Ntsiab lus tseem ceeb:
- Tsoom fwv teb chaws kuj tau qhia txog ntau yam hauj lwm tseem ceeb uas nws yuav tshwm nyiaj pab rau nws cov nyiaj puag xyoo uas yuav coj los qhia tshiab no.
- Treasurer Jim Chalmers yog tus yuav los qhia txog tsoom fwv teb chaws cov nyiaj puag xyoo rau hnub tim 14 lub 5 hlis ntuj (2024).
- Ces thiaj yuav muaj cov kev txo se, cov kev tshwm nyiaj pab daws teeb meem kub ntxhov hauv lub cuab yig thiab cov kev pauv hloov rau tej tub kawm tej nuj nqes.
Tsoom fwv teb chaws tej nyiaj puag xyoo ces yeej ib txwm yog ib hmo tseem ceeb tshaj plaws ntawm nom tswv tej laj fai kum xeeb ntawm nws tej teej cim zwj, thiab xyoo 2024 no ces kuj yuav tsis txawv dab tsi ntau.
Treasurer Jim Chalmers yog tus yuav los qhia txog tej nyiaj puag xyoo rau hmo zwj Quag (Tuesday) tim 14 lub 5 hlis ntuj, tab sis tsoom fwv twb yeej tau qhia txog nws ntau yam hauj lwm tseem ceeb lawm tias yuav tau nyiaj pab cuam.
Nod yog tej uas peb paub dhau los lawm.
Qhov dav dav ntawm tej nyiaj puag xyoo
Cov kev xyuas kom tsoom fwv khwv tau nyiaj tsam ua zum ob yeej tseem yog ib lub hom phiaj ntawm xyoo 2023/24 no.
Thiab raws li tau muaj cov kev rov qab txheeb txog cov kev tau kwv yees txog tej nyiaj puag xyoo nrab xyoo no ces tseem poob peev txog li $1.1 billion rau financial year no, uas ib nyuag poob tsawg zog tej tau kwv yees $13.9 billion uas tau kwv yees tseg rau tej nyiaj puag xyoo tsaib no.
Tej kab theem nyiaj pob nqe los kuj tseem yog ib co tseem ceeb ua rau muaj teeb meem rau tej lagluam uas tsis zoo rau tej nyiaj puag xyoo, tab sis yeej tseem pom tias tej lagluam loj hlob ib nyuag qeeb zog ntawm teb chaws no thiab.
Peb yeej paub tias yog tej yam nyuaj kawg rau tej neeg sawv daws yog li ntawd peb tej cai los tswj tej nyiaj hauj lwm thiab txo se rau txhua tus neeg ua hauj lwm uas yuav tau them se thiaj yog tej yam tseem ceeb heev.Treasurer Jim Chalmers
Cov kev txo se theem peb
Ib yam ntawm ntau yam uas tham txog ntau tshaj plaws ntawm tej nyiaj puag xyoo ces yog uas yuav pib siv txij hnub tim 1 lub 7 hli ntuj (2024).
Yog li cov kev hloov kho cov kev txo se no thiaj yuav pab txhua tus neeg ua hauj lwm them se kom txuag tau nyiaj, thiab tej neeg khwv tau nyiaj tsawg thiab khwv tau nyiaj nrab yog cov neeg uas yuav tau nyiaj los ntawm cov kev txo tej se no ntau tshaj plaws.
Tej neeg ua hauj lwm uas khwv tau nyiaj txog $150,000 los yog khwv tau ntau tshaj ntawd los kuj yeej tseem yuav tau txiaj ntsim los ntawm cov kev txo se, tab sis kuj tsuas tau hauj lwm xwb yog iv rau tej tswv yim txo se thaum xub thawj.
Ces thiaj kwv yees tias tej neeg yuav tau nyiaj theem nrab txog li $1,888 los ntawm cov kev txo se no rau financial year 2024–25 piv rau tej uas tau xyoo 2023-24.
Yuav coj cov kev txo se theem peb uas tau kho dua tshiab lawm coj los siv txij lub 7 hli ntuj xyoo 2024 no mus. Source: SBS / Kenneth Macleod
Lub tswv yim tsim khoom siv ntawm Australia rau yav pem suab (Future Made in Australia Act)
Lub tswv yim Future Made in Australia Act no yuav cuam tshuam txog cov kev tshwm nyiaj coj los pab kom tej lagluam tsis txhob tso tej pa tsis huv rau tej ib puag ncig kom tej lagluam kub siab los nqe peev rau tej hauj lwm no ntau tuaj ntxiv.
Thawj pwm tsav Anthony Albanese tau piav txog tsab cai lagluam ntuav dav tam li ''cov kev rov qab los txhim kho dua Australia cov kev ua lagluam.''
Ces tej cai no thiaj yuav tshwm nyiaj $1 billion los pab cov Solar SunShot program, uas muaj hom phiaj yuav nrog xyuas kom Australia muaj peev xwm koom nrog ntiaj teb tej lagluam tsim tej lagluam siv phiaj ziab tshav tsim hluav taws xob siv kom ntau tuaj ntxiv.
Yuav siv nyiaj $2 billion los lis cov hauj lwm Hydrogen Headstart program, uas txhawb nqa kom los tsim cov hydrogen siv, thiab siv nyiaj $4 billion los ua cov hauj lwm Critical Minerals Facility, uas tsoom fwv Australia yuav ua tus sib cuag nrog lwm tus txog tej hlau thiab tej peev txheej uas yuav coj los tsim tej technologies tshiab, los kuj yog qee yam ntawm tsoom fwv tsab cai no thiab.
Thiab kuj tseem suav cov nyiaj $400 million qev rau Alpha HPA, uas yog ib lub tuam txhab uas yuav tsim kom tau cov aluminium coj los siv tsim tej technology zoo li tsim tej lithium-ion batteries thiab LED lighting, thiab yuav siv nyiaj txog li ntawm $185 million qev rau lub tuam txhab Renascor Resources coj los pab tsim ntau cov project thiab tej chaw lis tej dej num no.
Renascor Resources ces yog ib lub tuam txhab ntawm xeev South Australia uas tseem tab tom tsim ib co project los khawb thiab nchuav kom tau cov thee dub (Graphite) uas siv coj los tsim cov lithium-ion batteries, uas siv rau ntau yam tsis hais tsheb siv hluav taws xob, tej twj siv hluav taws xob thiab tej twj khaws hluav taws xob.
Ces tsoom fwv teb chaws thiaj piv tias tej nyiaj pab tej hauj lwm no yog ib feem ntawm cov hauj lwm "Health Research for a Future Made in Australia" uas tau xub coj los qhia ua ntej nws yuav qhia txog nws tej nyiaj puag xyoo.
Tsis tas li ntawd los kuj yuav siv nyiaj $1.89 billion los nqes peev rau cov hauj lwm Medical Research Future Fund uas yuav ua ntau yam li cancer, kev vaj huam sib luag rau txoj kev kho mob, poj niam tej kev noj qab haus huv, tej mob uas mob ntev, dej caw thiab lwm yam tshuaj kho mob.
Thiab tsoom fwv mam li qhia ntau yam xov xwm qhia txog cov hauj lwm Future Made in Australia kom ntxaws ntxiv rau lub caij tsoom fwv qhia txog nws cov nyiaj puag xyoo.
Me yes thiab tej nuj nqes HELP debt
Tej nyiaj puag xyoo tshiab no kuj yuav pab qee yam rau tej tub kawm thiab tej neeg uas tseem muaj tej nuj nqe kawm ntawv.
Hnbu tim 5 lub 5 hlis ntuj, ces Jason Clare uas yog tus nom tswj dej num kev kawm yeej yuav los ua tib zoo xyuas kom cov nyiaj pab cuam qev siv mus kawm qib siab Higher Education Loan Program (HELP) raws cov indexation rate, uas yuav pab txo tau tej nuj nqe qev los kawm ntawv txog li ntawm $3 billion.
Ces thiaj yuav xyuas kom cov indexation rate no haum raws li cov consumer price index los yog wage price index, seb cov kab theem twg tsawg dua.
Tsoom fwv yeej yuav tshwm ib co nyiaj coj los pab rau tej tub kawm uas tseem kawm ua lees kais, ua nurses thiab social workers uas yuav tau mus xyaum ua hauj lwm tam li yog ib feem ntawm lawv cov kev kawm.
Teeb meem kub ntxhov hauv lub cuab yig
Kuj yuav tshwm nyiaj coj los pab tej poj niam uas yuav tsiv tawm ntawm tej kev txij nkawm/nkauj nraug uas raug kev kub ntxhov thiab kuj yuav yog ib co hauj lwm tseem ceeb ntawm tsoom fwv cov nyiaj puag xyoo uas qhia rau lub 5 hlis ntuj rau lub caij uas Australia tsis muaj peev xwm yuav daws tej teeb meem kub ntxhov ntawm haiv neeg no.
Tim 1 lub 5 hlis ntuj tom qab tau muaj lub rooj sab laj uas thawj pwm tsav koom nrog tej hau xeev (National Cabinet meeting) tau koom ntawd ces tsoom fwv yeej tau kub siab yuav rau lub sij hawm 5 xyoos los tsim cov program Leaving Violence Program pab rau tej neeg tsiv tawm ntawm tej teeb meem kub ntxhov hauv lub cuab yig.
Tej neeg uas muaj cai siv tej kev pab cuam no yuav tau nyiaj txog li $5,000 pab thiab yuav tau siv lwm cov program pab cuam, cov kev txheeb seb puas yuav raug tej teeb meem kub ntxhov thiab npaj kom tau txais kev nyab xeeb.
Thiab tej nyiaj pab cuam no ces yog coj los pab ntxiv rau tej nyiaj $2.3 billions uas tus tsoom fwv Albanese twb ua tam sim no lawm.
Nuj nqes siv ua lub neej
Tsoom fwv los kuj raug tsub nias kom them nyiaj pab rau tej neeg txom nyem ntau ntxiv tuaj thiab.
Ces cov kev txo se theem peb uas tau kho dua tshiab thiaj yog tej yam uas yuav pab tej nuj nqes siv ua lub neej tab sis kuj yuav pab lwm yam thiab suav cov kev txo tej nqe hluav taws xob kom tsawg.
Chalmers tau hais tias tsoom fwv thiab tej nyiaj puag xyoo no ces yog ''ua tib zoo xyuas kom tag nrho tej neeg Australia khwv tau nyiaj ntau ntxiv thiab kom tau nyiaj ntau ntxiv rau lawv.''
Peb yeej paub tias tej neeg ntsib teeb meem nyuaj vim li ntawd peb tej cai los tswj tej nyiaj hauj lwm thiab txo se rau txhua tus neeg ua hauj lwm them se thiaj yog tej yam tseem ceeb heev. Nod yog txhua yam tseem ceeb ntawm cov nyiaj puag xyoo uas yuav pab daws tej nuj nqes siv ua lub neej. Cov kev muaj peev xwm khwv tau nyiaj hauj lwm raws li qhov tsim nyog thiab tau them se kom tsawg dua rau tej neeg ntau dua tuaj ntxiv yog ib feem tseem ceeb pab kom tej neeg khwv tau tej nyiaj uas lawv xav tau thiab tsim nyog tau coj los pab rau tej neeg lawv hlub tshua.Treasurer Jim Chalmers.
Falepili Union nrog Tuvalu
Ua ntej yuav los qhia txog tsoom fwv tej nyiaj puag xyoo no, ces Penny Wong uas yog Australia tus nom txawv teb chaws kuj tau qhia tias yuav kub siab txog lub cov kev koom tes ntawm lub koom haum Australia-Tuvalu Falepili Union.
Cov kev koom tes no yuav muaj cov kev nqes peev nyiaj ntau tshaj $110 millions ntawm Australia coj mus pab Tuvalu tej hauj lwm uas xav tau kev pab cuam kiag tam sim no.
Tej kev pab cuam no ces suav cov kev pab $50 million xyoo 2024-25 pab rau Tuvalu kom muaj peev xwm cab tau cov xov telecommunication hauv qab thu hiav txwv thiab siv $19 million pab rau nws cov hauj lwm Coastal Adaptation Project.
Thiab kuj yuav siv nyiaj $10 million rau nws cov nyiaj puag xyoo tam sim no thiab siv $15 million los tsim lub koom haum National Security Coordination Centre tshiab ntawm Tuvalu.
Haiv neeg cov kev teev zwm tej neeg siv riam phom
Tom qab tau muaj lub rooj sab laj uas thawj pwm tsav thiab tej hau xeev tau koom rau lub 12 hlis ntuj, ces Albanese thiab tej thawj coj ntawm tej xeev kuj tau pom zoo yuav los teev zwm haiv neeg no cov kev siv riam phom.
Cov kev teev zwm tej neeg siv yuav pab kom tej nom tswv muaj peev xwm txheeb tau tej xov xwm tias leej twg siv tej riam phom li cas ntawm tag nrho txhua lub xeev, thiab yuav siv nyiaj txog li $160 million los lis tej hauj lwm no rau lub sij hawm 4 xyoos.
Ces thiaj yuav siv tej nyiaj no yuav laug txog li $100 million los kho tej system tswj tej dej num no, thiab siv $30 million los pab cov hauj lwm teev zwm tej xov xwm no, thiab siv cov seem ntawd los khaws cia kom tau siv coj los kho tej system no kom siv tau zoo tshaj qub ntxiv.
Tej vaj tse nyob
Neeg Australia ces yeej tau ntsib tej teeb meem ntawm yam los ntawm cov kev tsis muaj vaj tse txaus nyob los ntev lawm, hais tsis ntsees rau tsoom fwv tej vaj tse uas pheej yig zog uas tsim coj los rau tej neeg ntiav nyob.
Ces thiaj li yuav siv nyiaj ntau dua li $90 million rau nws cov nyiaj puag xyoo uas tseem yuav coj los qhia tshiab no uas yeej tau npaj tseg coj los pab kom muaj tej neeg paub ua hauj lwm mus ua tej vaj tse ntau tuaj ntxiv.
Tej nyiaj no ces yuav coj mus siv pab them cov sob kawm TAFE dawb thiab pab cov program ua ntej tej neeg yuav mus xyaum ua hauj lwm (pre-apprenticeship) kom thiaj npaj tau tej neeg muaj txuj ci thiab paub ua hauj lwm uas xav tau coj los tsim kom tau tej vaj tse ntau tuaj ntxiv.
Yog li lub koom haum National Housing Supply and Affordability Council thiaj kwv yees tias tsoom fwv teb chaws yuav tsim tsis tau tej vaj tse tshiab raws li tej hom phiaj 1.2 million lub uas tsim txog rau xyoo 2029 ntawd.
Leem thiab kev tiv thaiv teb chaws
Lub 4 hlis ntuj ces , uas muaj cov kev siv nyiaj $50 billion ntau tuaj ntxiv los pab cov hauj lwm tiv thaiv teb chaws rau lub sij hawm 10 tom ntej no.
Ces thiaj li muaj cov kev pab nyiaj rau cov hauj lwm no ib lub xyoos ntau tuaj ntxiv, txhais tias yuav ua rau tej nyiaj siv coj los ua tej hauj lwm tiv thaiv teb chaws no tau ntau tuaj ntxiv ntau tshaj $100 billion rau xyoo 2033-34, thiab tus tsoom fwv Albanese no cov kev nqes peev nyiaj txiaj rau cov hauj lwm tiv thaiv no yuav siv nyiaj txog li $765 billion rau lub sij hawm 10 ntxiv no.
Nyiaj pab tej xwm txheej ntuj qhuav nkig
Kuj yuav siv nyiaj ntxiv txog li $519.1 million coj mus pab tsoom fwv cov hauj lwm Future Drough Fund pab rau tej zejzog nyob rau tej zos ceeb tsam yaj sab kom npaj txhij rau lub caij ntuj qhuav nkig.
Tej nyiaj no muaj lub hom phiaj npaj tej twj rau tej neeg ua liaj ua teb kom muaj peev xwm los tswj tau tej xwm txheej qhuav nkig ntawm lawv tej liaj teb thiab pab kom lawv muaj peev xwm ntxeem nrog tej xwm txheej huab cua pauv hloov.
Ces thiaj yuav siv $235 million mus pab cov program pab kom tej neeg ntxeem dhau ntawm cov xwm txheej ntuj qhuav nkig, thiab kuj yuav siv $137.4 million mus npaj ntau yam tswv yim coj los pab tej neeg cog qoob loo kom paub npaj lagluam thiab kom muaj kev totaub zoo txog tej nyiaj txiaj siv ua lagluam.
Tsis tas li ntawd los kuj yuav tsim ib co program tshiab uas siv ntau yam tswv yim los tswj kom ntsib tej xwm txheej qhuav nkig no kom tsawg zog uas kuj yuav tau nyiaj pab cuam txog li $120.3 million thiab.
-AAP koom tshaj zaj xov xwm no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
