Raws li lub rooj sab laj ASEAN-Australia 50 special summit uas tau pib txij hnub tim 4-6 lub 3 hlis ntuj xyoo 2024 ces Australia yeej tau hais tias yuav xyuas kom muaj visa ntau yam suav tej agriculture visas rau tej teb chaws ASEAN tau siv. Tab sis tom qab tau qhia txog tej xov xwm no thaum ntxov lub 3 hlis ntuj xyoo 2024 lawm, ces kuj tau muaj tej tub koom siab ntawm tej zejzog Southeast Asia (Thaib, Nplog...,) pheej nug tias puas muaj tej program uas yuav thov tau tej visa no rau tej neeg ntawm tej teb chaws no siv. Tab sis txhij thaum ntawd los ces kuj tseem tsis tau paub meej tseeb tias seb puas tau tsim tej visa li Australia tau qhia ntawd siv li cas.
Raws li SBS Thaib tau nrog Mr Phaphit Rachakitprakarn uas yog Thaib tus nom tswj dej num dag zog tham, ces nws yeej tau hais tias ''tam sim no Australia yeej tsis muaj tej agriculture visa - visa ua teb - rau pej xeem Thaib tuaj ua hauj lwm ntawm teb chaws Australia no.''
Thiab raws li tej xov xwm uas lub tuam chav Department of Prime Minister office tau qhia ntawd ces Australia thiab Cob tsib (Nyab Laj - Vietnam) yeej tsim cov kev koom tes theem siab Comprehensive Strategic Partnership (CSP) uas yuav koom tes theem siab ntau yam suav cov kev koom tes rau tej hauj lwm qoob loo li ''yuav npaj 1,000 tus neeg Cob tsib ntawm teb chaws Nyab laj tuaj ua hauj lwm liaj teb ntawm Australia tej zos cheeb tsam tuaj ntug nroog los yog tej zos yaj sab xyoo 2024,'' uas lub tuam chav Department of Foreign Affairs and Trade (DFAT) yeej tau qhia meej txog tej hauj lwm no.
Raws li Cob Tsib lub embassy ntawm Canberra tej ncauj lug uas tau qhia rau SBS Hmoob (28.06.2024) ces nws hais tias ''Tej tuam chav uas muaj feem xyuam txog tej hauj lwm no tseem tab tom sab laj thiab tab tom npaj yuav los tswj tej hauj lwm no, thiab mam li coj tej xov xwm txog tej hauj lwm no coj los qhia rau zej tsoom paub raws li lub caij tsim nyog. Tsis tas li ntawd los peb kuj tseem tab tom los txheeb xyuas lwm cov kev koom tes raws li cov kev pom zoo CSP ntawm teb chaws Cob Tsib thiab Australia.''
Lub tuam chav Department of Home Affairs yeej tau hais tias tsoom fwv teb chaws Australia tau tsim Australia cov Agriculture Visa siv rau yav lig xyoo 2021 vim muaj neeg tsis txaus los ua tej hauj lwm ua liaj ua teb sau qoob loo, uas lub tuam chav DAFT ua tus saib xyuas tej hauj lwm no. Txawm li cas los ''tsis muaj tej Agriculture Visa no siv ntxiv tam li yog ib co visa lawm.''
Tab sis tam sim no tsoom fwv Australia yeej tseem muaj cov kev txhawb nqa kom nrhiav neeg ntawm cov teb chaws pov txwv Pacific tuaj ua hauj lwm pab ntxiv raws cov hauj lwm Pacific Australia Mobility (PALM) scheme.
Txuas ntxiv ntawd los kuj tseem muaj ob hom Working Holiday Makers (WHMs) uas yog hom subclass 417 thiab 462 uas tej neeg tuaj ncig teb chaws muaj cai ua hauj lwm sau qoob loo uas muaj peev xwm nyob ntawm Australia tau 12 hlis (1 xyoos) thiab muaj peev xwm thov tau tej visa no siv txog 3 zaug.
Txawm li cas los kuj tsis muaj xov xwm dab tsi ntawm nom tswv Australia thiab nom tswv Nplog tham txog tias seb puas muaj Australia tej Agriculture Visa rau neeg Nplog siv li cas ntawm teb chaws Australia li.
SBS Hmoob tau sau ntawv nug Australia tus nom tswj dej num ntiav dag zog Tony Burke lub chaw ua hauj lwm, Australia lub Embassy ntawm Nplog teb tab sis lawv kuj tsis tawm tswv yim dab tsi txog tej no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
