Raws li tsoom fwv teb chaws ib cov tswv yim tshiab hais ces tej nqe zaub mov ntau yam ntawm tej zos cheeb tsam thiab tej zos yaj sab yuav raug tso nqe muag raws tib tug nqe li tej muag ntawm tej nroog.
Raws li tsoom fwv ib co hauj lwm ntawm nws tej ncauj lug Closing the Gap ib xyoos ib zaug ces yuav nrog xyuas kom neeg txum tim tej zejzog tsuas tau them tib tug nqe rau tej khoom noj 30 yam tseem ceeb li, hmoov txhuv, mis, txhuv, cereal, nqaij ntim thawv hlau, txiv xyoob txiv ntoo tshiab, tej khoom siv rau tsev plob, tej khoom siv rau poj niam, me nyuam tej mis noj ces tsuas muag tib tug nqe xwb.
Tsab cai no yuav xyuas kom tej nqe khoom li hais no ntawm tej khw ntau dua 76 lub ntawm tej zos toj siab muag tib tug nqe li muag rau tej neeg nyob hauv nroog them xwb.
Malarndirri McCarthy uas yog tus nom tswj dej num pab rau Australia tej neeg txum tim tau hais tias tsuas yog ib cov tswv yim daws ntau yam nuj nqes siv ua lub neej pab rau tej neeg Australia nyob tej zos toj siab xwb.
Tsis tas li ntawd los tsab cai no kuj yuav pab daws ntau yam xwm txheej mob nkeeg ntawm ib txhia zejzog thiab.
McCarthy tau qhia rau xov tooj cua ABC hnub zwj Hli (Monday) tias: "Peb tab tom txheeb qhov tseeb txog tias vim li cas tej zejzog no thiaj mob raug, mob npaws rheumatic fever thiab mob ntshav qab zib ntau heev,''
''Peb xav pom kom muag tej zaub mov zoo uas yuav pab tau kom tej neeg tau noj tej zaub mov muaj txiaj ntsim uas tau txais kev noj qab nyob zoo tiag,''
''Tseem tshuav ntev heev peb thiaj mam ua tau li tej hais no ... yog hais txog cov kev los pab kom neeg txum tim tau txais kev noj qab nyob zoo.''
Nws tau hais tias muaj ntau yam ua rau tej nqe khoom kim ntxiv, li tej huab cua phem ua rau muaj kev tu ncua siv tsis tau tej kev, los yog yuav tau mus deb.
Tsaib no ces lub koom haum Choice txheeb tau tias tej neeg ntawm lub xeev Western Australia tkim dua tej lwm lub xeev them.
Tsoom fwv xeev Northern Territory cov kev cej luam tshiab 2023 txog tej nqe khoom noj yeej qhia tias tus nqe nrab yuav ib pob tawb khoom noj yeej kim dua txog 26% ntawm tej khw muag khoom zos toj siab.
Thiab ib pob tawb khoom noj uas tau txais txiaj ntsim pab kom yus tau txais kev noj qab nyob zoo raws li tsoom fwv cov kev taw qhia ces yeej kim dua 40% ntawm tej khw muag khoom me piv rau tej yuav ntawm tej supermarkets.
Tsuas muaj peev xwm ua tau 5 co hauj lwm raws li tej hom phiaj ntawm tej hauj lwm Closing the Gap
Tsab cai no yog ib tsab ntawm ntau tsab uas teev txog thawj pwm tsav Anthony Albanese tej ncauj lug 2025 Closing the Gap ntawm tsev tsoom fwv hnub zwj Hli (Monday).
Thiab pom tias muaj peev xwm ua tau 11 co hom phiaj ntawm 19 cov zoo tuaj ntxiv uas tau teev tseg, tab sis tsuas muaj 5 co hauj lwm thiaj ua tau raws tej hom phiaj xwb.
Nws tau hais tias ''Hnub no ces peb paub tias cov hauj lwm twg ua tsis tau thiab peb yuav txheeb tias yuav kawm tau dab tsi,''
''Cov kev muaj peev xwm los ua tau tej hauj lwm Close the Gap tiav ces yeej nyob ntawm peb thiab peb haiv neeg cov kev muaj peev xwm nrog xyuas. Kom txhua tus neeg Australia muaj cib fim ua tau lub neej tib yam.''
Thawj pwm tsav Anthony Albanese qhiv txog tej ncau lug txog cov hauj lwm 2025 Closing the Gap ntawm tsev tsoom fwv ntawm tuam ceeb Canberra hnub zwj Hli (Monday). Source: AAP / Lukas Coch
Thiab neeg txum tim lub koom haum Indigenous Business Australia lub koom haum Home Loan Capital Fund yuav tau nyiaj pab kom muaj cib fim ntau tuaj ntxiv rau neeg txum tim uas xav yuav tsev rau lawv nyob thiab pab kom lawv muaj kev nplua nuj rau ntau phaum neeg sib txawv ntawm lawv tej cuab yig.
Tsis tas li ntawd los kuj yuav muab 150 co psychology scholarships rau Australia tej tub kawm neeg txum tim kom muaj peev xwm los tsim tau cov kev pab cuam daws kev nyuaj siab ntxhov plawv siv ntau tuaj ntxiv haum raws li lawv tej kab lis kev cai.
Tsis tas li ntawd los kuj yuav tsim ib cov chaw ntxhua thiab ziab khaub ncaws kom qhuav rau tej neeg siv los yog kho tej muaj ntawm 12 thawj chaw toj siab kom tej neeg zejzog tau txais kev noj qab nyob zoo tuaj ntxiv.
'Xav tau cov kev pauv hloov tseeb tiag, thiab siv tau ntev'
Pat Turner uas yog tus coj ntawm neeg txum tim ib lub koom haum koom tswj tau hais tias ntshe yuav siv caij nyoog mas thiaj tsim tau cov kev pauv hllov zoo.
Nws tau hais tias "Cov hauj lwm daws tej teeb meem kom tsis txhob muaj kev sib tu ncua ntawm neeg txum tim thiab tej neeg Australia uas tsis yog neej txum tim (Closing the Gap) tsis yog ib co cai xwb, tab sis yog ib co hom phiaj uas yeej txhob txwm xyuas kom pab tau peb tej neeg thiab ntau phaum neeg txuas ntxiv ua tau lub zoo neej tshaj qub ntxiv,''
"Peb yuav xyuas kom tsoom fwv los yog peb yuav tsum kub siab txog tej dej num no txog ntua rau thaum peb ua tiav thiab yog ib co kev pauv hloov siv tau zoo tiag.''
Labor tau qhia hnub zwj Kuab (Friday) dhau los tias yuav siv nyiaj ntau dua $800 million pab cov hauj lwm Northern Territory Remote Aboriginal Investment.
Thiab yuav siv tej nyiaj no mus tsim ntau cov kev pab cuam li tswj kev ruaj ntseg, poj niam cov kev nyab xeeb, kev kawm thiab txo tej kev phom sij cuam tshuam txog dej cawv.
Kerrynne Liddle uas yog tus nom tswj cov dej num noj qab haus huv rau neeg txum tim ntawm lwm pab nom teb chaws tau qhia tias yeej tsis ceeb dab tsi uas tsis muaj peev xwm ua kom tau tej hom phiaj ntawm cov hauj lwm Closing the Gap tiav.
Nws tau qhia rau lub chaw nthuav xov xwm ABC News thaum sawv ntxov hnub zwj Hli (Monday) tias "Thawj pwm tsav yeej tau qhia limtiam dhau los tias peb yuav tsis muaj peev xwm ua tau tej hauj lwm no qee yam ntawm tsab ntawv cej luam Closing the Gap kom zoo tshaj qub ntxiv,''
"Yeej muaj ntau yam, li cov cashless debit card, cov kev txwv tsis pub yuav dej cawv haus ntawm xeev Northern Territory thiab tej xwm txheej uas tej neeg yeej los ua ntau yam kom tswj tau tej nuj nqes siv ua lub neej uas kim tuaj no.''
Liddle tau hais tias tej nqe khoom noj khoom haus ntawm tej zos toj siab mas ''kim tiag tiag'' li, tab sis nws kuj tsis qhia tias seb pab nom koom tswj (Coalition) puas yuav txhawb nqa ib tsab cai muaj ntsis sib xws li cov tsoom fwv tsab cai los tswj kom tsuas them tus nqe tib yam rau tej khoom no ntawm nroog thiab toj siab xwb.
SBS tau koom nrog Australian Associated Press (AAP) tshaj zaj xov xwm no.
Listen to on Thursday at 6 pm and on Sunday at 11 am, or follow us on , , and . Downloadand or follow us on or other third party podcast platforms
