- NSW tso kev dav rau tej neeg muaj cai xub hno tshuaj COVID-19 vaccine mus hno tau.
- Muaj tej neeg kis kab mob tshiab txog 60% ntawm sab hnub poob ntawm nroog Melbourne.
- ACT muaj 26 tus neeg tshiab kis tau kab mob.
- Muaj cov chaw tshiab kis kab mob COVID-19 ntawm xeev South Australia.
New South Wales
NSW muaj 1,305 tus neeg kis tau kab mob tshiab, muaj 714 tus neeg no yog cov nyob ntawm sab hnub poob thiab hnub poob qab teb ntawm nroog Sydney. Tau muaj 2 tug neeg tas sim neej, ib tug muaj hnoob nyoog 70 tawm xyoo thiab ib tug muaj hnoob nyoog 80 tawm xyoo.
Nyob rau kuj tau teev tej neeg muaj hnoob nyoog 40-49 xyoo tias yog cov neeg muaj cai hno tau tshuaj vaccine lawm. Yog li thiaj yuav xub los hno tshuaj rau tej neeg ua hauj lwm muag khoom noj khoom haus thiab tej neeg ua hauj lwm hlais nqaij uas tsis nyob ntawm tej zos muaj neeg kis kab mob coob yog cov yuav tau xub hno tshuaj vaccine ua ntej tam sim no.
NSW lub tuam chav tswj kev noj qab haus huv kuj tau tso kev yooj yim rau cov kev ua tshoob thiab pub 5 tug qhua mus koom tau txij hnub tim 3 lub 9 hli ntuj 2021 no mus lawm.
Tej neeg ua hauj lwm uas muaj cai mus ua tau hauj lwm yuav tsum tau mus los rau 12 lub zos uas nom tswv txhawj xeeb tias muaj neeg kis kab mob coob no mas thiaj pub mus ua tau hauj lwm.
Victoria
Victoria muaj 64 tug neeg tshiab kis tau kab mob coronavirus, muaj 49 tug yog cuam tshuam nrog rau tej xwm txheej kis kab mob tam sim no, tab sis yeej tseem tsis tau paub tias muaj 15 tug neeg ho kis tau kab mob li cas.
Thiaj ua rau xeev Victoria tus pwm tsav lis laj fai tswj kev noj qab haus huv hais tias cov zos sab hnub poob ntawm nroog Melbourne yog ib co zos txaus txhawj xeeb heev uas yog cov zos li: Wyndham, Newport, Altona North thiab Hume.
24 teev dhau los thoob teb chaws Australia:
- SA lub tuam chav tswj kev noj qab haus huv tau muab 2 lub chaw muag roj tsheb ntawm Port Augusa thiab 2 lub ntawm lub zos Ceduna teev tias yog lawm tom qab tau muaj 2 tug neeg tsav tsheb thauj khoom (truck drivers) ntawm NSW raug sim tau tias kis tau kab mob coronavirus.
- Txij hnub tim 24 lub 9 hli ntuj mus, ces tsis hais ib tug neeg twg li yog muaj hnoob nyoog tshaj 18 xyoo thiab tau mus ntawm cov xeev ACT, NSW los yog Victoria mus rau xeev South Australia (SA) ces yuav tsum tau muaj pov thawj qhia rau nom tswv tias lawv tau hno tshuaj COVID-19 vaccine thawj koob lawm mas thiaj pub mus tau rau lub xeev no.
