Ahmed uas yog ib tug txiv neej lub npe cuav nyob ntawm lub zos Hume uas yog ib lub ntawm 6 lub zos ntawm xeev Victoria uas muaj neeg kis tau kab mob coronavirus ntau tuaj ntxiv kuj raug txheeb tau tias ntau hnub tsis ntev los no nws thiab nws tus muam kis tau tus kab mob COVID-19 lawm.
Nws tau qhia rau SBS Arabic 24 tias nws tsis xav qhia rau tej neeg paub tias nws yog leej twg tiag kom txhob muaj neeg tib tsis txaus siab rau nws thiab txhob muaj tej zejzog ua phem rau nws rau lub caij uas nws tseem yuav tau los tshuaj ntsuam xyuas nws cov yam ntxwv mob txuas ntxiv.
Nws ntseeg tias muaj neeg txhob txwm liam tias yog tim cov neeg tsiv teb tsaws chaw thiaj ua rau muaj tus kab mob coronavirus sib kis coob tuaj ntxiv ntawm xeev Victoria no txog li rau lub limtiam dhau los lawm thiab tau muaj ib tug neeg tau tas sim neej rau hnub zwj Feej (Wednesday) tim 24 June 2020 dhau los.
“Nyuaj kawg li vim yuav tau xyuas seb yuav ua li cas rau tej neeg tau xov xwm cuav uas tsis xyuas qhov tseeb."
“Tej zaum tej chaw hais no yog cov zos uas muaj neeg thoj nam tawg tsov tawg rog thiab neeg tsiv teb tsaws chaw nyob coob heev, tab sis yeej tsis cuam tshuam dab tsi txog cov xwm txheej kab mob coronavirus sib kis coob tuaj ntxiv no los yog tej neeg uas tau kis tus kab mob no dab tsi. Kuv tsis ntseeg tias muaj feem cuam tshuam dab tsi li."
Yog li ces tej nom tswv zos ntawm cov zos li Brimbank, Casey, Cardinia, Darebin, Hume thiab Moreland thiaj li tau muaj feem yuav mus ua hauj lwm thiab ntsib tej neeg zejzog no ntau tuaj ntxiv thiab lawv yuav mus khob tej neeg qhov rooj thiab qhia tej xov xwm tswj kev noj qab haus huv rau lawv kom paub tiv thaiv kom tej neeg zejzog no paub txog tej xov xwm cuam tshuam txog tus kab mob coronavirus no los yog paub tswj kom tau kev nyab xeeb rau lawv ntawm tej zos uas tseem muaj neeg kis tau tus kab mob no coob heev ntawd.
Tej zos hais no ces yeej muaj tej neeg tsiv teb tsaws chaw nyob coob heev thiab yeej yog cov neeg hais ntau hom lus thiab coj ntseeg ntau yam kev cai dab qhuas uas tsuas hais lus Askiv ua hom lus ob xwb.
Ahmed tau hais tias nws yeej tau ua raws li tej nom tswv tswj kev noj qab haus huv cov kev taw qhia kom tiv thaiv thiab txhob kis tau tus kab mob no, tab sis nws cia li kis tau tus kab mob no los ntawm nws tus muam uas pheej mus ua hauj lwm rau lwm lub zos.
“Kuv tus muam tseem ua hauj lwm thiab tau muaj nws ib tug neeg koom ua hauj lwm ua ke raug txheeb tau tias kis tau tus mob no lawm, yog li ntawd thaum peb hnov txog tsab xo no ces tag nrho peb tsev neeg thiaj tau mus sim seb puas kis tus kab mob no."
“Kuv mloog tau tias pheej mob mob taub hau, mob ib ce, txhaws ntswg thiab khaus qa."
Yog li ntawd nom tswv cov lus qhia rau hnub zwj Feej (Wednesday) tim 24 lub 6 hlis ntuj txog cov chaw muaj neeg kis kab mob coronavirus coob no thiaj tau ua rau muaj neeg sib teev theev tias
Greg Hunt uas yog Australia tus pwm tsav tswj kev noj qab haus huv yeej tau hais tias ''tsoom fwv Australia yeej muaj feem koom tes nrog tej neeg zejzog thiab tej neeg zej zog tsiv teb tsaws chaw tham txog tej xov xwm cuam tshuam txog tus kab mob no ua ntuv zus'' thiab yeej muaj tej xov xwm coj los txhais ua ntau hom lus qhia txog qhov tseeb ntawm tus kab mob no qhia rau tej neeg zejzog no dua ntawm tej xov xwm ua lus Askiv lawm.
Minister for Health Greg Hunt (AAP)
Nws tau qhia meej tias tsoom hwv yeej tau muaj cov rooj sab laj txog li 4500 zaus nrog tej coj ntawm tej neeg tsiv teb tsaws chaw thaib tej coj ntawm tej neeg zejzog lawm.
Ces thiaj li tau muaj tej lub tawm tswv yim no tom qab tau muaj lub koom haum National COVID-19 Health and Research Advisory Committee (NCHRAC) tau coj nws ib tsab ntawv cej luam coj los qhia rau zej tsoom lub hlis dhau los tias muaj ib cov kws paub zoo txog tej dej num no txhawj xeeb heev txog tsoom fwv teb chaws cov kev los khiav tej hauj lwm no qhia rau tej neeg zejzog tsiv teb tsaws chaw.
Lub koom haum NCHRAC kuj tau qhia rau tej tub koom siab ntawm ntau cov neeg zejzog coj ntseeg ntau yam kev cai dab qhuas thiab hais ntau hom lus no tias tej zaum tsoom hwv yeej tsis ua tib zoo npaj thiab tsuas los tham thaum tsim nyog tham xwb los yog tej zaum yeej tsis tham thiab tsis sab laj nrog tej zejzog li los kuj tau," uas tsab ntawv cej luam no hais tias "yog ib cov kev plam lub cib fim zoo."
Yog li ntawd Greg Hunt uas thiaj tau tsis pom zoo nrog lub koom haum no tsav ntawv cej luam tias:
“Kuv yeej tau nyeem zaj xov xwm ntawd lawm thiab nws hais yuam kev lawm," Mr Hunt tau qhia rau tej neeg nrhiav xov xwm rau hnub zwj Feej (Wednesday) thaum nws piav txog ABC tau tshaj txog lub koom haum NcHRAC tsab ntawv cej luam ntawd.
“Txij thaum ntxov ntawd, peb yeej tau koom tes ua hauj lwm nrog tej zejzog uas hais ntau hom lus los yog tej zejzog uas siv ntau hom lus sib txawv thiab lwm cov pawg neeg tsawg lawm."
Ahmed tau hais tias nws tsuas tau tej tswv yim kom paub tiv thaiv kab mob coronavirus hauv Facebook pag los yog Instagram xwb, tab sis tsuas yog cov xov xwm ua lus Askiv xwb.
“Feem ntau mas kuv yeej mus nyeem tsoom fwv tej xov xwm txog cov kev taw qhia txog tus kab mob no ua lus Askiv xwb, kuv thiaj xav tias tsis muaj xov xwm ua lus Arabic ces tej zaum thiaj ua rau muaj tus kab mob no sib kis."
“Nom tswv yeej tau hais kom peb yuav tsum tau cais peb tus kheej 2 limtiam (14 hnub) thiab yog tias muaj tej yam ntxwv mob phem zuj zus tuaj ntxiv ces kom peb hu rau tus xov tooj 000 mas peb thiaj yuav raug coj mus kho ntawm tsev kho mob. Tab sis tam sim no ces lawv yeej niaj hnub hu xov tooj tuaj txheeb xyuas peb txhua hnub tias seb peb tej mob ho zoo li cas lawm."
“Yog tej yam tseem ceeb tiag tiag, yog tej yam phom sij loj thiab yeej muaj tseeb tiag, thiab tsim nyog peb sawv daws yuav tsum tau ua tib zoo saib xyuas peb tus kheej kom zoo, txhob mus koom sib sau coob coob nrog lwm tus neeg, nyob kom nrug ntawm lwm tus neeg, thiab tsis txhob tawm ntawm yus tsev mus ib qho qhov twg tsuas yog tias ntshe yuav tau mus ua ib yam hauj lwm tseem ceeb dab tsi tiag tiag mas mam li mus xwb."
Nws tau hais tias nws tsis xav li cas txawm tias nom tswv yuav txwv kom nruj tshaj no ntxiv rau tej chaw uas tseem muaj neeg kis tau tus kab mob no li yuav tau hais kom tag nrho tej zos cais lawv tus kheej.
“Yog tias tseem muaj tej neeg kis tau tus kab mob COVID-19 no coob tshaj no ntxiv ces ntshe peb yuav tau ua li hais ntawd vim yog tej yam phom sij heev."
Lub koom haum NCHRAC tsab ntawv cej luam los kuj tau qhia tias cov kev tsis muaj peev xwm thov tau Medicare siv, txom nyem nyiaj txiaj thiab ntshai nom tswv yog ib cov txuam thawj ua rau tej neeg pab tsis tau lawv tus kheej tsis xav mus sim seb puas kis tus kab mob COVID-19 no.
