2 tug ntxhais hluas raug tej xov xwm liam tias yog tus yuam tsis ua raws li nom tswv tej cai txwv rau lub caij muaj kab mob coronavirus sib kis ntawm xeev Queensland thiab raug liam tias tau dag tsis qhia qhov tseeb rau tej ntaub ntawv nkawv tau teev thaum tau ncaim ntawm nroog Melbourne mus txog rau nroog Brisbane--ces tom qab txuas ntxiv ntawd nkawv txawm raug txheeb tau tias kis tau tus kab mob COVID-19 lawm.
Tus poj niam 3 uas muaj feem cuam tshuam nrog 2 tug poj niam tau xub hais los ntawd uas yog tus tau nrog nkawv rov qab los ntawm nroog Melbourne mus rau nroog Brisbane ntawd tag nrho lawv ib tug twg kuj raug nplua nyiaj txog li $4,000, raug teem txim tias dag nom tswv thiab tseem yuav raug coj mus hais plaub ntawm tsev hais plaub rau hnub tim 28 lub 9 hli ntuj xyoo no ntxiv.
Katarina Carroll uas yog xeev Queensland tus hau tub ceev xwm tau qhia rau hnub zwj Teeb (Thursday) dhau los tias , "Peb yuav tsis zam rau tej neeg coj tej cwj pwm zoo li no ntawm peb tej ciam teb."
"Kuv xav tias tej tsev hais plaub yuav kub siab tiag tiag los xyuas tej xwm txheej no, vim cuam tshuam rau zej tsoom sawv daws," raws li Carally tau qhia.
tias tub ceev xwm tseem tab tom mus tshuaj ntsuam tej xwm txheej no tias puas yog muaj tej neeg ua txhaum cai tau qhia kom 3 tug poj niam no txhob cais lawv tus kheej. Phau ntawv xov xwm The Australian los kuj tau cej luam rau hnub zwj Teeb (Thursday) dhau los thiab tias ib tug poj niam ntawm 3 tug no tau tab tom raug nom tswv tshuaj ntsuam tias seb puas yog nws nyiag ib hnub hnab nqa ntawm tes uas kim heev--uas nom tswv ntseeg tias raug neeg phem haub kom nyiag lub hnab no thiab nqa xa mus rau lwm lub nroog.
Carroll los yeej tau hais tias 2 tug ntxhais hluas no tau ua rau tej zej zog raug kev pho sij.
“Kuv tu siab heev rau nkawv tam sim no, vim nkawv yeej siv txhua yam tswv yim los dag nom tswv, thiab qhia ncaj nqa lawm yeej yog ib cov cwj pwm neeg ua txhaum cai," raws li Caroll tau qhia rau hnub zwj Teeb (Thursday) dhau los.
Steve Miles uas yog xeev Queensland tus pwm tsav tswj dej num noj qab hauv huv yeej tau qhia rau tej neeg tshaj xov xwm rau thaum sawv ntxov hnub zwj Teeb (Thursday) tias nom tswv yuav mus txheeb tej neeg ntawm cov zos Logan thiab Springfield ntawm nroog Brisbane nrog rau tej kiab khw, khw noj mov thiab ib lub tsev teev ntuj thiab.
"Lawv tau caij fij dav hlau VA 863 thiab VA977 los rau peb lub xeev. Thiab tej nom tswv tswj kev noj qab haus huv Queensland cov neeg uas mus txheeb tej neeg tau nyob ze nrog cov neeg no tab tom mus txheeb tias tus neeg twg tau nyob ze nrog tej poj niam uas caij cov fij dav hlau no lawm," raws li Mr Miles tau qhia.
Tau muaj neeg nug txog tias puas tsim nyog tej chaw tshaj xov xwm cej luam tej xwm txheej no
Kuj tau muaj neeg mus yws tsis txaus siab rau hauv social media txog tej chaw nthuav xov xwm cov kev cej luam txog 2 tug poj niam no. Vim tej chaw nthuav xov xwm no tau siv nkawv tej duab, qhia tias nkawv tau mus sim kab mob coronavirus thaum twg, qhia txog nkawv tej chaw kho mob hauv zos, thiab tej chaw uas nkawv tau mus ncig nrog rau nkawv tej chaw ua hauj lwm tib si rau zej tsoom sawv daws paub.
Steve Gollschewski uas yog xeev Queensland tus lwm hau tub ceev xwm thiaj tsis txaus siab tias ua li cas tej chaw nthauv xov xwm thiab tej social media tseem coj 2 tug poj niam no lub cim thawj coj mus qhia rau zej tsoom sawv daws paub thiab.
"Kuv xav qhia tias kuv tu siab heev rau tej xwm txheej no," raws li nws tau qhia rau lub xov tooj cua ABC Radio Brisbane rau hnub zwj Teeeb (Thursday) dhau los ntawd.
"Peb yeej tau muaj cov kev tshuaj ntsuam los tau ntev uas tseem tsis tau xaus thiab tsis tau tsub txim thiab peb yeej ua tib zoo xyuas kom tau txais kev koom tes los ntawm tej neeeg no, ces cov kev cej luam txog tej neeg no thiaj yuav ua rau muaj teeb meem rau peb tej hauj lwm no."
"Txawm li cas los peb yeej lees paub tias yeej yog lub phom sij heev thiab peb yeej totaub txog tej zejzog txoj kev txhawj xeeb thiab."
Tau muaj ib tug leej niam ntawm ib tug poj niam uas cuam tshuam txog tej xwm txheej no tau qhia rau tsev nthuav xov xwm ABC News tias nws tus ntxhais yeej yog neeg tib yam li lwm leej lwm tus thiab, cov kev tshaj tej xov xwm zoo li no ua rau lawv tsis muaj peev xwm yuav thov tau kev pab cuam dab tsi rau lawv li lawm.
"Kom yus nco tias yog yus ho raug tej xwm txheej zoo li ntawd, es tsis muaj kev pab cuam dab tsi rau yus li, tsis tas li no los tej neeg tseem xav tias yus yog ib tug neeg ua txhaum cai loj thiab, es seb yus ho yuav ua li cas."
"Yeej tsis muaj leej twg yuav xav pab yus li lawm. Thiaj ua rau nws tu siab heev. Nws yog kuv tus ntxhais thiab kuj yog ib tug neeg li lwm leej lwm tus thiab."
Ces thiaj tau ua rau zej tsoom sawv daws nug tias puas tsim nyog coj 2 tug ntxhais hluas no npe coj los qhia hauv tej xov xwm, thiab xam tias yog txhob txwm cej luam txog nkawv xwb tab sis ho tsis cej luam dab tsi txog tej neeg uas tau yuam tej cai nom tswv tau txwv dhau los ntawd.
Amy Remeikis yog ib tug neeg tshaj xov xwm rau phau ntawv xov xwm the Guardian thiaj tau teev txog ib cov piv txwv dhau los uas tej neeg tau yuam tsis ua raws li nom tswv cov kev uas ua rau muaj neeg kis tus kab mob coronavirus hauv tej zejzog tab sis ho tsis muaj tej chaw nthuav xov xwm cej luam tib yam li tej cuam tshuam txog 3 tug poj niam no.
"Peb yeej tsis tuav nkawm niam txiv tau mus rau lub zos Aspen npe li. Peb yeej tsis teev txog tej neeg tau mus koom lub koob tsheej hnub yug 50 xyoo ntawm zos Noosa li. Peb yeej tsis teev txog tej neeg tswj kev ruaj ntseg npe. Thiaj xav kom xaus cov kev pheej yuav liam tus ub tus no rau lub caij tus kab mob coronavirus no muaj kev pauv hloov rau tej neeg txoj kev ua lub neej no. Tej neeg yeej tau ua txhaum lawm. Tab sis cov kev pheej los qhia txog tej neeg no haj yam ua rau muaj teeb meem loj tuaj ntxiv xwb."
Tsis tas li no los kuj tseem muaj lus nug ntxiv tias puas tsim nyog yuav qhia txog 2 tug poj niam neeg African Australia no lub cim thawj rau hauv tej xov xwm thiab.
Tej kev phom sij cuam tshuam txog cov kev los tuav nkawv npe
David Vaile uas yog tus coj lub koom haum ECyberspace Law and Policy Centre tau piav txog tej chaw nthuav xov xwm cov kev cej luam tej xov xwm no tias "yog ib cov cov tswv yim uas txhob txwm mus nrhiav ib tug neeg twg tej xov xwm tsis zoo coj mus tshaj tawm rau lwm tus paub xwb", thiab nws tsis ntseeg tias yuav tau txais txiaj ntsim dab tsi los ntawm cov kev coj tej poj niam no tej xov xwm ntiag tug mus qhia rau zej tsoom paub.
"Vim rau qhov cov kev txhob txwm coj ib tug neeg twg tej xov xwm tsis zoo mus qhia rau lwm tus paub no yog ib cov kev hawv piam sij loj heev, thiab nom tswv yeej lees paub tias yuav ua rau tej neeg cuam tshuam ntawd yuav raug teeb meem tau," raws li Vaile tau qhia rauThe Feed.
"Yog tseem tshaj xov xwm ntau npaum li cas txog lawv rau lwm tus paub thiab ces yuav ua rau muaj kev phom sij rau lawv lub cev ntaj ntsug npaum li ntawd. Vim tej neeg muaj peev xwm tsim teeb meem nyuaj kom lawv txhob muaj peev xwm mus ua tau hauj lwm los yog kom lawv txhob muaj peev xwm mus tau tsev. Ces tej zaum thiaj yuav ua rau muaj teeb meem phom sij loj sai heev rau lawv tau."
Vim yeej tau muaj neeg hawv tias yuav muab qee tus neeg tua pov tseg thiab yuav muab lawv ntaus tom qab uas tau muaj tej xov xwm tsis zoo tshaj tawm qhia txog lawv lawm. Vaile hais tias lub tsam thawj no ces peb yeej pom tias 10 lub xyoo dhau los no yeej tau muaj xov xwm cej luam tsis zoo txog tej neeg cuam tshuam txog tej khoom txhiam laj txhiam xim.
"Thaum tej neeg paub tias lawv yog leej twg lawm, ces muaj neeg yuav xa khoom tuaj rau ntawm lawv qhov rooj, thiab hawv tias yuav ua phem rau lawv los yog txhob txwm ua txoj hu dag ntsuav mus nrog lawv tham."
Vaile hais tias thaum nthuav tej xov tsis zoo txog ib tug neeg twg rau sawv daws paub lawm, ces yeej yuav pib muaj teeb meem loj zujzus tuaj rau tus neeg muaj feem cuam tshuam ntawd. Nws kuj tau piav txog tias tab tom muaj dab tsi cuam tshuam txog 2 tug poj niam no "cov privacy" uas yeej tsis muaj peev xwm yuav daws tau tej xwm txheej no yooj yim kiag li.
"Vim yus yeej tsis muaj peev xwm hloov tau yus lub ntsej muag tshiab, txawm yus yuav hloov mus nyob tau lub tsev tshiab los tsuas kav ib ntus xwb yeej muaj neeg yuav paub yus lawm. Ces thiaj ua rau yus tw kev. Txawm muaj ib tug twg thov txim rau yus los yeej txhais tsis tau tias yuav tau txais kev nyab xeeb li qub rau yus ntxiv lawm", raws li Vaile tau qhia.
Yog li ntawd tej dej num tswj kev noj qab haus huv uas tsim nyog coj los siv rau lub caij muaj kab mob COVID-19 no thiaj tau tsim ib cov kev sib cav, thiab Vaile hais tias, tsis tsim nyog yuav coj tej xov xwm txog tej poj niam no ntau npaum li no los qhia rau zej tsoom paub lawm.
"Vim yeej muaj tej xov xwm feem ntau raug tej nom tswv tswj zej tsoom cov kev noj qab haus huv yeej tau coj los qhia txaus rau sawv daws paub txog lawm," raws li Vaile tau qhia.
Yog li ntawd qhov teeb meem loj tshaj plaws txog cov kev tham txog ib tug neeg twg cov privacy no yuav tsum tau ua tib zoo los xyuas tias seb yuav muaj tau teeb meem phom sij tau npaum li cas thiab ho yuav muaj kev cuam tshuam npaum li cas rau ib tug neeg twg txoj kev ua lub neej, uas Vaile hasi tias, yuav muaj peev xwm ua rau muaj teeb meem phoj sij rau tus neeg ntawd cov privacy los yog lwm tus neeg tsis cam hwm txog tus neeg ua tej yam dhau nrom nrim rau ib tug neeg twg cov privacy lawm thiab.
"Thiab tag nrho tej hais los ntawd los tsis yog ib yam dab tsi uas yuav pom tseeb tseeb kiag, vim tej neeg raug cov teeb meem no yeej yuav tsis tawm mus rau zej tsoom tej chaw es hais qhia rau lawv paub tias kuv lub neej puas tsuaj tag lawm," raws li Vaile tau qhia.
Vaile hais tias tom qab peb txheeb tau qhov tseeb lawm ces yeej yuav tsis muaj peev xwm ua tau dab tsi los tiv thaiv tau tus neeg raug tshaj xov xwm tsis zoo ntawd li lawm, thiab yuav tsis muaj xov xwm dab tsi qhia txog tias ho tau muaj dab tsi tshwm sim ntxiv rau tej neeg raug cov teeb meem no thaum zej tsoom hnov qab txog tej xwm txheej no lawm, tab sis Vaile hais tias, tej neeg yeej tseem ntau nqe yuam kev rau cov neeg cuam tshuam txog tej xwm txheej no.
"Qhov no txhais tau tias, feem ntau ces tej neeg dog dig los yog tej neeg tshaj xov xwm yeej tsis muaj peev xwm yuav luj tau tias yog thau tshaj tej xov xwm ib yam dab tsi tsis zoo txog ib tug neeg twg lawm ne puas yog tias ua dhau cai zog lawm uas tej zaum ho yuav muaj tau kev phom sij tau rau tus neeg ntawd thiab," raws li Vaile tau qhia.
