Tau muaj neeg zejzog ntawm xeev South Australia kis kab mob COVID-19 tom qab muaj ib tug neeg ua hauj lwm ntawm ib lub tsev tos txais qhua uas raug siv los cais tej neeg seb puas kis kab mob coronavirus ntawd mob tus kab mob no thiab tau coj los kis rau nws tsev neeg.
Professor Nicola Spurrier uas yog tus coj tswj kev noj qab haus huv ntawm xeev South Australia qhia tias muaj ib tug poj niam hnoob nyoog 80 xyoo raug sim tau tias kis tau tus kab mob coronavirs rau hnub zwj Cag (Saturday tim 14 November 2020) dhau los.
Hnub tim 15 November 2020 no kuj tseem tau muaj ib tug poj niam hnoob nyoog 50 tawm xyoo thiab muaj ib tug txiv neej hnoob nyoog 60 tawm xyoo kuj raug sim hnub no thiab paub tias kis tau tus kab mob coronavirus no thiab.
Professor Spurrier hais tias 3 tug neeg uas kis tau tus kab mob coronavirus no lawv tsev neeg coob heev thiab tseem muaj 4 tug txheeb zes tab tom muaj cov yam ntxwv mob thiab tseem tos cov kev sim seb puas kis los tsis kis tus mob no.
Nom tswv los kuj sam sim mus txheeb xyuas tej neeg ua hauj lwm txog li 90 leej thiab tej neeg mob ntawm lub tsev kho mob Lyell McEwin Hospital nyob ntawm cov zos sab qaum teb ntawm nroog Adelaide uas tej zaum tau nyob ze los yog tau ntsib tus poj niam hnoob nyoog 80 xyoo rau lub caij tus poj niam no mus sim seb nws puas kis kab mob COVID.
Professor Spurrier hais tias - Peb txheeb tau tias muaj neeg txog li ntawm 90 tus neeg cuam tshuam nrog tej neeg no, uas muaj cov neeg ua hauj lwm thiab tej neeg mob tau mus rau ntawm emergency department ces peb thiaj tab tom los txheeb seb ho yuav qhia kom tej neeg no cais lawv tus kheej li cas ntxiv.
South Australia lub tuam chav tswj kev noj qab hauv huv thiaj tab tom nrog txhua tus neeg tau mus rau ntaw Emergency Department ntawm lub tsev kho mob Lyell McEwin Hospital tham lawm.
Hnub tim 16 November 2020 no xeev South Australia muaj neeg kis tau tus kab mob COVID-19 ntau tuaj ntxiv txog 17 leej lawm.
Ces tej neeg no thiaj yog thawj co neeg uas tau kis tus kab mob no hauv tej neeg zejzog txij li lub 4 hlis ntuj los txog tam sim no.
Tsis tas li no los tseem ua rau muaj ib lub teej kawm, ib lub khw muag khoom noj los kuj raug kaw lawm thiab vim ntseeg tias tej zaum muaj feem cuam tshuam nrog 17 tus neeg uas nyuam qhuav kis tau tus kab mob no tshiab thiab.
Ces thiaj tau rov qab ua rau xeev Western Australia tau rov qab los tswj nws cov ciam teb nruj lawm.
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
