Hnub tim 04.09.2021 no ces muaj neeg kis tau kab mob coob heev ntawm NSW, thiab Victoria. Tsis tas li no kuj muaj neeg yuav laug txog 1000 tus raug cais ntawm Queensland thiab TGA tso cai rau Australia tej me nyuam yaus hnoob nyoog 12-17 xyoo hno tau tshuaj COVID-19 vaccine lawm.
Hnub no NSW muaj 1,533 tus neeg tshiab kis tau kab mob coronavirus, thiab muaj 4 tug neeg tshiab tas sim neej ntxiv, cov neeg tas sim neej no yog cov yeej tsis tau hno tshuaj COVID-19 vaccine li.
Victoria ces muaj 190 tus neeg tshiab kis tau kab mob COVID-19, tab sis muaj kuj tseem tsis tau paub tias 103 tus neeg kis tau kab mob no ho kis tau li cas los. Txawm li cas los nom tswv tswj lagluam ntawm xeev Victoria kuj qhia tias yuav tshwm nyiaj tshaj 2 billion dollars los pab tej lagluam tshaj 170,000 cov rau lub sij hawm 1 hlis ntxiv no.
Thiaj ua rau 2 lub xeev NSW thiab VIC kub siab nrog xyuas kom muaj nws tej pej xeem mus sim seb puas kis kab mob thiab kom mus hno tshuaj vaccine kom txog li 70% uas NSW yeej ua tau lawm, coj los daws cov teeb meem kab mob Delta variant virus uas sib kis coob heev no.
Queensland ces muaj ib tug me nyuam ntxhais uas yog ib tug txiv neej uas paub tus neeg tsav truck yog tus kis tau los ntawm tus neeg tsav truck no rau ntawm ib lub tsev kawm ntawm lub zos Windaroo ces thiaj tau ua rau nom tswv hais kom tej neeg uas tej zaum tau nyob ze tus me nyuam ntxhais hnoob nyoog 4 xyoos no los yog tau mus rau ntawm lub chaw kawm ntawv no txog li 960 tus yuav tau cais lawv tus kheej 14 hnub. Txawm li cas los nom tswv kuj qhia tias nws muaj peev xwm tswj tau tej xwm txheej no lawm, thiab yeej tau sim tej neeg uas tau nyob ze nrog tus neeg tsav truck no tag lawm kuj tsis kis tus mob no.
Hais txog tej me nyuam yaus hnoob nyoog 12-17 xyoo ces tam sim no TGA tau tso cai pom zoo hno tau cov tshuaj Moderna vaccine lawm, thiab yeej hais kom hno koob ib thiab koob ob sib nrug li ntawm 28 hnub tib yam li hno lwm yam tshuaj COVID-19 vaccine rau tej neeg muaj hnoob nyoog 18 xyoo rov sauv, tom qab uas yeej tau muaj tau lub teb chaws li Aaskiv, Canada, EU thiab Switzerland tau tso cai hno tej tshuaj no rau lawv tej me nyuam lawm.
Tib lub caij no los nom tswv Australia kuj tau sib khom nrog teb chaws Aaskiv thiab qev tau 4 million koob tshuaj Pfizer COVID-19 vaccine thiab kuj qev tau li 500,000 koob ntawm Singapore los rau Austraia siv tab sis yuav tau xa rov qab thaum Australia tau tej tshuaj no lawm. Tam sim no ces cov neeg hnoob nyoog txij 16 xyoo txog 39 xyoos muaj cai hno tau tshuaj Pfizer vaccine lawm. Hos tej me nyuam yaus hnoob nyoog 12-15 xyoos ces tseem yuav tau tos txog hnub tim 15.09.2021 tso mam li teem tau caij mus hno.
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
