Maria (uas tsis yog tus poj niam no lub npe tseeb) tau pib ua hauj lwm rau tej tuam txhab lagluam nyiaj txiaj thaum nws tau tuaj txog ntawm teb chaws Australia 10 xyoo dhau los.
Nws kuj tau kawm tiav bachelor degree ntawm nws lub teb chaws Russia, nrog rau cov kev tau kawm tiav Master degree ntawm teb chaws Australia. Tam sim no ces nws tau ua hauj lwm contract, thiab nws tseem tab tom kawm ntxiv thiab.
Nws tau qhia rau SBS News tias ''Kuv tau txheeb tau tias kuv yeej muaj peev xwm pab tau tej chaw ua hauj lwm zoo tab sis kuv tseem xav kom tau ua tej hauj lwm uas tau ntsib nrog tej clients tham tim ntsej tim muag thiab,''
"Kuv txheeb tau tias yog tej yam nyuaj kawg vim yus yog ib tug neeg tsiv teb tsaws chaw.''
Ib txhia teeb meem nyuaj ntawm ntau yam ces yog cov kev tsis paub lus thiab lub ntsib lus cov uas muaj ntsiab lus tob heev ntawd. Nws tau hais tias muaj tej thaum ces nws kuj ntsib ntau yam lus nug, piv txwv li seb nws tau ua nws tej hauj lwm tau pes tsawg xyoo lawm.
"Feem ntau mas kuv txheeb tau tias tej neeg yeej xav paub txog ntau yam kab lis kev cai sib txawv. Uas kuj muaj ntau yam zoo thiab. Tab sis yog xav kom ua tau tej hauj lwm li hais ntawd, ces kuj tseem yog tej yam nyuaj heev uas yus yuav muaj peev xwm nrhiav tau ib txoj hauj lwm ua thiab.''
'Peb yuav tau rau siab ua hauj lwm tshaj qub ntxiv'
Maria kuj xav paub tias nws cov kev hais tej suab lus tsis meej puas yog ib feem ntau ntau yam, li nws cov kev ntseeg tus kheej, tej kev paub ua hauj lwm muaj feem ua rau nws ua tsis tau hauj lwm nce qeb.
Nws tau hais tias ''Kuj yog tej yam tsis paub yuav hais li cas tau thiab ... vim yeej tsis tshua muaj cov kev qhia ib tug neeg twg tias nws ua hauj lwm zoo li cas ... yog li yuav tau xam qhov dav dav nrog. Ces thiaj yuav tau siv zog txog ob npaug mas thiaj yuav ua tau ib yam zoo. Thiab peb yuav tsum tau rau siab ua hauj lwm kom hnyav tshaj qub ntxiv.''
Muaj ib co kev teeb txheeb tshiab qhia tias tej poj niam uas pheej hais cov suab lus txawv teb chaws uas hais tsis meej ces yog cov uas nrhiav tsis tshua tau hauj lwm ua piv rau tej txiv neej.
Tej kws teeb txheeb ntawm tsev kawm qib siab Australian National University qhia rau hnub zwj Quag (Tuesday) tias ''yog ib co xwm txheej ua rau ib txhia poj niam plam txiaj ntsim ob npaug''.
Ksenia Gnevsheva uas yog tus coj uas sau tsab ntawv cej luam txog cov kev teeb txheeb no thiab kuj yog ib tug lees qhia ntawv thiab lus tau qhia rau SBS News tias:
"Peb tau txheeb tau tias tej suab lus muaj feem thiab, tab sis tsis yog tib co suab lus nkaus xwb. Tab sis yog tham txog peb cov kev teeb txheeb lawm ces tej suab lus hais tsis meej tsis muaj feem cuam tshuam dab tsi.''
'Yog ib cov kev sim seb muaj kev lees paub li cas'
Raws li tej xov xwm txheeb pej xeem xyoo 2021 qhia ces Australia yeej yog lub teb chaws siv ntau yam lus sib txawv, vim rau qhov yeej muaj tej pej xeem yuav laug txog li 1 feem 3 yeej hais ib hom lus twg ntawm tsev dua ntawm cov kev hais lus Askiv lawm.
Tsis tas li ntawd los zoo li tej neeg yeej tsis tshua qhia txog tej xwm txheej ib tug twg raug faib cais cuam tshuam txog ib hom lus twg yog rau cais raws ib pawg neeg los yog ib co kev ntseeg twg, tab sis yeej tau muaj ib co kev teeb txheeb ''qhia meej tseeb'' thiab. Tej kws teeb txheeb yeej tau muaj tej hom phiaj los txheeb txog Australia tej no, hais tsi ntsees rau cov kev nrhiav hauj lwm ua.
Lawv thiaj tau ua cov kev teeb txheeb uas ''sim cov kev lees paub'' uas siv cov suab kaw ntawm 40 tus neeg ntawm 5 pawg neeg: li tej neeg Anglo uas ib txwm hais lus Askiv, neeg Catonese thiab neeg Lebanese, nrog rau tej neeg Suav thiab Russia uas hais lus Askiv ua hom lus ob.
Ces tau muab tej suab lus ntawm tej neeg no coj mus rau 153 tus neeg mloog, ces mam teev tej neeg hais cov suab lus ntawd raws 5 theem uas xav ntiav ua hauj lwm. Tej lus nug ntawd ces kuj muaj cov teev txog tias ib tug neeg hais lus cov suab ntawd puas phim ua ib txoj hauj lwm office, los sis hais kom tej neeg mloog tej suab lus ntawd xav tias seb tsim nyog ntiav tej neeg ntawd ua hauj lwm li cas.
Ces cov kev teeb txheeb no tau qhia tias tej kev hais lus ntawm ib tsav neeg twg ua rau muaj teeb meem rau tej poj niam tab sis kuj tsis muaj teeb meem dab tsi rau tej txiv neej.
Gnevsheva hais tias "Tej neeg mloog tej suab lus ntawd ces pom tau tias xav ntiav tej txiv neej ua hauj lwm ntau dua tsis hais lawv yog tsav neeg twg li. Tab sis yog tham txog tej poj niam lawm ces tsis tshua xav ntiav lawv ua hauj lwm.''
Raws li cov kev teeb txheeb no hais ces tej poj niam neeg Anglo uas hais lus Askiv yog cov uas xav ntiav ua hauj lwm tshaj plaws, txuas ntxiv ntawd ces tej poj niam hais lus Russia uas hais lus Askiv ua hom lus ob ntawd yog cov uas muaj neeg xav ntiav lawv ua hauj lwm tsawg tshaj.
Thiab cov kev teeb txheeb no yeej txheeb tsis tau tias puas yog ib tsav neeg twg yog cov neeg uas muaj neeg xav ntiav los yog tsis xav ntiav ua hauj lwm dua lwm tsav neeg.
Txawm li cas los tej poj niam neeg Suav thiab neeg Russia ces yeej tau cov zauv siab dua tej txiv neej.
LISTEN TO
The barriers to employment faced by skilled migrants
SBS News
27/11/202306:30
'Cov kev plam txiaj ntsim ob npaug'
Tej kws teeb txheeb tau qhia tias cov kev tshawb fawb no qhia tias ''yog ib co kev plam txiaj ntsim ob npaug'' rau tej poj niam uas pheej hais lus Askiv ua cov suab lus txawv teb chaws.
Gnevsheva tau hais tias ''Peb txheeb tau tias yog tham txog tej neeg uas hais lus Askiv tawm ua cov suab lus txawv teb chaws ntawd ces tej poj niam yeej yog cov plam txiaj ntsim ntau tshaj tej txiv neej,''
"Thiab yog thaum yus los xam tej no ua ke — thiab thaum yus los txheeb txog tej poj niam cov suab lus uas pheej tawm suab li cov neeg txawv teb chaws — ces tej no yog ib co ua rau lawv plam txiaj ntsim txog ob npaug vim yog tej yam qhia tias lawv yog cov pawg neeg tsawg ces thiaj muaj neeg muab cov theem tsis zoo rau lawv.''
'Yeej tseem muaj cov kev ntxub tsis nciam thiab cov kev faib cais'
Dr Astrid Perry ces yog tus coj uas tswj tej dej num pab poj niam, kev tau txais vaj huam sib luab thiab pab tej poj niam raug teeb meem kub ntxhov ntawm lub cuab yig ntawm lub koom haum Settlement Services International (SSI) uas nrhiav kev pab cuam rau tej neeg thoj nam pib neej tshiab thiab cov program pab nrhiav hauj lwm ua.
Perry tau hais tias yog tej yam "tus siab heev tab sis kuj tsis yog tej yam ua rau ceeb dab tsi'' uas tseem pom tias tej poj niam uas tsis hais lus Askiv ua thawj yam lus yog cov uas tsis tshua nrhiav tau hauj lwm ua.
Nws tau hais tias ''Peb yeej pom kiag ntwm tej program pab zej tsoom lawm. Tej poj niam uas txawj ntse, nquag thiab rau siab ua hauj lwm — thiab tej poj niam uas ua hauj lwm nurses, engineers, lees kais ntawm lawv tej teb chaws — ces thaum tuaj txog teb chaws (Australia no) lawm tseem yuav tau pib dua tshiab,''
''Thiaj ib txwm ua rau lawv tau ua tej hauj lwm khwv tau nyiaj tsawg, tau ua tej hauj lwm tsis ruaj ua ces thiaj ua rau muaj cov kev khwv tsis tau nyiaj sib npaug ntawm tej poj niam neeg tsiv teb tsaws chaw thiab tej poj niam uas yug ntawm teb chaws Australia no.''
Perry cov kev teeb txheeb ntawm lub koom haum SSI yeej qhia tias tej neeg thoj nam thiab tej poj niam neeg tsiv teb tsaws chaw yog cov poob qab lwm cov poj niam ntawm Australia tej kiab khw ntiav dag zog, txawm tias lawv muaj txuj ci thiab muaj tej qualifications thiab yeej kub siab heev xav ua hauj lwm.
Nws hais tias ''Cov kev pheej hais lus Askiv tawm ua cov suab lus txawv teb chaws uas rau raug lwm tus ntaus nqe tsis zoo txhais tias yuav yuam kom tej poj niam ntawd yuav tsum tau qhia kom tau rau lwm tus rau ntawm ib co system twg uas pheej xav tau tej neeg paub ua hauj lwm ntawm teb chaws Australia no xwb tsis yog xav tau tej neeg uas paub ua hauj lwm hauv ntiaj teb no.''
Cov kev teeb txheeb no txheeb tau tias 'yeej tseem muaj' cov kev siv lus los cais lwm tus
Tej kws teeb txheeb ntawm tsev kawm qib siab Australian National University (ANU) yeej tau hais tias cov kev teeb txheeb no yeej qhia tias 'yeej tseem muaj' cov kev siv tej lus los cais lwm tus ntawm teb chaws Australia.
Thiab cov kev cais ib tug twg cuam tshuam nrog lawv tej hnoob nyoog, cov kev puas cev, tsav neeg, sex, gender identity thiab sexual orientation rau tej hauj lwm kev kawm thiab qhia ntawv thiab cov kev nrhiav/ntiav neeg ua hauj lwm yog ib co kev ua txhaum cai.
Txawm li cas los tej cai ntawm tej teb chaws vam meej feem ntau suav teb chaws Australia nrog yeej tsis teev kom dua txog cov kev cais ib tug neeg cuam tshuam nrog lawv cov suab lus thiab raws li Gnevsheva tau hais, thiab nws kuj hais ntxiv tias qhov no thiaj yog ''tej yam'' uas yuav siv coj los ua cov kev cais. ''Thiab yog tej yam uas tej zaum peb muaj peev xwm yuav hloov tau.''
Tej kws teeb txheeb los kuj xav kom yuav tau qhia thiab coj tej neeg ua hauj lwm nrhiav neeg ua hauj lwm los yog lwm cov neeg ua cov kev txiav txim siab ntawm tag nrho coj mus xyaum kawm kom paub txog tej no.
"Cov kev cai yog ib co kev txiav txim siab tseem ceeb rau cov kev ntiav neeg ua hauj lwm, thiab tej neeg uas nrhiav thiab ntiav neeg ua hauj lwm thiab ib co neeg twg uas ua hauj lwm tsim nyog yuav tsum tau mus kawm tej sob kawm uas tsis pub cai tsis nyiam lwm tus kom tej neeg coj ntseeg lwm yam kab lis kev cai sib txawv thiaj muaj peev xwm ua tau hauj lwm ua ke kom zoo tshaj qub ntxiv.''
SBS Russian koom tsim zaj xov xwm no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
