Kab lis kev cai yeej yog ib cov sib chab sib chaw heev, yog li thaum koj nrog ib tug neeg uas coj kev cai dab qhua txawv koj tham ces thiaj muaj tej yam laj thawj (reasons) uas tej zaum koj ua yuam kev thiab zoo li ua saib tsis taus los yog ua rau tus neeg nrog koj tham ntawd tus siab tau.
Tej zaum yuav muaj tau tej xwm txheej zoo li hais los saum toj no tshwm sim tau thaum koj nrog Australia ib tug neeg keeb cag neeg twg tham, vim yeej tseem muaj neeg totaub yuam kev ntau yam los yog muaj cov kev ntseeg tsis muaj tseeb thiab tseem ntaus nqe yuam kev rau Australia tej keeb cag neeg tej kab lis kev cai uas yog tej yam txaus tus siab heev uas tseem pom muaj tshwm sim tsis tu ncua hauv teb chaws Australia no.
Danny Teece-Johnson, yog SBS ib tug neeg ua hauj lwm tswj SBS cov program NITV thiab yog Australia cov keeb cag neeg Gomeroi nation. Nws yeej tau pom kiag tej yam ua thuam thiab saib tsis taus thiab tseem muaj cov kev totaub yuam kev rau Australia tej keeb cag neeg ntawm thiab lawv tej kab li kev cai ntawm lub teb chaws Australia no.
Ntawm nod yog 5 yam uas tsim nyog peb yuav tau lug hla tsis txhob ua los yog txhob tham txog thaum nrog ib tug neeg Aboriginal tham:
1. Tis npe tsis zoo rau lawv (Offensive names)
Feem ntau ces yeej muaj neeg paub Australia cov keeb cag neeg los sis cov neeg txum tim uas xub nyob rau lub teb chaws Australia no tias yog cov neeg 'Aboriginal' los yog 'Indigenous people' uas cov keeb cag neeg no yeej lees paub thiab siv tau thaum tham txog ib tug neeg keeb cag neeg twg.
Txawm li cas los tseem muaj ib txhia tsis paub thiab tseem muab lo lus 'Aboriginal' hais luv luv los ua lo 'Abo' no thiab mas haj yaj yog ib cov kev thuam saib tsis tau Australia tej keeb cag neeg no vim tau muaj kev siv tej lus no rau keeb kwm yav dhau los thiab pom tau tias yog tej yam lus tsis cam hwm Australia cov neeg txum tim no tib yam li lwm lo lus 'Koon' los sis 'Boong' no ces tsis txhob siv zoo dua.
Tab sis xav kom koj nug koj tus phooj ywg keeb cag neeg ntawd seb ho yuav tsim nyog siv cov lus zoo li cas hu lawv raws lawv tsav los sis yog lawv pawg neeg kom tej lus no txhob ras los ua ib cov kev tsis fim tsis cam hwm lawv. Yog li Danny thiaj xav kom yuav tsum nug seb tsav neeg txum tim ntawv yog tsav neeg dab tsi ces hu lawv raws li lawv tsav neeg ntawd xwb, 'vim tsis yog txhua tus keeb cag neeg yuav yog ib tsav neeg zoo tib yam nkaus xwb'.
Danny hais tias "Peb yeej muaj ntau haiv neeg uas nyias muaj nyias kab lis kev cai thiab lus sib txawv, thiab yeej muaj ntau haiv neeg no tau ploj tag los twb vim yog muaj cov kev tuaj txeeb thiab nam nias peb nrim teb nrim chaw (Colonisation). Thaum xub mas peb yeej muaj tej lus txog li 700 hom diam tab sis tsuas tshuav txog li 250 hom lawm xwb."
2. Yog piv koj ua feem pua ne koj xav tias koj yog cov neeg Aboriginal tseem npaum li cas? ('What percentage Aboriginal are you?')
Lo lus nug no yog ib lo lus uas thuam thiab saib tsis taus ib tug neeg Indigenous tshaj plaws vim tseem nug tias nws yog cov neeg keeb cag neeg tseem npaum li cas thiab?
Danny hais tias “Txawm koj yog 16% los yog cov keeb cag neeg 100% los tsis tseem ceeb dab tsi, qhov tseem ceeb ces yog seb yus puas muaj kev sib raug zoo nrog lub teb chaws thiab yus lub zejzog uas yog yus ib lub cim thawj ntawd xwb txawm yus yuav zoo li cas los tsis tseem ceeb."
Yog li ntawd yog koj xav fim hwm thiab cam hwm los yog totaub kom zoo txog Australia cov keeb cag neeg Aboriginal tej kab lis kev cai ces tsis xav kom koj nug tej lus nug li tau hais los ntawd.
Gubbi Gubbi Traditional Owners. Source: Katie Bennett - Embellysh Photography
3. Cov neeg Aboriginals ces tau tsev nyob dawb xwb ('Aboriginals get free houses')
Txawm tias tsoom hwv Australia yeej muaj ib cov vaj tse coj los pab rau Australia cov keeb cag neeg Aboriginal tej neeg zejzog ib yam twg lawm los yeej tsis yog tias tsoom hwv Australia yuav pub tsev rau txhua txhua tus neeg Aboriginal nyob dawb yam tsis them dab tsi li.
Vim yeej muaj Australia tej keeb cag neeg ua neej txom nyem heev rau ntau cov zejzog thiab tsuas tau txais kev pab cuam me ntsis los ntawm tsoom hwv xwb ces thiaj ua rau lawv tseem ntsib teeb meem ntau yam.
Yog li thiaj tseem muaj teeb meem cuam tshuam rau ib tug keeb cag neeg lub neej ntawm ntau cov zejzog ntawd. Tsis hais cov ua neej li teb li chaw uas nyob hauv nroog lok kiag los yog tseem muaj neeg hais rau lawv thiab tias 'Twb yog tim koj yog Australia cov keeb cag neeg es koj thiaj tau ntau yam khoom pub dawb xwb' no mas yog ib cov kev txhob txwm hais saib tsis tau Australia cov keeb cag neeg. Tej no tsuas yog haj yam thuam thiab saib tsis tau ntxiv rau tej neeg no txoj kev txom nyem thiab txoj kev raug tsub muaj tsim txom raws li tau tshwm sim muaj rau keeb kwm dhau los thiab.
Danny Teece-Johnson, NITV journalist from the Gomeroi nation. Source: SBS
4. Tsis lees paub txog Australia cov keeb cag neeg (Lack of acknowledgement)
Tej zaum koj yeej tau mus koom ib lub koom txoos dab tsi dhau los uas ua ntej yuav qhib lubkoom txoos ntawd, ces koj yej pom tias muaj Australia ib cov kev cai ntawm tej keeb cag neeg tos txais lwm tsav neeg tuaj rau lub teb chaws no thiab lees paub txog lub teb chaws Australia no tias yog Australia cov keeb cag neeg li.
Yog li Danny thiaj hais tias "Txhua tus neeg uas paub txog Australia cov keeb cag neeg Aboriginal tej kab li kev cai yeej paub tias peb muaj kev sib cuam tshuam txog peb lub teb chaws no. Yog li yog tias tsis muaj kev lees paub tias peb cov neeg yog tus tim tswv teb chaws ntawm lub teb chaws no ces zoo tib yam nkaus li txhob txwm tsis lees paub tias muaj peb ntawm lub teb chaws no li."
Yog li thaum koj tau los npaj ib lub koom txoos dab tsi, thiaj tsim nyog koj yuav tau nco hais lus lees paub thiab teev txog tias yeej muaj Australia cov keeb neeg no tau ua tswv nyob ntawm lub teb chaws no los tau ntau txheeb xyoo lawm coj los ua ib cov kev cam hwm rau lawv. Thiab yog tias koj ua lub koom txoos loj ces xav kom koj npaj Australia cov keeb cag neeg no tuaj ua lawv tej kab lis kev cai rau thaum qhib yuav zoo dua.
Members of the Gumatj caln perform bunggul (ceremonial dancing) at the Garma Festival in northeast Arnhem Land. Source: Yothu Yindi Foundation / Melanie Faith Dove
5. Txhob hais lus sawv cev rau Australia cov keeb cag neeg (People speaking on behalf of Aboriginal people)
Tej zaum qhov meem txhom tshaj plaws mas yog tej xwm txheej uas pheej muaj neeg los tham txog Australia cov keeb cag neeg Aborignal tab sis tsis muaj cov neeg no ib tug los hais ib lo lus li.
Danny hais tias “Feem ntau mas peb yeej pom tias pheej muaj tej chaw nthuav xov xwm uas tsis yog Australia cov keeb cag neeg los tham txog peb tej neeg tej teeb meem yam tsis nrhiav peb ib tug neeg uas paub zoo txog peb tej teeb meem los koom tham li. Tej no thiaj ua rau muaj kev phoj sij hoj heev rau Australia tej keeb cag neeg vim tej lus hais yuam kev ntawd yuav ua rau muaj kev faib cai, thuam saib tsis taus, ntau nqe yuam kev thiab muab peb cov keeb cag neeg thiab peb tej kab lis kev cai saib mus rau kis tsis zoo uas tsis qhia txog peb tiag tiag ntawd."
Yog li 5 nqe lus hais los no thiaj yog ib cov kev taw qhia rau koj. Tsis hais thaum twg uas koj siv thiab sau lo lus Aboriginal no ces xav kom koj xub xub sau tus niam ntawv A loj thiab thaum thaum koj nyeem los lus Indigenous los los xav kom koj nyeem tus niam ntawv I ua tus niam ntawv loj. Tsis tas li no los xav kom koj siv thawj tus ntawv uas hu Australia ntau tsav neeg raws lawv pawg neeg ntawd ua tus niam ntawv loj thiab piv txwv li Gomeroi uas siv tus niam ntawv G loj ntawd thiab siv tib yam li no rau Australia lwm pawg keeb cag neeg coj los ua ib cov kev cam hwm rau lawv.
Celeste Liddle addressing the massive crowd at the Melbourne march. Source: NITV News – Kris Flanders
