Tej zaum tej neeg uas xav ras los ua neeg Australia yuav tsum tau teb qee cov lus nug txog lub tswv yim tsis nyiam tej neeg Jews ua ntej yuav tau los ua pej xeem Australia yog tias pab nom koom tswj (Coalition) yeej los ua tsoom fwv teb chaws Australia lub 5 hlis ntuj xyoo 2025 no.
Pab nom koom tswj tau qhia tias nws yuav txhab ib co lus nug rau cov kev xeem ua pej xeem kom txheeb seb tej neeg ho xav li cas rau tej neeg Jews rau lub caij nws thov los siv ib co tswv yim coj los daws tej xwm txheej ua rau muaj txoj kev txhawj xeeb tsam tsis tau txais kev ruaj ntseg ntau tuaj ntxiv.
Peter Dutton uas yog tus coj ntawm lwm pab nom teb chaws tau hais tias tej lus nug no yuav pab kom tej neeg xeem paub txog Australia tej cai coj taug ua zoo rau lub caij uas lawv tseem xeem ua pej xeem Australia ntawd.
Nws tau qhia rau tej neeg nthuav xov xwm tias ''Kuv xav tias txog caij lawm uas yuav tsum tau siv peb tej cai coj taug ua zoo thiab kom tej neeg paub meej tseeb.''
Peter Dutton uas yog tus coj ntawm lwm pab nom teb chaws tau hais tias tej lus nug tshiab uas yuav coj los txhab ntxiv rau tej lus nug thaum xeem ua pej xeem Australia yuav pab kom tej neeg xeem ua raws li Australia tej cai coj taug ua zoo. Source: AAP / Lukas Coch
Nws tau qhia rau ABC Radio hnub zwj Feej (Wednesday) sawv ntxov tias:
"Peb yuav kho peb cov kev xeem ua pej xeem kom zoo tshaj qub ntxiv, ua zoo xyuas kom muaj ib co lus nug tsi ntsees nug txog ib yam dab tsi ntxiv txog tej kev tawm tsam tsis nyiam tej neeg Jews vim rau qhov peb tau pom tias tau muaj kev tawm tsam tsis nyiam tej neeg Jews ntau heev ntawm lub teb chaws no. Thiab tej neeg uas tuaj rau lub teb chaws no los peb yuav tau ua zoo xyuas kom ntseeg tau siab tias lawv yuav tsis coj tej cwj pwm uas tsis tsi nyog li peb tau pom tsis ntev los no.''
Ces thiaj yuav muaj ib lo lus nug ntxiv nug tias puas yog tej yam tsim nyog uas pheej tsis hwm tej neeg Jews, raws li phau ntawv xov xwm Nine Newspapers tau tshaj tawm.
SBS News kuj tau hu nrog Dan Tehan uas yog tus nom tswj tej dej num tsiv teb tsaws chaw ntawm lwm pab nom teb chaws tham kom paub tseeb tias seb ho yuav kho cov lus nug xeem pej xeem no li cas thiab seb puas yog nws twb tau tsim tau lo lus nug no li cas lawm.
Yog tham txog tej xov xwm ntxaws txog lub tswv yim no ces thawj pwm tsav Anthony Albanese thiaj hais tias tsuas yog ''ib co kev xav xwb''.
Nws tau hais tias "Peb mam saib seb yuav zoo li cas, ntau teev dhau los, nag hmo ces zoo li txog thaum tav su ces twb tsis muaj neeg kub siab txog lawm sub.''
Ces thiaj tau muaj cov kev thov kho tej lus nug xeem pej xeem no tom qab tau ib hnub uas Peter Dutton tau hais tias yuav tsis pub tej neeg ua pej xeem rau ob lub teb chaws (Australia thiab ib lub teb chaws txawv teb chaws) uas ua txhaum cai loj ua pej xeem Australia ntxiv lawm.
Pab nom koom tswj los kuj tsis sib haum xeeb txog tej hauj lwm no thiab, vim tus nom kis xeev siab Michaelia Cash hais tias ''yeej tseem yuav tau sab laj txhua yam tso'', thiab yeej ''tsis muaj lub tswv yim'' yuav los tso cai rau zej tsoom Australia tawm suab kho txhooj cai tswj haiv kom siv tau tej fwj chim no.
Germany tau siv ib co lus nug nug tej neeg thov xeem ua pej xeem
Lwm pab nom teb chaws thiaj npaj lub tswv yim muaj ntsis zoo sib xws li tej tau muaj kev pauv hloov rau Germany cov kev xeem pej xeem xyoo 2024 rau lub caij tau muaj neeg tawm tsam tsis nyiam neeg Jews ntau tuaj ntxiv.
Ces tam sim no Germany thiaj muaj ib co lus nug rau tej neeg uas xav thov xeem los ua pej xeem kom teb txog lub tswv yim tawm tsam tsis nyiam tej neeg Jews, teb chaws Israel thiab tej xwm txheej tua neeg Jews npoj nroj ntsuab Holocaust.
Germany now asks potential citizens additional questions about antisemitism, Israel, and the Holocaust. Source: SBS
Cov kev txhawb nqa kom muaj tej lus nug xeem pej xeem 'nug txog txhua cov kev ntxub tsis nyiam ib tsav neeg twg nrog thiab'
Dr Hass Dellal uas yog tus coj lub koom haum Australian Multicultural Foundation thiaj zoo siab rau cov kev thov hloov no tab sis qhia tias tsim nyog tej lus nug ntawd yuav tsum nug txog txhua cov kev ntxub tsis nyiam ib tsav neeg twg.
Nws tau hais tias cov kev ntxub ''yog tej yam yuav tsis nyog rau lub teb chaws Australia uas muaj ntau tsav neeg coj ntseeg ntau yam kab lis kev cai.''
Dr Dellal tau qhia rau SBS News tias "Cov kev xeem pej xeem no raug tsim coj los txheeb ntau yam li seb nkag siab txog teb chaws Ausralia, lub luag hauj lwm thiab tej txiaj ntsim yuav tau los ntawm cov kev ua ib tug pej xeem li cas, thiab cov kev totaub thiab cov kev kub siab pab teb chaws Australia ua ntej tshaj plaws, thiab yoog ua raws nws tej cai coj tau ua zoo raws kev ywj pheej, kev hwm, thiab vaj huam sib luag,''
"Yog tham raws nqe no lawm ces tsim nyog cov kev xeem ua pej xeem no muaj tej lus nug kuav tag nrho txhua cov kev ntxub tsis nyiam ib tsav neeg twg tsis yog teev txog tib co xwb vim yuav ua rau muaj qhov tsis zoo uas peb tsis faj txog.''
Dellal kuj yog ib tug us tau los txheeb xyuas cov hauj lwm Multicultural Framework tsaib no uas txheeb txog cov kev pauv hloov tej cai thiab cai lij choj uas pab kho kom siv tau lub tswv yim multiculturalism zoo tuaj ntxiv.
Ntawm 29 cov lus taw qhia ces muaj ib nqe hais kom los txheeb txog tej txheej txeem xeem ua pej xeem Australia li kom xyuas kom muaj tej lus nug xeem ua pej xeem ua ib tug neeg twg yam ntawv/lus thiab xyuas kom sawv daws muaj peev xwm siv tau tej no kom nthuav dav tuaj ntxiv.
Vim tej hauj lwm no tau taw qhia tias ''tej txheej txheem xeem pej xeem tam sim no ua rau muaj ib txhia neeg xav xeem pej xeem qaug zog thiab ncua tsis xav xeem vim zoo li tseem muaj tej neeg ntawm teb chaws no tsis tshua xav tos txais tej neeg tuaj tshiab rau lub teb chaws no.''
Ces tsoom fwv teb chaws thiaj tau teb tias nws yeej kub siab ua raws li tej lus taw qhia los ntawm cov kev txheeb tej hauj lwm no ''ua tib zoo xyuas kom siv tau lub tswv yim multiculturalism raws li tej hom phiaj kom siv tau tej kev txawj ntse ntawm tag nrog txhua tus neeg Australia.''
Xyoo 2020 ces tus tsoom fwv Morrison kuj tau kho Australia cov kev xeem ua pej xeem ua thawj zaug rau lub caij 10 xyoo.
Thiab kuj tau txhab 5 nqe lus nug kom tej neeg xeem ua pej xeem teb txog ''Australia tej cai coj taug ua zoo'' uas muaj cov kev hwm lwm tus, vaj huam sib luag thiab kev tswj hwm democracy uas tso cai rau zej tsoom xaiv lawv tus nom sawv cev rau lawv.
Txawm tias yeej tsis tau muaj dab tsi pauv hloov rau cov kev siv ntawv Askiv li, los yog cov kev yuav tsum tau nyob ntawm Australia no ntev npaum li cas li, los tsoom fwv yeej kub siab xyuas kom npaj tau tej sob kawm qhia ntawv Askiv kom tej neeg tau kawm thiab kom paub ntawv/lus Askiv zoo tuaj ntxiv thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
