Tag nrho Australia 4 lub txhab nyiaj loj tau qhia tias lawv yuav txo cov variable home loan rate 0.25%
RBA thiaj tau txo tus kab theem paj ntawm 4.35% los ua 4.1% raws li tej kiab khw tau kwv yees tseg thiab yog thawj cov kev txo kab theem paj txij xyoo 2020 los no. Michele Bullock uas yog tus coj RBA tau hais tias ''Tsis yog txo tib zaug xwb ces yuav tswj tau tej kab theem paj no lawm, peb tseem yuav tau txheeb ntau yam ntxiv. Yog thaum peb tswj tau nyiaj poob nqe lawm mam txiav txim seb puas yuav txo ntxiv.''
Jim Chalmers uas yog tus nom tswj nyiaj txiaj rau tsoom fwv Albanese tau hais tias ''Yog tej yam zoo rau ntau millions tus neeg Australia thiab tsim nyog txo rau lawv lawm.''
Ces thiaj yuav pab kom tej neeg qev nyiaj txog li $600,000 los yuav tsev yuav txuag tau nyiaj txog li $92 rau tej nqe them tsev uas yuav tau them yam tsawg rau ib lub hlis twg.
Reserve Bank of Australia tau txo kab theem paj thawj zaug txij lub 11 hlis ntuj xyoo 2020. Source: SBS
Thaum twg tej txhab nyiaj mam li txo kab theem paj rau tej neeg qev nyiaj yuav tsev?
ANZ, Commonwealth Bank, NAB, Macquarie, Bankwest, thiab Suncorp yuav txo 0.25% txij hnub tim 28 lub 2 hlis ntuj mus.
Westpac, ING, St George, Bank of Melbourne, thiab BankSA los kuj tau qhia tias yuav txo kab theem paj 0.25% txij hnub tim 4 lub 3 hlis ntuj (2025) mus.
Maile Carnegie ntawm lub txhab nyiaj ANZ tau qhia tias tej customers yeej tsis tshua muaj peev xwm them tej nqe no rau lub caij uas muaj nuj nqes siv ua lub neej ntau yam no kuj zoo siab rau cov kev txo kab theem paj no. Nws tau hais tias:
"Peb yeej paub tias tej kab theem paj tsub rau tej neeg qev nyiaj them yeej tseem kim heev. Txawm peb tej xov xwm tau qhia tias peb tej customers feem ntau yeej muaj peev xwm tswj tau tej xwm txheej no zoo, los yeej muaj ib txhia ntsib teeb meem nyuaj ntau yam. Peb thiaj xav nqua hu kom lawv kub siab kom sai tuaj nrog peb sab laj seb ho muaj tej xub ke twg ntxiv coj los pab rau lawv.''
RBA cov kev txo se no yuav pab kom tej neeg qev nyiaj yuav tsev tus nqe tsev nrab $600,000 txuag tau nyiaj txog li $92 ntawm tej nqe them tsev yam tsawg uas tsim nyog them ntawm ib lub hlis twg. Source: SBS
"Tej txhab nyiaj yeej zoo siab yuav nce lawv tej paj rau tej nyiaj qev yuav tsev ntau tshaj RBA kom nce hais kom nce thaum tsim nyog. Yog li thiaj tsim nyog lawv yuav txo tib yam rau lub caij uas tej kab theem paj raug txo no thiab.''
Diana Mousina uas yog AMP tus chief economist tau hais tias ntshe tseem yuav yog ob peb lub hlis ntxiv mas tej neeg qev nyiaj yuav tsev tam sim no thiaj yuav tau txais txiaj ntsim los ntawm cov kev txo kab theem paj no.
Hos tej neeg qev nyiaj hauj sim tshiab los yuav tsev thiab tsuas khwv tau nyiaj hauj sim xwb ces kuj yuav pab kom lawv muaj peev xwm qev tau ntau me ntsis ntxiv li ntawm 9 los yog 10,000 dollars thiab.
Mousina tau qhia rau ABC News tias "Yog peb xam tej paj uas tau txo rau peb ces tsuas txo txij tim 1 lub 7 hli ntuj tsaib no, thiab cov kab theem nyiaj poob nqe uas tau nqes thiab tej nyiaj hauj lwm uas tau khwv tau ntau tuaj ntxiv no pab kom tej cuab yig txug tau nyiaj txog li ntawm $80 tam sim no lawm yog piv rau ib xyoos dhau los.''
Tej neeg qev nyiaj yuav txuag tau npaum li cas?
Yog tias tej txhab nyiaj txo paj txwm rau tej neeg qev nyiaj yuav tsev txog li $641,416 yuav muaj peev xwm txuag tau tshaj $100 ib hlis twg raws li Finder hais.
Thiab yuav ua rau tej neeg qev nyiaj no tau them tej nqe tsev tsawg zog nqes ntawm $3,887 ib hlis twg los them $3,784 lawm xwb.
Westpac tau qhia tias cov kev txo paj 0.25% yuav pab tej customers txuag tau $90 ib hlis twg los sis yog txuag tau txog li ntawm $1,080 ib xyoos twg raws li cov kev xam paj them rau tej nyiaj qev thiab them tej paj rau tej nyiaj qev yuav tsev $500,000.
Tsim nyog muaj tus zauv dab tsi ua ntej ntawm yus tus kab theem paj?
Graham Cooke uas yog tus coj teeb txheeb txog tej neeg yuav khoom siv ntawm Finder tau hais tias tej neeg uas siv cov viriable loan tsim nyog muaj tus zauv tsib (5) nyob ua ntej ntawm lawv tus kab theem paj. Nws tau qhia rau SBS News tias:
"Yog thaum yus pom tus zauv li ntawd lawm ces yus paub tias yuav tab tom tau txais txiaj ntsim raws li qhov tsim nyog lawm.''
Yog tham txog cov fixed rates (cov kab theem paj uas tau them xwm yeem li qub rau ib lub caij twg), uas nws tau hais tias yog RBA tsis txo kab theem paj ntxiv lawm ces nws hais ntxiv tias:
"Ntshe tseem yuav tau txog 4 mus txog 6 zaug kab theem paj qes dua ntawm tus paj variable rate mas thiaj yuav tsim nyog, mas thiaj yuav tau tus paj qes li ntawm 1 los yog 1.5% qes dua, uas tej zaum ntshe yus yuav tsis tau ntawm tej kiab khw lagluam tam sim no.''
Tsoom fwv Australia ua tib zoo txheeb kom tau tej txiaj ntsim ntau tshaj tej nqe yus them ua ntej yuav refinance, tsam tej zaum thaum yus tam li yog tus neeg qev nyiaj yuav tsev uas hloov ntawd ho muaj lwm yam nqe dab tsi ua yus yuav tau them thiab.
Tej xov xwm ntawm zaj xov xwm no tsuas yog coj los qhia ua kev paub xwb thiab tsis yog coj los qhia tam li yog ib co kev tawm tswv yim rau nyiaj txiaj. Tsim nyog koj yuav tau sab laj nrog ib tug neeg sab laj tawm tswv yim nyiaj txiaj uas muaj ntaub ntawv zwm raug cai ua tau tej hauj lwm no nrog pab txiav txim siab kom haum raws li qhov koj xav tau.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (,, thiab ).
