Ntsiab lus tseem ceeb:
- Ib lub xyoos twg ces Australia muab tej zaub mov tshaj 7.6 million tonnes pov tseg.
- Australia tej tuam txhab cog qoob loo thiaj pab txuag tau tej zaub mov txog 13 feem puas kom tsis txhob nkim rau lub caij 3 xyoos dhau los.
- Lub koom haum End Food Waste Australia hais tias cov kev txo se rau tej zaub mov pub rau lwm tus yuav txhawb nqa kom tej lagluam coj tej ntau dhau lawm coj mus siv ua lwm yam.
Ib xyoos twg ces Australia yeej tau muab tej zaub mov tshaj 7.6 million tonnes pov tseg, thiab yog muab coj mus ntim rau lub tshav sib tw Melbourne Cricket Ground lub tshav sib tw ces ntim tau txog 10 lub, tab sis kuj muaj peev xwm los txo tau tej kev nkim tej zaub mov no rau lub caij uas muaj tej teeb meem nuj nqes siv ua lub neej kim.
Tej supermarkets li Coles thiab Woolworths, tej neeg ua zaub mov thiab tej tuam txhab tsim zaub mov uas yog ib feem uas yuav tau ua raws li Australia Food Pact tau qhia tias kuj tau txos tej zaub mov nkim txog li 13 feem pua rau lub caij 3 xyoos dhau los no.
Lub koom haum End Food Waste Australia tsab ntawv cej luam 21 nplooj kuj tau kwv yees tias tau tsis tso tej carbon dioxide tshaj 500,000 tonnes rau tej ib puag ncig thiab tau lug tsis nkim tej zaub mov txog li ntawm 16,000 tonnes txij xyoo 2022-24.
Yog li thiaj tau ntau yam txiaj ntsim tseem ceeb tshaj qhov cheem tsis tso tej pa tsis huv rau tej ib puag ncig, thiab txo tau cov kev nkim zaub mov no, li tseem pab txuag tau tej peev txheej tseem ceeb li dej thiab tej av cog qoob loo thiab.
Tej koom haum uas cuamtshuam txog tej zaub mov uas muaj ntau heev ntawd kuj raug coj mus rau tej neeg txom nyem noj, thiab yeej tau coj mus tsim tau cov pluas hno tshaj 250 million pluas coj mus pab rau tej koom haum pab cuam zaub mov.
Sam Oakden uas yog tus coj kis thiaj tau hais tias "Tej no yog qhia txog tias yog thaum peb tej koom haum sib koom tes ces yuav ua tau ib yam dab tsi zoo,''
"Tej koom haum no thiaj ntaus thawj hlo los nrog txo kom tsis txhob nkim tej zaub mob ntau uas muag tsis tag thiab coj mus siv ua lwm yam. Tab sis yeej tseem tshuav hauj lwm ntau heev yuav tau ua yog tias Australia xav kom ua tau raws li tej hom phiaj tsis txhob nkim zaub mov txog xyoo 2030.''
Tsis tas li ntawd los kuj tau pab kom tej neeg muag zaub mov txuag tau nyiaj ntau ntxiv tuaj uas raws li tau muaj ntawv cej luam qhia ces twb txuag tau txog li ntawm $57 million.
Tsis tas li ntawd los kuj muaj tej tuam txhab ntau yam (Tej neeg cog qoob loo, tej khw muag thiab tej khw siv tej qoob loo ua zaub mov noj) ze txog li 50 lub suav pej kum haiv lub tuam txhab lagluam li Nestle thiab McCain los kuj txuag tau nyiaj $2 million kom tsis txhob tau them se rau tej khoom uas coj mus faus ntawd thiab.
Tsab ntawv cej luam no kuj tau qhia tias ib xyoos twg Australia tau kim tej zaub mov pov tseg txog li 7.6 million tonnes, uas muaj tej zaub mob no txog li 70 feem pua yeej yog tej uas tseem zoo noj.
Txawm li cas los tej kev tsub se rau tej zaub mov uas coj mus pub rau lwm tus tseem xam tib yam li tej khoom seem txeej (waste) uas coj mus pov tseg xwb thiab, ces thiaj ua rau tej lagluam tsis coj lawv tej zaub mov seem coj mus pub rau tej koom haum pab tej neeg txom nyem. Thiab yog kwv yees tias yog coj mus ua cov plua hno noj ces twg ua tau txog li 100 million pluas coj mus pub rau tej neeg txom nyem noj tsis yog yuav coj mus faus pov tseg.
Lub koom haum End Food Waste Australia thiaj hais tias kom tsim ib co cai txo se coj los txhawb nqa tej lagluam li lwm cov teb chaws li Canada, Fabkis thiab Meskas uas txhawb nqa kom tej lagluam coj lawv tej khoom noj seem siv tsis tas ntawd coj mus siv ua lwm yam.
Tsis tas li ntawd los raws li lub koom haum Foodbank hais ces tsaib no ces yeej muaj Australia tej cuab yig ze txog li 3.5 million yim tsis tau zaub mov txaus noj.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
