Cov kev tawm tsis nrog yus tsev neeg nyob thiab yus mus nyob yus ntawm Australia tej neeg zejzog coj ntseeg ntau yam kev cai dab qhuas thiab hais ntau hom lus yeej yog tej yam sib chab sib chaws heev. Vim hauv yim neeg los yog lub zejzog ntawd yeej tseem xav kom tus hluas ntawd yuav tsum nrhiav tau ib txoj hauj lwm ruaj ua thiab txuag tau nyiaj me ntsis lawm los yog muaj cuab yig lawm ua ntej lawv yuav tawm ntawm lawv tsev neeg mus.
Txawm tias tus zauv nrab teev txog Australia tej hluas cov hnoob nyoog yeej tau maj mam nce siab zujzus tuaj rau ntau lub xyoo no lawm, los tej hluas yeej tseem xaiv nrog lawv niam lawv txiv nyob kom thiaj txuag tau nyiaj mus yuav ib lub tsev.
Tus zauv hnoob nyoog nruab nrab ntawm tej ntxhais hluas yog 24 xyoos hos tej tub hluas yog 23 xyoos.
Sara uas yog ib tug ntxhais hluas hnoob nyoog 27 xyoo yeej nrog nws tsev neeg nyog ntev tshaj tus zauv hnoob nyoog nrab thaum nws tau txiav txim siab tawm mus nyob nws kheej tsaib no lub 12 hlis ntuj.
Nws yog ib tug neeg Australian caj ceg neeg Eritrean thiab ntseeg tias yog tej yam ua rau nws niam nws txiv tsis nkag siab tias vim li cas nws thiaj tsis nrog lawv nyob lawm.
Nws qhia tias yeej yog ib cov kab lis kev cai uas yus yuav tsum nrog yus tsev neeg nyob kom ntev npaum li ntev tau rau lub caij yus loj hlob -- ces nws txoj kev txiav txim siab tawm mus nyob kheej no thiaj rau lwm tus pom tias tsis yog tej yam zoo.
Sara tau qhia rau The Feed tias "Kuv xav tias zoo ib yam li txoj saw hlau sib txuas uas pheej khi los yog rub kom yus nyob twj ywm hauv tsev. Thiab zoo tib yam li cov kev tso tseg los yog tus ncua tsis nrog yus tsev neeg nyob ua ke, sib cuag mus los los yog ua ib yam ua ke ntxiv lawm yog thaum yus tawm tsev mus nyob yus lawm."
Sara thiaj ntshai tias tsam nws txoj kev xaiv ncaim ntawm nws tsev neeg mus yuav ua rau nws tsis muaj peev xwm sib cuag mus los tau nrog nws cov neeg zejzog Eriteran lawm thiab ntshe yuav muaj kev sib cov nyom txog txoj kev sib raug zoo nrog nws tsev neeg.
Ms Soo-Lin Quek uas yog tus coj ntawm xeev Victoria lub koom haum pab cuam rau ntau haiv neeg coj ntseeg ntau yam kev cai dab qhuas thiab hais ntau hom lus tej hluas (Centre of Multicultural Youth (CMY)) yeej ntshai heev thaum lawv tau sab laj nrog tej hluas ntawm tej zejzog no rau lub caij lawv tawm ntawm lawv tsev neeg mus nyob rau lwm qhov.
Ms Quek tau qhia rau The Feed tias "Tej hluas yeej ib txwm hais tias cov kev ncaim yus tsev neeg mus ces yeej zoo tib yam li yus ncaim yus lub zejzog lawm thiab. Yog li kuv thiaj tsis xav ncaim ntawm kuv tsev neeg mus vim kuv tsis xav kom muaj txoj kev plam kev tu ncua rau tej kev sib cuag mus los nrog kuv tej neeg zejzog. Tab sis yog ib tug neeg dawb ces txawm lawv ncaim ntawm lawv tsev neeg mus lawm los lawv tseem muaj feem nrog rau cov neeg dawb tej kab lis kev cai."
Vim rau qhov muaj ntau yam sib chab sib chaws cuam tshuam nrog lub caij uas tej hlaus ntawm cov neeg zejzog ntseeg yam kev cai dab qhuas thiab hais ntau yam lus thaum lawv tawm tsev, ces The Feed thiaj tau nrog 2 tug hluas ntawm tej zejzog no uas tau tawm ntawm lawv tsev mus tsaib no tias cov kev tawm tsev yus mus nyob yus no ho zoo li cas tiag.
'Zoo li yus ris ib lub nra saum yus xwb pwg'
Dillon South uas yog ib tug hluas muaj hnoob nyoog 22 xyoos thiab yog neeg Australian caj ceg neeg Malaysian-Indian - hais tias nws yog thawj tus neeg ntawm nws tsev neeg uas tau tawm tsev mus nyob nws tus kheej lawm tom qab uas nws ib tug phooj ywg tau ntiav ib lub tsev nyob ntawm Brunswick, vim nqe ntiav tsev pheej yig thiab pab kom nws tau txais kev ywj pheej.
Dillon tau qhia rau The Feed tias "Txawm tias kuv tau txiav txim siab kiag tam sim ntawd lawm tias yus xav tawm tsev mus nyob yus tus kheej kiag tam sim ntawd lawm, los kuv yeej paub tias kuv yeej tseem yuav tau mus nrog kuv niam thiab kuv txiv tham txog qhov no ua ntej tso."
Tab sis yeej tsis yog ib cov kev sib tham uas Dillion lam xav ua xwb tab sis yeej xav ua tiag tiag, vim nws yog ib tug neeg ntawm cov neeg pawg tsawg thiab, ces thiaj yuav tau ua tib zoo xyuas kom lwm tus ntseeg thiab tso siab thiab yuav tau npaj ntau yam nrog. Nws yeej tau xyaum thiab npaj tias thaum nrog nws niam nws txiv tham yuav hais li cas, vim lawv yeej xav kom nws kawm tiav, nrhiav tau hauj lwm ua tso mam li tawm tsev.
"Vim yog tham txog cov kev tawm tsis nrog yus tsev neeg nyob ntawd yog tej yam tseem ceeb heev...yog li kuv thiaj yuav tsum tau npaj ib lub tsev yim coj los qhia rau lawv paub."
Ms Soo-Lin Quek uas yog tus coj cov program pab cuam tej hluas ntawm tej neeg zejzog hais ntau hom lus thiab coj ntseeg ntau yam kev cai dab qhuas (Centre for Multicultureal Youth-CMY) hais tias nws los yeej poob rau cov xwm txheej tib yam li Dillion thiab yuav tau ua tib zoo xav zoo zoo tso ua ntej ib tug hluas yuav txiav txim siab tsis nrog lawv tsev neeg nyob lawm. Nws thiaj hais tias feem ntau mas yeej yog ib cov xwm txheej uas tsis yog yuav tau npaj yus tus kheej kom yus tawm tau mus nyob yus xwb tab sis yuav tsum tau npaj seb yuav qhia li cas rau yus tsev neeg thiab.
Dillon South, 22, is a Malaysian-Indian Australian - he is the first person in his immediate family to leave home. Source: Supplied
Nws hais tias "Tsis yog tej yam dab tsi ua tej hluas pw tsim sawv los ces xav mus ces cia li mus, thiab cia li hais tias tag kis ces kuv tawm tsev lawm no xwb."
Sara los yeej zoo tib yam li Dillion uas yuav tau npaj ib cov tswv yim ua ntej nws yuav tawm tsev tsis nrog nws niam thiab txiv nyob thiab.
Nws yeej tau mus ua hauj lwm tu thiab zov lwm tus tej vaj tse rau lub caij lawv tsis nyob tsev los tau 2-3 xyoos dhau los lawm thiab, xws li nws yeej tau siv sij hawm li 6 hli mus nyob thiab tu lwm tus lub tsev thiab ncaim nws tsev neeg rau ib lub caij twg -- uas yog ib lub tswv yim npaj qhia rau nws niam thiab txiv ua ntej uas nws yuav tawv tsev mus nyob nws tus kheej thaum kawg lawm.
Sara nco tau tias "Zoo li yus ris ib lub nra rau saum yus xwb pwg ntag yog tham txog tej yuav tau npaj kom yus tawm tsev mus nyob yus kheej no."
Raws li Sara tau qhia ces qhov nyuaj mas yus tsev neeg yog tej yam tseem ceeb dua, vim cov kev tsiv teb tsaws chaw tuaj rau teb chaws Australia no ces yeej muaj tsawg tus thiab yog yus cov neeg tib tug roj tug ntsha uas sib txheeb ze los yog yus tib tsev neeg xwb.
Xaiv txoj xub kev uas yus yeej tsis npaj tias yuav taug
Ms Quek hais tias txawm tias yus tau loj hlob ntawm teb chaws Australia no, los tej hluas ntawm ntau cov neeg zejzog coj ntseeg kev cai dab qhuas thiab hais ntau hom lus no yuav tsum tau ua raws li tej uas lawv tsev neeg xav kom lawv ua los yog ua raws li tej kab lis kev cai ib txwm coj thiab cov kev ua lub neej nyob ntawm lub teb chaws Australia no nrog thiab.
Nws hais tias "Yog li thiaj ua rau muaj kev cov nyom ntawm ob cov kab lis kev cai ces thiaj yog tej yam tsis yooj yim rau tej hluas no yuav los ua tus sib khom tau tej xwm txheej no kheej."
Dillon niam thiab txiv yeej nkag siab txog nws cov kev xav tawm tsev mus nyob nws kheej tab sis kuj txhawj tias tsam nws tej txheeb ze ho yuav xav li cas rau nws cov kev txiav txim siab tawm tsev no, ces nws thiaj tsis qhia lawv thaum nws xub tawm mus nyob nws kheej rau lub sijhawm thawj 2-3 hlis ntawd thiab.
Nws tiaj tau txiav txim siab tawm tsev mus ntsiag tos vim nws txhawj tias nws tej txheeb ze ho yuav xav li cas rau nws. Dillion tseem tab tom kawm cov sob kawm philosophy (uas kawm txog ib lub tswv yim los yog txoj kev xav kom siv los ua cov tswj xeeb ceem los yog kawm txog ib cov txuj ci, qhov tseeb thiab cov kev tshwm sim ntawm txhua yam), thiab nws yeej ua hauj lwm part-time ntawm Woolworths thiab tseem tab tom sau ib phau ntawv dab neeg.
Nws hais tias "Thiaj ua rau lwm tus pom tias, nws npaj yuav tawm mus nyob nws kheej lawm, nws tseem kawm qib siab thiab ua hauj lwm thiab tseem xav sau ib phau ntawv dab neeg thiab."
"Tag nrho tej hais no kuj tsis yog ib cov teeb meem dab tsi, tab sis yog tham rau lawv (yus niam yus txiv thiab yus tsev neeg los yog tej neeg zejzog ) lawm ces yog ib cov kev phom sij loj heev."
Tab sis thaum nws tej txheeb ze paub tias nws xav tawm tsev mus nyob nws lawm ces nws thiaj tau los cog lus rau nws niam thiab txiv tias nws yeej yuav ua tib zoo xyuas kom nws muaj peev xwm kawm tau ntawv thiab ua tau hauj lwm part-time - txawm tias thaum nws kawm txog nrab ntaws nws yuav tau ncua tsis kawm ib ntus rau lub caij tseem muaj tus kab mob coronavirus sib kis ua zaum 2 ntawm nroog Melbourne.
Nws hais tias "Kuv yog neeg Australia caj ceg neeg Malaysia thiab India. Ces thiaj tsis muaj kev vam kev cia siab tias xav kom kuv yuav tsum ua ib cov hauj lwm uas lawv xav kom kuv ua, thiab tej zaum tsuas tau ua tej hauj lwm tswj kev ruaj ntseg xwb. Ces lawv thiaj tsis xav li cas txawm kuv yuav ua dab tsi li tsuav muaj ib yam qhia meej lawm tias kuv yuav pab tau kuv tus kheej lawm xwb."
Sara los yeej yog ib tug uas tsis ua raws li nws tsev neeg cov kev vam kev cia siab los tau ntau xyoo lawm thiab, vim tej nws nyiam ua ntawd yeej txawv tej nws tsev neeg xav kom nws ua. Ces thiaj ua rau nws tsev neeg ceeb thaum lawv paub tias nws nyiam mus taug kev nce roob thiab mus pw hav zoov los yog nyiam mus haus cawv ntawm tej pub nrog nws tej phooj ywg.
Nws hais tias lawv yeej xav kom ua twj ywm tsis txhob cav ub cav no thiab ua ib tug leej niam zoo zov me nyuam hauv tsev xwb.
Nws thiaj hais tias "Kuv xav tias ntuj yeej tsim kom ntiaj teb pom thiab paub txog poj niam tsis yog pheej yuav mloog lwm tus hais nkaus xwb."
Nws yeej tseem nco tau tias nws yuav tau tshab txhais rau nws ib tug txiv ntxawm tias vim li cas nws thiaj tsis muaj sij hawm los ntxuav tais thiab hais kom lawv ntxuav lawv. Tab sis Sara cov kev muaj peev xwm los hais taus thiab los txiav txim siab rau nws tus kheej no yeej tsis yog tej yam yooj yim li, vim thaum nws tham nws tej lus ces tseem raug lwm tus pom tau tias nws tham li ib tug me nyuam yaus tham thiab ho tham li ib tug neeg muaj hnoob nyoog tham thiab -- ces thiaj yog tej yam ua rau nws nyob tib leej kho siab khuav vim tsis muaj neeg nkag siab txog tej nws ua li.
Nws hais tias "Ces thiaj zoo li kuv raug cai tsis muaj feem koom nrog kuv tsev neeg lawm."
Ntau yam ua rau yus ceeb thaum yus tsis nrog yus tsev neeg nyob lawm
Dillon hais tias nws niam thiab nws txiv kuj cam hwm nws txij li thaum nws tawm tsev tsis nrog lawv nyob lawm. Nws ntseeg tias zoo li lawv muaj txoj kev sib raug zoo tam li tej neeg paub tab lawm, vim 6 hlis dhau los nws yeej muaj peev xwm ua tau nws lub neej yam tsis muaj teeb meem dab tsi lawm.
Nws hais tias " Kuv yeej muaj txuj ci ntau yam yuav ua tau lub neej nyob hauv lub ntiaj teb no lawm. Txawm ua noj ua haus los thaum kuv los txog tsev lawm tsuas siv sij hawm 20 ntiag tiv xwb ces yeej ua tau ib plua mov noj lawm. 6 hli dhau los ces kuv tseem muab cov hmoov qhiav daj xyaw kuv cov pasta thiab siv sij hawm 3 teev los ua cov pasta no tab sis tseem ua lauj kaub tais diav kub hnyiab thiab."
Hos tham txog Sara los nws yeej tshab txhais tias nws niam thiab nws yeej muaj txoj kev sib raug zoo yam tsis tau pom muaj dua los li thiab. Nkawv yeej tau mus sib ntsib haus kasfes ua ke rau thaum 2 hnub so ntau zaus sib tham sib nug moo thiab tham txog ntau tsav yam uas nkawv tsis tau tham txog dua los li thiab.
Nws hais tias "Kuv tsis paub tias yog tias peb nyob tib lub tsev txhua sij hawm xwb xyov peb puas yuav muaj peev xwm tham txog tej kev sib tham li ntawd."
Sara hais tias nws ua rau nws xav ntau yam kawg tab sis lo lus nws siv coj los qhia txog nws txoj kev sib raug zoo nrog nws niam tam sim no ces yog tej yam uas: ua rau nws txaus siab kawg nkaus li lawm.
"Txawm tias wb yuav nyob sib nrug los wb yeej tau siv tej lus tham txog wb txoj kev sib hlub tau zoo tshaj plaws tam sim no lawm."
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
