Daniel Andrews uas yog hau xeev Victoria tau qhia hnub tim 12.02.2021 no tias muab nroog Melbourne kaw 5 hnub pib txij li ib tag hmo no mus txog rau ib tag hmo hnub tim 17.02.2021 ib tag hmo lawm tom qab tau muaj neeg kis tau tus kab mob coronavirus tshiab uas kis tau ntawm teb chaws Askiv los coob tuaj ntxiv txog 13 leeg lawm raws li SBS News tau qhia. Ces thiaj tau rov qab siv cov kev txwv theem 4 uas tsuas tso cai rau tej neeg tawm mus ua tej yam tseem ceeb xwb.
Qhov no txhais tau tias tsuas pub tej neeg mus:
- pub mus ua hauj lwm los yog kawm ntawv yog tias tsis muaj peev xwm ua tau ntawm tsev.
- mus yuav khoom siv thiab khoom noj khoom haus nrug ntawm yus tsev deb li 5 kilometres xwb.
- mus kho mob los yog mus tu saib xyuas lwm tus.
- tsis pub ib tug qhua mus xyuas ib tse neeg twg hlo li lawm.
- pub mus ua exercise tau ntev txog 2 teev rau ib hnub twg xwb.
- tsis hais tej neeg nyob hauv tsev los yog nyob nraum zoov yuav tsum siv ntaub npog qhov ncauj.
- kaw tej teej kawm tab sis tseem qhib rau tej me nyuam uas lawv niam lawv txiv yuav tau mus hauj lwm tsis muaj neeg zov thiab tseem qhib tej chaw zov me nyuam rau tej neeg siv.
- tsis pub zej tsoom sib sau ua ke.
Saib tau tej xov xwm qhia txog tias pub ua tau dab tsi ntxiv ntawm:
Tos ho muaj cov kev kaw nroog Melbourne no los vim tias tau muaj neeg kis tau tus kab mob ntawm lub tsev tos txais qhua Holiday Inn ntawm Melbourne Airport thiab tej nom tswv tseem yuav mus txheeb tej neeg ntau txheeb tus uas tau caij dav hlau los rau Melbourne Tullamarine Domestic Terminal.
Ces thiaj li tau ua rau muaj teeb meem rau tej lagluam thiab tej neeg rau lub caij yuav txog lub caij Hnub Sib hlub (Valentine Day) thiab lub caij Lunar New Year 2021 no vim rau qhov lawv tau yws tias nom tswv yeej tsis qhia kom ntxov rau lawv paub vim lawv tau npaj tej zaub mov los yog tej paj tej lagluam yuav ua luam rau lub caij no.
Hos Anthony Albanese uas yog tus coj pab nom Labor los kuj tau yws tias vim li cas Australia twb tau cov tshuaj COVID-19 vaccine 3 limtiam dhau los lawm tsis coj los hno rau tej neeg es pheej tseem to ua tus dab tsi.
Tsis tas li no los raws li Australia lub chaw nthuav xov xwm ABC News tau qhia ces kuj tseem tau ua rau Australia tej xeev tau kaw lawv cov ciam teb tsis pub tej neeg ntawm nroog Melbourne los yog xeev Victoria mus rau lawv tej xeev thiab.
Xeev Tasmania tau qhia tias txij ib tag hmo hnub tim 12.02.2021 no mus yuav kaw nws lub xeev tej ciam, teb tsis pub ib tug neeg ntawm xeev Victoria no mus rau nws lub xeev ntxiv lawm, tsuas yog tias ntshe ho tau ntawv tso cai mus tau xwb. Tab sis thaum mus txog lub xeev no yuav tsum tau cais lawv tus kheej 14 hnub tso mam pub tawm mus ua lwm yam. Thiab tau muab xeev Victoria teev tias yog lub xeev yuav muaj kev phom sij kis tau tus kab mob coronavirus no lawm.
Xeev Queensland los kuj tau kaw nws cov ciam teb 14 hnub rau xeev Victoria thiab txwv tsis pub tej neeg ntawm xeev Victoria mus rau nws lub xeev. Thiab tau txwv ntau lub zos ntawm nroog Melbourne teev tias yog cov zos muaj neeg kis kab mob coronavirus.
Nom tswv xeev New South Wales los kuj tau ceeb toom rau nws tej pej xeem tias yog tsis muaj hauj lwm tseem ceeb ces kom tsis txhob mus rau xeev Victoria rau lub caij no thiab.
Xeev South Australia kuj tau qhia tias nws kaw nws cov ciam teb rau xeev Victoria tsis pub tej neeg tag nrho ntawm xeev Victoria mus rau nws lub xeev lawm. Tej neeg uas tau mus rau tshav dav hlau Tullamarine Terminal 4 los yog tej neeg ua tau txais kev tso cai mus tau rau nws lub xeev yuav tsum mus sim thiab mus cais lawv tus kheej 14 hnub yog lawv tau tso cai mus rau nws lub xeev.
Xeev Western Australia tseem tso cai rau qee tus neeg Victorian mus tau rau nws lub xeev tab sis lawv yuav tsum tau cais lawv tus kheej yog tias lawv tau txais ntawv tso cai mus rau nws lub xeev. Txawm li cas los nws kuj tau kaw nws cov ciam teb tsis pub tej neeg Victoria mus rau nws lub xeev 3 hnub. Thiab yuav pib kaw nws cov ciam teb txij sij hawm 6pm AEDT hnub tim 12.02.2021 mus.
Hos xeev Northern Territory los kuj tau kaw nws lub ciam teb tsis pub tej neeg ntawm xeev Victoria mus rau nws lub xeev thiab tau muab ntau lub zos ntawm Melbourne thiab lub tsav dav hlau Tullamarine Airport teev tias yog thaj chaw muaj neeg kis kab mob coob. Txawm li cas los kuj tseem tso cai rau cov kev sib tw Australia Open Tennis 2021 txuas ntxiv tab sis tsis pub neeg mus saib cov kev sib tw no rau 5 hnub ntxiv tom ntej no lawm.
Tej neeg ntawm teb chaws Australia yuav tsum nyob kom nrug ntawm lwm tus neeg yam tsawg li 1.5 metres. Txheeb tau kev txwv ntawm koj lub xeev seb ho muaj cov kev txwv tsis pub tej neeg sib sau nyob ua ke li cas ntxiv.
Yog tias koj muaj cov yam ntxwv mob khaub thuas, ces nyob twj ywm hauv tsev thiab ho hu xov tooj rau koj tus kws kho mob tham thiab npaj tias seb yuav mus sim li cas los sis yog hu rau nrog lub koom haum Coronavirus Health Information Hotline tus xov tooj1800 020 080 nrog lawv tham tau.
Thiab xav thov kom koj ho mus txheeb tej kev taw qhia ntawm tej xeev koj nyob li xeev , , , , , , , thiab xeev ntxiv.
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
