej hav zoov kub hnyiab muaj ceev ntxiv li cas thiab.
"Climate change yog ib cov xwm txheej muaj thoob ntiaj teb no, peb yeej muaj feem los daws ua peb tug lawm. Lub tswv yim tias tsuas txog cov pas tsis huv txog li 1.3% xwb es txawm yuav pab hloov tau tej caij nyoog dab tsi, kuv yeej tsis ntseeg tias yuav muaj tej pov thawj tim khawv los ntawm cov kev tshawb fawb txaus ntseeg tias yuav pab tau li."'
