Koj puas paub tias teb chaws Australia siv cov tshuaj COVID-19 vaccine hom twg coj los hno rau nws tej pej xeem tiag?
Raws li tej nom tswv tswj dej num taw qhia cov kev hno tshuaj vaccine (Australia Technical Advisory Group on Immunition-ATAGI) cov kev pom zoo ces yeej tso cai siv cov tshuaj Pfizer vaccine rau tej neeg hnoob nyoog qes dua 60 xyoo rov hauv, thiab siv cov tshuaj AstraZeneca vaccine hno rau tej neeg hnoob nyoog tshaj 60 xyoo rov sauv xwb vim txhawj xeeb txog tej teeb meem uas tus tshuaj AstraZeneca ua rau ib txhia neeg hnoob nyoog qes dua 60 xyoo ntshav khov raws li
Tab sis hnub Monday dhau los, Australia tus thawj pwm tsav Scott Morrison tau tawm ib cov lus tawm tswv yim tias tag nrho txhua cov neeg muaj hnoob nyoog sib txawv yeej muaj peev xwm rov qab hno tau tus tshaj AstraZeneca thiab:
"Nws hais tias - yog nej xav hno cov tshuaj AstraZeneca vaccine ces nej yeej muaj peev xwm mus sab laj nrog nej tej kws kho mob tau."
Mloog tau zaj xov xwm no ua suab (Podcast) tau ntawm no:
Greg Hunt uas yog Australia tus pwm tsav (Minister) tswj laj fai noj qab haus huv hais tias: "Pawg nom ATAGI yeej tu qhia meej lawm tias yog ib tug neeg twg yeej tau ua tzib zoo txiav txim siab zoo lawm ces lawv kuj muaj peev xwm hno tau cov tshuaj AstraZeneca no thiab. Thiab peb yeej tseem tsis tau hloov tej tshuaj uas ATAGI teev tseg kom hno
Cov lus tawm tswv yim no thiaj tau ua rau qee tus nom tswv xeev tsis pom zoo.
Dr Jeannette Young kuj yog ib tug tsis pom zoo thiab tau hais tias:
"Kuv tsis xav kom tej neeg hnoob nyoob qes dua 40 tawm xyoo hno cov tshuaj AstraZeneca. Kuv tsis xav kom ib tug neeg 18 xyoo ntawm Qeensland tas sim neej los ntawm cov teeb meem ntshav khov, thiab yog lawv kis tau tus kab mob COVID los tej zaum lawv kuj yuav tsis tuag."
Thiaj ua rau Dr Kerry Chant uas yog tus nom tswj kev noj qab haus huv ntawm xeev New South Wales hais tias kom yuav tsum ceev faj thiab tsis xav kom tsoom fwv muab nws lub tswv yim no los cuam tshuam nrog tej chaw hno tshuaj vaccine uas hno tau rau tej neeg coob ntawd.
"Yog tej yam zoo uas ATAGI yeej tau hais lawm tias nyob ntawm seb tej neeg xav xaiv hno cov tshuaj twg xwb tab sis yuav tsum tau ua tib zoo qhia rau tej neeg no kom paub zoo txog tej tshuaj no thiab ua tib zoo txiav txim siab kom zoo tso. Kuv thiaj tsis ntseeg tias tej chaw hno tshuaj vaccine rau tej neeg coob coob no yuav yog ib cov chaw muaj peev xwm los qhia tau txog tej kev phom sij ntawm tej tshuaj no ntxaws rau tej neeg."
Daniel Andrews uas yog tus hau xeev Victoria los kuj tau hais tias:
"Tsis xav kom tej neeg sawv daws mloog cov kev tawm tswv yim los ntawm tej nom tswv, yog thaum cuam tshuam txog cov kev kho mob lawm ces yuav tsum tau sab laj nrog tej kws kho mob xwb."
Thiaj tau ua rau Mark McGowan uas yog tus hau xeev Western Australia txhawj xeeb txog tej xwm txheej no thiab thiab tau tawm tswv yim tias:
"Yog koj mus sab laj nrog 10 tus kws kho mob ces yeej yuav tau 10 cov kev tawm tswv yim sib txawv, thiaj xav kom mloog thiab ua raws li pawg nom ATAGI cov kev taw qhia txog tej hauj lwm hno tshuaj vaccine no xwb, lawv yeej hais tias kom cov neeg hnoob nyoog qes dua 40 tawm xyoo tsis txhob hno cov tshuaj no (AstraZeneca vaccine)."
Tos ho muaj tej kev rov qab rov quav li no txog nqe lus nug tias tsim nyog tej neeg yuav mus hno cov tshuaj vaccine twg no los twb vim yog thaum lub 2 hlis ntuj xyoo 2021 ntawd lub koom haum Theraputic Goods Administration (TGA) yeej tau tso cai pom zoo siv cov tshuaj hno rau txhua tus neeg Australia uas muaj hnoob nyoog 18 xyoo rov sauv los yog muaj hnoob nyoog siab tshaj ntawd tau.
Tab sis vim tau muaj cov kev cej luam tias tus tshuaj no tau ua rau muaj kev cuam tshuam rau tej neeg raug teeb meem ntshav khov, ces ATAGI thiaj tau hloov los siv cov tshuaj Pfizer hno rau tej neeg hnoob nyoog 16 xyoo mus txog rau cov neeg hnoob nyoog tsawg dua 60 xyoo lawm.
Txawm li cas los raws li pej kum tej xov xwm tau qhia ces tsuas muaj tej neeg Australia tsawg dua li 5% thiaj tau mus hno tshuaj COVID-19 vaccine xwb, thiab Australia tseem poob qab deb heev rau cov kev hno tej tshuaj no.
Dr Omar Khorshid uas yog tus coj lub koom haum Australian Medical Association (AMA) hais tias:
"Ib cov kev tib ntawm ntau cov uas lub koom haum AMA yeej pom zoo nrog zej tsoom sawv daws thiab mas yog tsoom fwv tsab xo qhia txog cov kev hno tshuaj COVID-19 vaccine no mas sib cov dhau lawm. Kuv xav tias tej neeg Australia yeej tsis nkag siab txog cov program hno tshuaj vaccine zoo li."
Australia tej neeg tswj ciam teb yeej tau qhia tias tseem muaj tej neeg tuaj rau teb chaws Australia no txog 20% tsis yog pej xeem Australia thiab tsis yog cov neeg nyob ruaj hauv teb chaws Australia no thiab.
Raws li Australia tus thawj pwm tsav Scott Morrison tau qhia rau hnub tim 02.07.2021 tom qab tau koom pawg nom tswj tej kab mob COVID-19 (Natona Cabinet) lawm, ces Mr Morrison thiaj hais tias tsuas xav kom siv cov kev los kaw xeev thiab txwv tej neeg ua lub tswv yim kawg uas yuav tau ua kom tiv thaiv tsis txhob pub muaj neeg kis kab mob COVID-19 tshiab ntxiv xwb. Tib lub caij no los tsoom fwv kuj tau pom zoo tsuas pub cov neeg txawv teb chaws tuaj rau Australia no txog 50% lawm xwb thiab mam li nrhiav kev pab tej neeg Australia uas tseem khuam daig txawv teb chaws raws li qhov tsim nyog xwb, tab sis yeej tau ceeb toom tias ntshe tus kab mob Delta varient no yuav ua rau muaj teeb meem rau Australia cov kev los tiv thaiv tej xwm txheej no thiab, tom qab uas hau xeev Annastacia Palaszczuk tau hais kom tsoom fwv Australia tsis txhob pub tej neeg txawv teb chaws uas tsis tau hno tshuaj vaccine tuaj coob rau teb chaws Australia.
"Mr Morrison hais tias tau ua rau peb tsis tshua muaj peev xwm tswj tau tej neeg caij dav hlav rov qab los rau teb chaws Australia no lawm, yog li tsoom fwv teb chaws mam li ua tib zoo los xyuas kom tswj tau thiab pab tej tej fij dav hau raws li qhov tsim nyog. Yog tias tsuas kis tsawg tsawg xwb ces tsis tsim nyog yuav muab peb tej xeev kaw ntxiv lawm, yuav tau npaj tej tshuaj vaccine coj los hno txhab ntxiv rau tej neeg, yuav tso cai rau tej neeg uas twb tau hno tshuaj vaccine txwm mus los tau, yuav tsis txwv tej neeg ncig teb chaws rov qab los uas tau hno tshuaj vaccine 2 koob lawm, yuav tsis txwv tej neeg twb tau hno tshuaj vaccine mus txawv teb chaws lawm thiab yuav tsis txwv cov kev mus ncig rau tej teb chaws uas tau pom zoo mus los tau nrog Australia los yog cov teb chaws tshiab uas tseem yuav ua tej hauj lwm no ntxiv lawm."
Txawm li cas los hnub tim 02.07.2021 no yeej muaj neeg kis tau kab mob 31 tug tshiab ntawm New South Wales ces thiaj tau ua rau hau xeev Gladys Berjiklian hais kom tej neeg nyob twj ywm hauv tsev tsuas tawm thaum tseem ceeb tiag tiag xwb, thiab tsis xav kom tej neeg ua hauj lwm uas tsis xis nyob thiab muaj tej yam ntxwv me ntsis lawm mus ua hauj lwm.
Queensland kuj muaj 3 tug neeg kis tau kab mob COVID-19 tshiab, ib tug ces cuam tshuam nrog tus neeg ua hauj lwm sib kis ntawm tshav dav hlau, hos 2 niam ntxhais ces yog cov neeg nyob ntawm lub zos Carindale.
Thiaj ua rau hau xeev Annastacia Palaszczuk hais tias ntshe tsheem yuav muab Brisbane thiab Moreton kaw 1 hnub ntxiv.
Tsis tas li ntawd los kuj yuav tsis txwv ntau cov zos uas raug kaw los tau 3 hnub dhau los rau ho no lawm tab sis yeej tseem hais kom tej neeg yuav tsum siv ntaub npog qhov ncauj thaum mus siv public transport txuas ntxiv li 2 limtiam ntxiv. Thiab tsuas pub 30 tus qhua mus xyuas tau ib tse neeg twg xwb tab sis tej neeg no yuav tsum nyob kom nrug ntawm lwm tus li 4 metres xwm meem.
