NTSIAB LUS TSEEM CEEB:
- Tau muaj ib co kev hloov kho tseem ceeb rau Australia cov migration system.
- Thiaj tau kho cov system no tom qab tau txheeb thiab pom tau tias muaj ntau yam teeb meem rau cov migration system no.
- Li muaj tej neeg phem tau siv cov system no nyiag thiab xa neeg txhaum cai.
Tau muaj ib cov kev hloov kho tseem ceeb rau Australia cov migration system limtiam no, tom qab tau muaj ib tsab ntawv cej luam tau ceeb toom tias tau muaj neeg ua txhaum cai tau siv cov system no nyiag neeg thiab xa neeg yam tsis raug cai thiab ua rau muaj teeb meem rau Australia cov kev thov visa pab rau tej neeg thoj nam.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab Downloadthiab caum
Clare O’Neil uas yog tus nom tswj lub tuam chav Home Affairs Minister hais tias muaj ib txhia neeg tau dag kom lawv tau txais kev pov puag tam li yog neeg thoj nam. Source: AAP / Mick Tsikas
Kuj tseem txheeb tau ntxiv thiab tias kuj muaj cov kev ua tsis ncaj rau cov kev thov visa rau tej neeg thoj nam thiab tej tub kawm ntau heev, thiab tseem muaj cov kev ncua tsis muaj peev xwm txheeb tau tej ntaub ntawv thov visa no raws li qhov tsim nyog, ces thiaj tau muab tsoom fwv ib txhia tuam chav ua hauj lwm kaw lawm vim lawv tsis ua raws li tej cai muaj siv tam sim no.
Ces lub limtiam no pab nom Labor thiaj tau los txheeb txog tej migration agents thiab tau tshwm nyiaj pab rau tej chaw hais plaub uas txheeb tej neeg thoj nam no.
Cov refugee system raug siv yam tsis raug cai
Tsoom fwv tau tshwm nyiaj $160 million coj los kho cov refugee visa system, uas raws li Nixon txheeb ces pom tias tseem raug neeg siv yam tsis raug kev raug cai kom tej neeg thiaj txuas tau nyob kom ntev ntxiv ntawm Australia no. Tsis tas li ntawd los kuj pom tau tias ''tau muaj tej neeg tsis zoo txhob txwm xa ntaub ntawv cuav ntau heev kom thov tau tej visa pov puag lawv'', ces thiaj ua rau muaj kev ncua rau cov kev txheeb tej ntaub ntawv thov visa raws li cov kev txheeb no tshawb tau.
Tsoom fwv kuj tau qhia ntxiv tias yuav pab nyiaj $54 million los pab txheeb tej ntaub ntawv thov visa pov puag uas tsim nyog xub kub siab txheeb txog ua ntej kom haum raws li lub caij nyoog.
Ces thiaj yuav nrhiav 10 tus kws lij choj los ua hauj lwm pab ntxiv rau lub tuam chav Administrative Appeals Tribunal - uas Labor yuav coj mus ua hauj lwm hloov tej neeg qub xyoo tom ntej no - thiab yuav teeb 10 tus kws lij choj ua hauj lwm rau lub tsev hais plaub Federal Circuit thiab Family Court.
O'Neil tau hais tias cov kev thov tsis muaj laij thawj thiab cuav no ''tau ua rau muaj teeb meem tsis zoo rau peb cov refugee system'' uas tsim nyog pab tej neeg thoj nam tiag - uas yeej tau ua lub neej tsis pom qab cob cuab tau 10 xyoo thiab yog ib co neeg raug teeb meem loj tshaj plaws uas tsis raug txheeb, tab sis ho txheeb rau tej neeg dag.
Nws tau hais tias "Peb thiaj ntsib teeb meem rau tej neeg uas thov tej visa pov puag uas tsis muaj laj thawj zoo txaus los yog tsis muaj pov thawj tim khawv zoo txaus. Thiab kuj paub tseeb tias yeej tseem muaj ib txhia uas tau siv tej system no kom muaj cai tau ua hauj lwm ntawm teb chaws Australia no thiab."
Yog tias ib tug twg siv txhua txoj xub ke pab kom nws muaj peev xwm nyob tau ntawm Australia no ces yuav nyob tau li ntawm 9 txog 11 xyoos, uas nws yeej muaj cai ua hauj lwm puv npo, ua ntej yuav raug ntiab tawm ntawm lub teb chaws no mus, raws li 3 txoj xub ke no:
- Visa pov puag ces tau nyob txog li 2.5 xyoos.
- Thov kom Administrative Appeals Tribunal txheeb ces tej zaum yuav tau nyob txog li 3.6 xyoos.
- Thiab cov kev thov txheeb ib yam plaub ntug twg ces yuav tau nyob txog li 3-5 xyoos.
O'Neil thiaj tau hais tias "Yog muab sib sau ua ke lawm ces kuj yog lub caij ntau xyoo uas tus neeg ntawm muaj cai ua hauj lwm yam raug cai. Txawm li cas los tus neeg ntawd yuav tsum tau rov qab mus tsev, tab sis ho puas tsim nyog rau cov kev muaj peev xwm ua tau hauj lwm 10 xyoo ntawm teb chaws Australia no mas?''
Thiab kuj pom tias txij xyoo 2021 los no kuj tau muaj neeg thov visa neeg thoj nam ntau tuaj ntxiv - yuav laug txog li ntawm 13,000 tus tsaib no lawm - txawm li cas los kuj tseem tsawg dua cov thov ua ntej lub caij yuav muaj kab mob COVID-19 sib kis thiab.
Teeb tsa pawg neeg tshiab los txheeb tej neeg ua txhaum cai
Tsoom fwv tau teeb tsa ib pawg neeg ua hauj lwm ruaj los ua hauj lwm rau ntau lub tuam chav hauj lwm uas tej zaum yuav muaj tej teeb meem no thiab yuav rau txim rau tej neeg ua txhaum cai.
O'Neil tau hais tias ''Pawg neeg no yuav txheeb cov immigration system thiab los daws tej teeb meem tseem ceeb uas peb ntsib, thiab nrog xyuas kom txwv txiav kom tsis txhob muaj tej teeb meem no los yog coj tej neeg ua txhaum no los rau txim."
Tsoom fwv yuav teeb tsa ib pawg neeg los tawm tsam nrog tej neeg uas pheej xav siv Australia cov immigration system kom tau txais txiaj ntsim yam tsis raug kev raug cai.
Yog tias tej tuam chav soj xwm qab rooj no paub tias yog muaj ib co kev siv cov immigration system no rau ntawm ib co zos txawv teb chaws twg tsi ntsees lawm, ces yuav qhia tej xov xwm ntawd rau lub tuam chav Home Affairs, ces mam li mus tshuaj ntsuam tej migration agents uas cuam tshuam ntawm teb chaws Australia no.
Thiab tsoom fwv yuav ceev faj tshaj rau thaj chaw ntawd tej ntaub ntawv thov visa. Tsoom fwv ntseeg tias yog nrhiav neeg ua hauj lwm ntau tuaj ntxiv pab ces yeej yuav muaj peev xwm txheeb tau tej neeg ua txhaum no xwb.
Yog li ntawd ces tsoom fwv thiaj li yuav tshwm nyiaj $50 million dollars coj los pab rau Australia cov Immigration system.
Tej nom tswv thiab tej cai uas yuav txheeb thiab tswj cov migration agents
Tej zaum tej migration agents ua tsis ncaj uas nyob ntawm teb chaws Australia no yuav yog ib cov tseem ceeb uas pheej ua rau muaj pej kum haiv siv Australia cov migration system txhaum cai kom tau txais txiaj ntsim rau lawv.
Tsoom fwv teb chaws thiaj tau npaj tej neeg ua hauj lwm no kom ntau tuaj ntxiv los pab rau lub koom haum uas teev thiab txheeb tej migrant agents (Office of the Migration Agents Registration Authority - OMARA) los ua cov saib xyuas tej hauj lwm no li:
- Nrhiav kom tau neeg ua hauj lwm ntau tuaj ntxiv txog li ob npaug rau lub koom haum OMARA.
- Rau txim kom hnyav rau tej neeg ua txhaum thiab ncua sij hawm kom ntev tsis pub rov qab teev zwm raug cai ua tau cov hauj lwm no.
- Yuav tsum tau txheeb tej neeg uas xav ua cov migrant agents ua ntej yuav teev zwm npe seb puas yog neeg ua txhaum cai.
- OMARA muaj cai tswj tias tej migration agents muaj peev xwm ua tau dab tsi xwb.
Nws hais tias "[Lawv] tsuas xav kom tswj tau tej cai no zoo tshaj qub ntxiv thiab kom tsis txhob ua rau lwm tus puas koob npe vim muaj ib txhia pheej ua txhaum cai thiab siv tej system no nyiag neeg yam tsis raug cai xwb.''
Christine Nixon uas yog Victoria tus hau tub ceev xwm dhau los tau coj nws tsab ntawv cej luam txog cov kev mus txheeb txog Australia cov migration system coj los qhia rau zej tsoom paub lawm. Source: AAP / David Crosling
Cov kev txheeb cov migration system uas siv tau ruaj
Tsoom fwv yuav ua tib zoo xyuas kom muaj cov kev tshuaj ntsuam ntev txog ib xyoos txog tej hauj lwm no uas siv tau ruaj coj los siv.
Cov hauj lwm Operation Inglenook uas tau tsim tsaib no lub 11 hlis ntuj ntawd kuj tau txheeb tau tias muaj ntau pawg neeg txhaum cai tau siv Australia cov visa system coj mus:
- Nrhiav tej neeg ua niam ntiav txhaum cai, nyiag neeg txhaum cai, thiab yuam lwm tus ua qhev rau tiam vam meej no
- Yuav yaj yeeb txhaum cai txawv teb chaws los muag
- Siv tej nyiaj txiaj tau los yam tsis dawb huv
- Thiab lug hla tsis them se
Tsis tas li ntawd los tseem yuav xyuas kom lis tau tej hauj lwm no kom nthuav dav tshaj tej lagluam niam ntiav no thiab, li yuav txheeb xyuas seb puas yog tej neeg txhaum cai siv tej system no yam tsis raug cai thiab seb ho puas ua lwm yam txhaum cai nrog thiab.
Txog rau lub 3 hlis ntuj xyoo no ces pawg neeg no yeej tau txheeb 175 tus neeg uas nom tswv ntseeg tias tej zaum muaj feem ua txhaum cai, ces thiaj tau ua rau muaj 57 cov kev coob toom rau tej neeg tswj ciam teb. Thiab tam sim no ces yeej muaj tej neeg txawv teb chaws ntawm tej teb chaws tshaj li 90 lub uas nom tswv pawg neeg no tseem tab tom txheeb xyuas.
Tej visa tub kawm cuav
Tsab ntawv cej luam no kuj tau ceeb toom tias tej lagluam qhia ntawv no kuj yog ib co uas muaj kev ua tsis ncaj rau tej visa thiab.
Tub kawm pej kum haiv kuj rov qab muaj peev xwm tuaj sai heev rau Australia lawm tom qab uas ntxeem dhau tus kab mob COVID-19 lawm, thiab twb tau muaj tej tub kawm no txog li 370,000 tus tuaj rau lub teb chaws no txij yav lig tsaib no los lawm.
Tam sim no thiaj yuav kom tej tub kawm pej kum haiv yuav tau qhia kom tau tias lawv muaj nyiaj txaus siv ua ntej yuav tuaj rau Australia no. Thiab cov kev tshuaj ntsuam no kum tseem txheeb tau tias tej neeg yeej tsis kub siab txog Australia cov migration system, yeej tseem pom tias tej neeg no tau muab lawv tej nyiaj xa ntawm ib phau account rau lwm phau account kom muaj peev xwm thov tau ntau daim ntawv thov visa thiab.
Ces thaum tau muaj cov kev pauv hloov tshiab no thiaj pom tias lub tuam chav Home Affairs tau tsis pub visa rau tej tub kawm ntau heev xyoo no lawm.
Txij lub 1 hlis ntuj xyoo no los xwb twb tsis pub visa rau tej tub kawm pej kum haiv txog li ntawm 5 feem pua lawm. Ces thiaj ua rau muaj tej tub kawm cov kev thov visa kawm ntawv txog li ntawm 30 feem pua rau lub hli dhau los no lawm.
Thaum tseem ntxov lub limtiam no ces Jason Claire uas yog Australia tus nom tswj dej num kev kawm tau qhia tias tau tsim cov kev paub hloov tshiab no coj los tiv thaiv ''kom tej neeg pab khiav ntaub ntawv rau tej tub kawm los sis yog tej chaw qhia ntawv uas pheej ua txhaum cai'' tsis txhob muaj peev xwm siv Australia cov migration system kom tau txais txiaj ntsim rau tej tub kawm ntxiv lawm li yuav:
- Txwv tsis pub ib lub tsev kawm qib siab twg them nyiaj commissions rau tej migrant agent kom thiaj txeeb tau tej tub kawm pej kum haiv tuaj kawm ntawm ib lub teej kawm twg.
- Yuav txheeb thiab sim tias seb lub chaw qhia ntawv ntawd puas yog ib lub teej kawm tsim nyog tiag.
- Tsis tas li ntawd los yuav los txheeb tias seb tej tub kawm ntawd puas mus kawm ntawv tiag.
Ces xyoo 2018 -19 ntawd thiaj pom tias muaj tej tub kawm ntawm Suav tuam tshoj tshaj 800,000 tus thiab muaj tej tub kawm ntawm India tshaj 600,000 tus thov tau visa tuaj kawm ntawv ntawm teb chaws Australia no.
