Australia lub txhab nyiaj faj seeb haiv (Reserve Bank of Australia - RBA) tau txo kab theem paj thawj zaug rau lub caij 5 xyoos los no, ces thiaj ua rau tej txhab nyiaj yuav txo lawv tej kab theem paj kom qes zog thiab.
Ib tug neeg uas qeev nyiaj txog li $600,000 yuav txuag tau nyiaj txog li $92 rau tej nyiaj them ib hli twg.
Ua ke no los Australia 4 lub txhab nyiaj loj los kuj tseem yuav txo lawv tej kab theem paj thiab.
Yuav txo npaum li cas?
Thaum txo kab theem paj ces RBA yeej ib txwm txo 0.25% xwb. (Txog ntawm 4.35% mus ua 4.10%).
Ces thiaj kwv yees tias yuav ua rau ntau lub txhab nyiaj yuav txo lawv cov kab theem paj.
Lub txhab nyiaj Commonwealth Bank (CBA) thiab Westpac cov kab theem paj yuav nqe ua 3.35% lub 12 hlis ntuj. ANZ kwv yees tias yuav nqes ua 3.85% lub 8 hli ntuj, thiab NAB ntseeg tias yuav yog 3.10% lub 2 hlis ntuj xyoo 2026.
Tej txhab nyiaj puas yuav txo cov kab theem paj no rau tej customers?
Sally Tindall uas yog tus coj uas tswj tej xov xwm ntawm lub koom haum Canstar uas sib piv cov kev siv nyiaj tau qhia rau SBS News tias cov kev txo kab theem paj yog tej yam zoo qhia tias kom yus txheeb nrog yus lub txhab nyiaj thiab nug tias seb lawv puas txo paj kom tsawg rau yus thiab.
Nws tau hais tias "Lub caij txo kab theem paj yog ib lub caij zoo heev rau yus txheeb tej paj them rau tej nyiaj qev yuav tsev, nug yus lub txhab nyiaj seb lawv puas txo cov kab theem paj variable rate rau yus.''
Thiab txawm tias xyov tej zaum tej txhab nyiaj puas kam txo kab theem paj rau yus los, Tindall yeej tau kwv yees tias yog tej yam zoo rau tej nyiaj qeev yuav tsev.
Nws tau hais tias "Peb cia siab tias tej txhab nyiaj yam tsawg yuav tsum txo kab theem paj kom txwm rau lawv cov variable rate, uas lawv yeej ib txwm txo rau lub sij hawm li ntawm 10 txog 14 hnub tom qab RBA tau txo.''
Yuav muaj teeb meem rau koj cov fixed mortgage
Tindall tau hais tias yog koj pom zoo them rau ib tug kab theem paj xwm yeem (Fixed-rate mortgage) "ces koj yuav tau them li ntawd", tab sis yeej tseem muaj ntau txoj xub ke rau koj thiab.
"Yog tias txhab nyiaj ua luam poob peev vim yus yuam cov fixed rate contract lawm, ces lawv muaj peev xwm tsub nqe rau yus them vim daim fixed rate contract ntawm yus thiab lub txhab nyiaj ntawd yeej qhia tias yus yuav tau them raws tus kab theem paj li cas rau ib lub caij twg lawm,''
"Yog tias yus tsis tsis nyiam tus kab theem paj uas yus tau pom zoo them xwm yeem lawm, ces yuav tau tham nrog yus lub txhab nyiaj kom nkag siab tias seb yus puas tau them dab tsi yog yus yuam cov fixed rate contract,''
"Yog tias yus yuav tau them, ces yuav tau them li cas, thiab seb lub txhab nyiaj puas kam nrog yus sib khom thiab zam ib yam nqe dab tsi rau yus yog yus yuam cai lawm.''
Puas tsim nyog yus hloov mus them kom tsawg zog?
Tej zaum tej txhab nyiaj kuj yuav pub tej neeg qev nyiaj yuav tsev hloov mus them tej nqe qev nyiaj yuav tsev kom ib nyuag tsawg zog thiab, uas tej zaum yuav pab txuag tau nyiaj rau yus ib ntus luv luv, tab sis tej zaum kuj yuav tsis yog tej yam tau txais txiaj ntsim zoo tshaj plaws rau yus.
Graham Cooke uas yog tus coj teeb txheeb txog tej neeg yuav khoom siv ntawm lub tuam txhab Finder tau tshab txhais ces cov kev them kom ntau dua tam sim no yuav pab kom yus tiv nuj nqe tsawg dua ntev ntxiv tuaj.
Nws thiaj tau qhia rau SBS News tias "Kuv cov kev taw qhia tseem ceeb ces xav kom tsis txhob rawm maj cia li hloov mus them kom tsawg zog kiag.''
"Yog tias yus tseem muaj peev xwm them, ces kav tsij them kom ntau zog. Them kom ntau zog thaum txo kab theem paj ib zaug twg yuav pab kom yus tau them tsawg dua li ib lub xyoo ntawm 30 xyoo uas yuav tau them ntawd.''
Ho yuav sib khom nrog yus lub txhab nyiaj li cas?
Cooke tau qhia tias kom mus nrhiav lwm lub txhab nyiaj seb lawv muab tus kab theem paj zoo tshaj plaws li cas rau yus, uas tej zaum yuav zoo dua tus kab theem paj yus them ntawm yus lub txhab nyiaj tam sim no. Nws tau hais tias:
"Yeej muaj kev pauv hloov tas mus li rau tej txhab nyiaj uas kom yus them cov kab theem paj qes tshaj plaws thiab. Yog li cov kev paub txog tias tus kab theem paj zoo tshaj plaws yog li cas thiab txaus siab hloov yoog raws yeej ib txwm yuav pab kom yus tau txais txiaj ntsim zoo tshaj plaws,''
"Cov kev hu xov tooj nrog lawv tham tias 'kuv yeej muaj lwm txoj xub kev rau kuv tig mus siv lwm lub txhab nyiaj uas tau them tsawg dua 1%' yeej ib txwm yuam kom yus lub txhab nyiaj txheeb seb pus txo li cas rau yus. Yog tias lawv tsis kub siab ces tsim nyog yus hloov mus siv dua lwm lub txhab nyiaj. Vim tej kiab khw lagluam tiam vam meej no ces cov kev ua siab dawb siab ncaj rau ib lub txhab nyiaj twg yeej pab tsis tau yus dab tsi.''
Tej neeg ntiav tsev puas muaj peev xwm hais kom txo nqe ntiav tsev?
Tej neeg ntiav tsev yuav poob rau tej xwm txheej ''ib nyuag nyuaj zog'' thaum sib khom nqe ntiav, tab sis Cooke tau hais tias tej zaum lawv kuj yuav kam txo nqe ntiav tsev raws li tus nqe ntiav ntawm tej kiab khw lagluam thiab.
Nws tau hais tias ''Yog tej yam tsis muaj hmoo uas txawm txo kab theem paj los tsis yog tej yam uas tej tswv tsev thiab tej neeg muag/ntiav tsev yuav kam txo nqe ntiav tsev,''
"Tab sis dua ntawm tej hais no, ces yus yuav tau kub siab txheeb seb tej nqe ntiav tsev ib puag ncig yus, los yog tej tsev sib xws li yus ntiav nyob puas txo lawv tej nqe ntiav tsev thiab.
"Coj tej xov xwm uas yus txheeb tau no mus sab laj nrog yus tus tswv tsev tam li yog ib co pov thawj tias yus them kim dhau heev lawm thiab yuav tsis muaj lwm tus neeg kam them tus nqe yus them no.''
Leo Patterson Ross uas yog tus coj lub koom haum sawv cev rau tej neeg ntiav tsev nyob ntawm NSW tau hais tias tej neeg ntiav tsev nyob yuav tau tos ib ntus ua ntej uas lawv yuav tau txais txiaj ntsim los ntawm cov kev txo se no.
Nws tau hais tias "Raws li ib txwm pom ces tus nqe ntiav tsuas pheej yig xwb thaum uas ib tug neeg ntiav tsev tawm tsis ntiav lawm, tsuas yog tias ntshe tus neeg ntiav tsev ntawd ho ras txog tias, tej zaum lawv muaj peev xwm yuav nrhiav tau tus nqe ntiav pheej yig dua lwm qhov xwb, los yog tawm tsis ntiav nyob ntxiv lawm xwb los yog sim sib khom kom tau tus nqe ntiav tsev pheej yig zog xwb,''
"Thiab xav kom peb ras txog tias muaj tej tswv tsev txhua txhua ib tug ntawm plaub tug twg yeej tsis muaj tej nuj nqe qev nyiaj los yuav tsev uas yuav tau them rov qab li lawm, ces tej kev txo kab theem paj thiaj tsis muaj feem dab tsi rau lawv li.''
Tej xov xwm ntawm zaj xov xwm no tsuas yog coj los qhia ua kev paub xwb thiab tsis yog coj los qhia tam li yog ib co kev tawm tswv yim rau nyiaj txiaj. Tsim nyog koj yuav tau sab laj nrog ib tug neeg sab laj tawm tswv yim nyiaj txiaj uas muaj ntaub ntawv zwm raug cai ua tau tej hauj lwm no nrog pab txiav txim siab kom haum raws li qhov koj xav tau.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (,, thiab ).
