Cov ntsiab lus tseem ceeb:
- Tej neeg muaj cai thov xeem ua pej xeem yuav tsum nyob kom txwm cov sib hawm uas nom tswv Australia tau teev tseg.
- Yuav tsum teb kom tau tej lus nug thaum mus tshau txuj rau lub caij thov ua pej xeem kom tau cov txog 75% mas thiaj tau thov ua tau pej xeem Australia.
- Lub caij tseem muaj kab mob COVID-19 sib kis thoob ntuj no ces tsuas kom tej neeg sawv daws mus tshaj tej txuj seb puas ras tau los ua pej xeem Australia hauv online lawm xwb.
Cov neeg nyob ruaj ntawm teb chaws Australia (Permanent Residency)
Koj yuav tsum yog ib tug neeg tsiv teb tsaws chaw uas yeej tau nyob ruaj thiab nyob txwm raws li cov sij hawm nom tswv Australia tau teev tseg lawm mas koj thiaj muaj cai mus thov tshau txuj xeb puas ras los ua tau pej xeem Australia.
Koj yuav tsum yog ib tug neeg uas twb nyob ruaj ntawm teb chaws Australia no ua ntej tso mas thiaj thiaj muaj peev xwm ras los ua tau ib tug pej xeem.
Ruby Fowdar yog ib tug neeg paub khiav tej ntaub ntawv rau tej neeg tsiv teb tsaws chaw (Migrant agent) ntawm lub koom haum Australian Immigration Agency ntawm nroog Brisbane.
Nws hais tias thaum tej neeg tsiv teb tsaws chaw yog cov neeg tau nyob ntawm teb chaws Australia no tau txwm 4 xyoos lawm xwb thiab lawv tau nyob ruaj txwm ib lub xyoos lawm; mas lawv thiaj muaj cai mus thov tshau txuj seb puas ras los uas pej xeem tau.
Ms Fowdar kuj tseem qhia ntxiv tias txawm tias koj thov tau tej visa sib txawv li visa tub kawm, visa ua hauj lwm tuaj rau teb chaws Australia los yeej tsis xam tias koj yog cov neeg thov tau cov visa tuaj nyob tau ruaj (Permanent residency visa).
New Australians are singing Australian national entham - The Advance Australian Fair - Wenall Teodoro - Getty Images Source: Getty Images
Cov kev xa ntaub ntawv mus thov xeem ua pej xeem Australia (Applying for citizenship)
Lub tuam chav Department of Home Affairs yeej xav kom tej neeg mus sau tej ntaub ntawv xa rau nom tswv hauv online seb puas muaj cai thov los tshau seb puas ras tau los ua pej xeem Australia, vim rau qhov yuav pab kom xa tau tej ntaub ntawv rau nom tswv thiab lawv txheeb tau sai dua.
Tam sim no ces lub tuam chav nom yeej tab tom txais tej ntaub ntawv thov xeem ua pej xeem Australia (Australian Citicizenship applications) no thiab yeej tau tab tom los txheeb tag nrho tej ntaub ntawv uas sawv daws xa rau nom tswv lawm.
Tab sis vim muaj tus kab mob COVID-19 sib kis thoob ntuj lawm, ces nom tswv thiaj muab cov kev nrog ib tug neeg twg tham thiab cov kev tshaj txuj uas yuav tau teb ib cov sob lus nug ntawd ncua ib ntus lawm, thiab mam li rov qab los ua tej hauj lwm no txuas ntxiv rau lub caij lawv pom tias tau txais kev nyab xeeb lawm.
Cov kev mus xeem ua pej xeem (The Citizenship Test)
Txhua tus neeg uas xav ras los ua pej xeem Australia yuav tsum mus xeem kom tau thiab teb tej lus nug rau lub caij lawv mus xeem coj los qhia rau nom tswv paub tias yus totaub txog yus txoj cai thiab lub luag hauj lwm tam li yog ib tug pej xeem Australia npaum li cas tso.
Thaum mus xeem ntawd yuav tau teb 20 nqe lus nug uas koj yuav tsum uas muaj ntau nqe lus teb rau ib sob lus nug twg uas nug raws li phau ntawv uas nom tswv coj mus tso hauv online rau sawv daws raub tau los saib los nyeem ntawd.
Raws li Damien Kilner uas yog ib tug neeg ua hauj lwm ntawm lub tuam chav Department of Home Affairs uas lis tej dej num txog cov cuab yig thiab kev thov xeem ua pej xeem (Family and Citizenship Programme) tau qhia, ces tej lus nug coj los xeem koj ntawd yeej nug tsis nyuaj thiab tsuas siv sij hawm li ntawm 30 ntiag tiv (minutes) xwb ces xeem tiav lawm.
Nom tswv yeej vam thiab cia siab tias tej neeg sawv daws yuav nyeem phau ntawv tau hais los saum toj no coj los npaj lawv tus kheej ua ntej lawv yuav mus xeem kom thiaj tso siab tias yuav pab lawv xeem tau.
Tab sis tus neeg ntawd yuav tsum xeem kom tau cov zauv ntawm 20 nqe lus ntawd kom txog li 75% los yog siab tshaj ntawd mas thiaj xeem tau los ua pej xeem Australia.
Thiab txawm tias tus neeg ntawd xeem poob los yog xeem tsis tau lawm, los lawv yeej muaj peev xwm rov qab xeem dua rau tib hnub ntawd kiag los kuj tau, los sis ho teem dua caij tshiab rov qab mus xeem dua rau hnub tshiab los tau tib yam. Nom tswv yeej tsis hais kom koj rov qab them dua cov nqe xeem tshiab es mam li tau xeem dab tsi li.
William West - AFP - Getty Images Source: Getty Images
Cov kev ua kev zoo siab thaum koj xeem los ua pej xeem (The Citizenship Ceremony)
Thaum uas nom tswv Australia pom tau tias koj xeem tau thiab lees paub thiab tso cai rau koj ras los ua tau pej xeem Australia lawm, ces koj yuav tsum tau mus koom lub koom txoos ua kev zoo siab rau koj cov kev ras los ua pej xeem Australia tshiab thiab koj yuav tau cog lus tias koj kam lees los ua ib tug pej xeem rau lub teb chaws Australia.
Tab sis yuav siv sij hawm ntev txog li 3 mus txog 6 lub hli mas yog koj xeem tau lawm, nom tswv mam li sau ntawv tuaj caw koj mus koom lub koom txoos no, thiab nom tswv yeej pub lub sij hawm 1 xyoos rau koj mus koom tej koom txoos Citizenship Ceremony no thaum twg los tau thiab yuav tau cog lus lees los ua ib tug pej xeem rau lub teb chaws no.
Txawm tias lub caij no tseem muaj tus kab mob COVID-19 sib kis thoob ntuj los nom tswv yeej tseem pub pub tej neeg mus thov xeem ua pej xeem ua pej xeem thiab yeej tsis tau muab ncua li.
Thiab tej nom tswv zos tsuas siv sij hawm li 1 los yog 2 teev los ua tej koom txoos zoo siab tos txais cov neeg xeem tau los ua pej xeem Australia tshiab no xwb.
Yog li ntawd ces lub caij tseem muaj kab mob COVID-19 sib kis thoob ntuj no, nom tswv thiaj li tau hais kom tej neeg uas yeej raug nom tswv lees paub tias xeem tau los ua pej xeem Australia tshiab lawm mus siv ib cov video hauv online los koom cov koom txoos ua kev zoo siab tos txais Australia tej pej xeem tshiab no lawm xwb.
Cov kev ua koom txoos hauv online no ces yeej ua sai sai xwb, tab sis nom tswv yeej yuav tau txheeb tej neeg mus koom no cov cim thawj (identity) thiab txheeb xyuas tias seb lawv puas muaj cai mus koom mas thiaj pub mus koom tau xwb thiab.
Txij lub 6 hli ntuj xyoo 2020 no, ces tsuas pub tej neeg tsawg tus mus koom tau tej koom txoos no rau qee thaj chaw ntawm teb chaws Australia no xwb thiab. Tab sis yeej muaj cov kev ua tej koom txos tos txais pej xeem Australia tshiab no sib txawv ntawm ntau lub xeev thiab, vim tej xeev nyias yeej muaj nyias cov kev taws qhia thiab txwv tias tsuas pub ua tau dab tsi rau lub caij tseem muaj kab mob coronavirus sib kis no.
Mr Kilner hais tias nyob rau lub caij ua lub koom txoos zoo siab tos txais cov neeg xeem tau los ua pej xeem Australia tshiab no ces yeej muaj tus hau zos uas tswj ib cheeb tsam zos twg los ua tus tswv cuab tswj lub koom txoos no thiab los hais lus qhib lub koom txoos no raws li tsab cai pej xeem (Citizenship Act) tau teev tseg.
Checking passport at airport - PeopleImages - Getty Images Source: Getty Images
Ces thiaj muaj cov kev hais ib cov lus tos txais tej pej xeem tshiab no los koom nrog haiv neeg Australia no ‘welcome to nation’ los yog zoo siab tos txais lawv rau lub teb chaws no ‘welcome to country’, ces mam li nyeem tus pwm tsav lis tej laj fai tswj cov kev tsiv teb tsaws chaw, tswj pej xeem, thiab ntau tsav neeg coj ntseeg ntau yam kev cai dab qhuas thiab hais ntau hom lus tsab xo zoo siab tos txais cov pej xeem Australia tshiab no, ces txuas ntxiv tej neeg uas mus koom lub koom txoos ntawd mam li tso thiab nqua Australia zaj nkauj haiv, thiab mam li cog lus tias yuav lees los ua ib tug pej xeem zoo rau lub teb chaws Australia no. Tom qab ntawd ces mam li hu ib pab neeg uas zaum tej rooj ib kab ib kab ntawd mus nqa lawv cov ntawv pov thawj pej xeem Australia.
Nyob rau lub caij uas tej neeg los cog lus lees tias yuav ua ib tug pej xeem zoo rau teb chaws Australia ntawd, ces lawv yuav tsum tau los lees paub lawv lub luag hauj lwm tam li yog ib tug pej xeem thiab lees paub tias cov kev ras los ua ib tug pej xeem Australia no lawv yuav tau txais txiaj ntsim dab tsi.
Cov kev los cog lus thiab lees tias yuav ua ib tug zoo pej xeem no yog ib lub cim qhia tau tias tus neeg ntawd yeej kub siab thiab nias siab hlo yuav los ua ib tug pej xeem zoo thiab pab txhim teb kho chaw rau peb lub teb chaws Australia lawm.
Tom qab ua tej txheej txheem ntawm lub koom txoos zoo siab tos txais Australia cov pej xeem li hais ntawd lawm, ces tej neeg xeem tau thiab raws los ua pej xeem Australia tshiab no yeej muaj txoj cai thiab lub luag hauj lwm tib yam li tej pej xeem uas yug ntawm teb chaws Australia no lawm thiab.
Tej cai hais no ces yog muaj cai los xaiv tsa nom tswv, muaj cai los tu tau ib cov me nyuam saws, muaj cai thov tau Australia cov passport siv, muaj cai qev tau nyiaj los kawm qib siab thiab mam li them rov qab thaum lawv ua hauj lwm khwv tau nyiaj raws li nom tswv teev tseg, muaj cai los teev zem npe sib tw ua nom, nrog rau lwm yam cai uas teev tsis txog ntawm no ntxiv.
Tsis tas li no los tseem muaj lwm lub luag dej num uas ib tug pej xeem Australia yuav tsum tau ua thiab xws li yog koj raug nom tswv hu los yog caw mus koom mloog hais plaub, ces koj yuav tsum tau mus koom ntawm tej tsev hais plaub seb ib rooj plaub twg txiav txim puas muaj kev ncaj ncees, koj yuav tau tuaj yeem pom zoo muab koj roj ntsha los tiv thaiv thiab pov puag teb chaws Australia rau lub caij muaj tsov rog, koj yuav tsum tau mus xaiv nom rau lub caij muaj kev xaiv tsa tshua theem nom tswv tshiab, thiab yuav tau mus siv koj lub suab seb puas pom zoo los tsis pom zoo los kho ib tsab cai tseem ceeb uas teb chaws Australia xav thov kho duab tshiab los yog xav muab tso tseg tsis siv lawm.
Txheeb cov xov xwm ntxiv txig cov kev mus thov kom tau cov visa nyob ruaj ntawm no: .
Mus kawm thiab xyaum teb cov lus nug thiab lus teb thaum koj mus xeem ua pej xeem Australia tau ntawm no:
Los yog mus txheeb tej xov xwm ntxiv tias kev ras los ua ib tug pej xeem Australia muaj lub luag hauj lwm li cas tau ntawm no:
