Vim li cas thiaj tsim nyog koj npaj daim ntawv faib cuab tam (Will)

Yeej muaj neeg Australia coob heev tsis tshua kub siab txog qhov tseem ceeb ntawm cov kev npaj kom tau ib daim ntawv faib cuab tam (Will), vim pheej xav tias lawv tsis yog tej neeg nplua nuj, lawv tseem tsis tau muaj hnoob nyoog txaus yuav siv. Tab sis tej kws hais tias yeej tsim nyog yuav tau npaj kom tau ib daig cia.

Ntsiab lus tseem ceeb:

Yeej muaj ib co kev teeb txheeb qhia tias ib tug ntawm ob tug neeg Australia yeej tsis npaj daim ntawv faib cuab tam (Will).
Tej kws hais tias muaj ntau yam laj thawj cuam tshuam txog tej kab lis kev cai, cov kev totaub yuam kev thiab cov kev ntseeg tsis muaj tseeb uas ua rau tej neeg tsis npaj daim ntawv faib cuab tam.
Ces tej peev txheej ntawm tus neeg nruam sim thiaj yuav raug faib raws li tej cai ntawm ib lub xeev twg xwb yog tias tus neeg nruam sim ntawd tsis npaj daim ntawv faib cuab tam siv.

Yeej muaj kev teeb txheeb qhia tias tsuas yog tej neeg muaj hnoob nyoog, thiab tej neeg muaj ntau yam peev txheej xwb thiaj yog cov uas npaj daim ntawv faib cuab tam siv ntawm Australia.

Raws li tau muaj ib cov kev teeb txheeb tseem ceeb heev xyoo 2017 tau qhia ces tau pom tias muaj tej neeg tau mus koom cov kev teeb txheeb no yuav laug txog li ib nrab yeej tsis npaj daim ntawv faib cuam tam (Will) siv.

LISTEN TO

Qhov no qhia tias vim li cas thiaj tsim nyog koj npaj daim ntawv faib peev txheej (Will)

SBS Hmong

30/05/202115:50

Professor Adam Steen uas yog ib tug zeskais uas yeej tau ua tej hauj lwm no thiab paub zoo txog tej hauj lwm no ntawm tsev kawm qib siab Deakin University yog tus coj cov kev teeb txheeb no. Nws hais tias muaj ntau yam laj thawj li cov kev totaub yuam kev thiab kev ntseeg tsis muaj tseeb ua rau tej neeg tsis tuaj yeem npaj daim ntawv faib cuab tam.

Nws tau qhia rau SBS Radio tias "Yeej muaj neeg coob kawg tsis xav tias lawv yuav tau npaj daim ntawv faib cuab tam siv. Thiab kuj tseem muaj tej neeg ntau heev pheej xav tias yog lawv npaj daim ntawv faib cuab tam lawm ces ntshe lawv yuav tuag. Muaj ib txhia xav tias 'peb twb tsis muaj nyiaj, los yog pheej hais tias peb tsis tau muaj hnoob nyoog txaus yuav npaj daim ntawv no'.''

Australia's lending laws may be relaxed, but here's why it's important to borrow responsibly

Thaum muaj ib tug twg tas sim neej thiab npaj tsis tau daim ntawv faib cuab tam (Will) siv, ces peb hu cov xwm txheej no ua 'intestacy', thiab yuav siv tej cai ntawm lub xeev tus neeg nyob ntawd los faib tus neeg nruam sim ntawd tej cuab yeej cuab tam. Dean Kalymnios uas yog ib tug kws lij choj hais tias yog yus npaj tau daim ntawv no tseg cia ces kuj muaj peev xwm pab tau yus tsev neeg kom tsis txhob ntsib teeb meem ntau yam rau lub caij yus nruam sim.

Daim ntawv faib cuab yeej cuab tam ces yog ib daig ntawv uas yeej teev meej tseeb tseg tias yog tsis muaj yus lawm xav kom muab yus tej peev txheej faib rau ib tug neeg twg raws li qhov yus xav faib rau. Source: Getty / Getty Images/seksan Mongkhonkhamsao

Nws hais tias "Tej neeg pheej xav tias daim ntawv faib cuab tam tsuas yog tej yam cuam tshuam txog ib tug neeg uas twb ze rau qhov nws yuav xaus nws lub neej lawm xwb. Yog tej yam uas tsis tshua xav tham txog vim cuam tshuam txog kev ploj tuag thiab kev mob nkeeg, tab sis yus yeej tsis paub li tias thaum twg yus yuav ntsib tej xwm txheej no. Yog li ntawd thiaj yog ib lub zoo tswv yim uas yuav tau xub npaj tseg ua ntej.''

Mr Kalymnios hais tias vim tej cai uas siv coj los faib tej cuab yeej cuab tam ntawm ib tug neeg nruam sim uas tsis muaj daim ntawv faib cuab tam (intestacy) ntawd ces tej zaum kuj tsis faib tej peev txheej rau ib co neeg ntawm tsev neeg ntawd raws li tus neeg nruam sim xav kom faib los yog tso tseg cia rau ib cov neeg twg.

Nws hais tias "Vim tej zaum kuj muaj qee yam uas yus xav tso tseg los yog muab rau yus ib tug xeeb leej xeeb ntxwv twg, uas tej zaum yog ib yam khoom uas ib phaum neeg tso rau lwm phaum, los yog tej yam khoom tseem ceeb dab tsi, los sis ib yam khoom dab tsi uas muaj kev sib cuam tshuam ntawm yus nrog lwm tus neeg, ces cov kev npaj tau daim ntawv faib cuab tam thiab yog txoj xub ke zoo tshaj plaws yuav pab kom yus ua tau li hais ntawd.''

Kuj yog tej yam tseem ceeb uas yuav tau xav txog yus tej digital asset thiab vim tam sim no los zoo li yeej siv txhua tsav txhua yam hauv online lawm xwb. Yav tag los mas yeej ib txwm muaj tej phau duab, tab sis tam sim no ces yog tej duab digital lawm xwb, los yog tej email lists los yog txhua tsav yam hauv lawv tej social media. Tsis tas li ntawd los tej neeg yeej yuav bitcoins ntau heev thiab.
Adam Steen, Prof of Practice at Deakin University

Cov kev npaj pab rau tej neeg yus hlub tshua tseem ceeb tshaj qhov uas lawv tau tej khoom

Mr Kalymnios thiaj taw qhia kom sab laj nrog tej kws lij choj thiab npaj ib daim ntawv faib cuab tam kom thiaj tsis ua yuam kev uas tej zaum yuav ua rau tsis muaj peev xwm siv tau daim ntawv faib cuab tam ntawd thiab.

Nkawm txij nkawm sab laj txog daim ntawv faib cuab yeej cuab tam Source: Getty / Getty Images/skynesher

Yus kuj muaj peev xwm hais kom ib tug kws lij choj los yog ib tug Public Trustee uas yog tsoom fwv ib lub tuam chav uas tswj tej hauj lwm no ntawm ib lub xeev twg ua tus npaj yus daim ntawv faib cuab tam tau thiab.

Michael Spiegel ces yog tus coj uas tswj lub tuam chav Trustee Services ntawm lub koom haum Public Trustee ntawm xeev Victoria.

Also read

Buying a business during COVID-19

Nws thiaj hais tias cov kev npaj tau ib daim ntawv faib peev txheej kuj yog tej yam tseem ceeb heev hais ntsi ntsees rau tej niam txiav thiab, yog tias thaum kawg tsis muaj hmoo es ho tas sim neej tab sis tsis muaj daim ntawv will siv, ces tej cai ntawm lub xeev yus nyob yuav ua cov txiav txim tias leej twg yuav ua tus tu thiab saib xyuas yus tej tub ki uas tseem yau.

Ces yog tsis muaj daim ntawv will no ces tej zaum yus tej me nyuam yuav raug xa mus rau tej chaw tu thiab saib xyuas me nyuam ntsuag yog tias yus ho tsis muaj tej txheeb ze yuav lees ua cov saib xyuas. Tsis tas li ntawd los tej zaum kuj cuam tshuam txog tej xwm txheej me nyuam neeg tsiv teb tsaws chaw uas tej zaum yuav raug muab lawv xa mus rau tej txheeb ze txawv teb chaws thiab yog tias tsis muaj nws tsev neeg ntawm Australia no ua tus tu saib xyuas.

Yog tias daim will tsis teev tias leej twg yuav ua tus tu thiab saib xyuas yus tej me nyuam, ces tej cai ntawm lub xeev yus nyob yuav ua cov txiav txim tias yuav tso yus tej me nyuam rau leej twg tu thiab saib xyuas. Source: Getty / Getty Images/Paul Bradbury

Tiv thaiv kom tsis txhob poob rau tej xwm txheej tsis paub yuav ua li cas

Kalymnios hais tias daim ntawv will yuav muaj peev xwm los tswj tau tej xwm txheej kom tsis txhob ras uas ib cov xwm txheej uas tsis pom qab ua li cas los yog muaj cov kev totaub yuam kev cuam tshuam txog tej kab lis kev cai.

Yog tham txog tej xwm txheej feem ntau lawm ces, yog tias npaj tau daim ntawv will ces yuav pab kom tej neeg ua tau lub neej yooj yim zog thiab paub tseeb dua tias yuav ua li cas, vim sawv daws yeej paub lawm tias tus neeg tas sim neej ntawd xav tau dab tsi.

Mr Kalymnios hais tias “Ib ib txhia neeg zejzog tsiv teb tsaws chaw ces yeej muaj cov kev totaub sib txawv ntawm tej neeg Anglo-celtic tej kev xav yog tham txog tej vaj tse lawm. Vim yim neeg lub tsev ces yog tej yam uas yuav faib rau txhua leej txhua tus ntawm tsev neeg. Tab sis yog tham raws li Australia tej cai lij choj cov kev xav lawm, ces yog lub tsev ntawd yog yus li ces yus yeej muaj cai teev rau daim ntawv will tias yus xav ua li cas rau tau.''

Ces tsis hais yus yuav siv ib tug kws lij choj twg pab yus sau los yog siv cov will kit pab yus sau daim ntawv will, yog tej yam tseem ceeb uas yuav tau nco qee yam ntxiv thiab mas daim ntawv will thiaj yuav ras los ua ib daim siv tau raug kev raug cai.

Yus tsis muaj peev xwm tsis teev txog yus tej me nyuam txawm tias yus sib cais/sib nrauj lawm los yog yus muaj ob tsev neeg lawm; thiab yeej yog tej yam uas yuav sib chab sib chaws tshaj ntawd thiab los kuj tau. Ces thiaj li muaj ntau yam laj thawj uas muaj qee zaus tej tsev hais plaub thiaj li yuav txheeb tias tsim nyog yus yuav tau muab dab tsi rau lawv los yog tso tseg dab tsi rau lawv.
Michael Spiegel, Executive General Manager at Victoria State Trustees

Tej kws lij choj thiab tej Public Trustee ntawm yus lub xeev yog ob co neeg uas muaj peev xwm pab yus npaj yus daim ntawv faib cuab yeej cuab tam. Source: Getty / Getty Images/skynesher

Michael Spiegel yeej tseem nco tau tej xwm txheej tsis sib haum xeeb ntwm tej cuab yig uas pom muaj tas mus li ntawm nws lub koom haum Victorian State Trustees thaum muaj ib tug twg tas sim neej uas tsis npaj daim ntawv will siv ntawd.

Nws thiaj taw qhia kom tej neeg ua tib zoo xyuas kom tej neeg lawv hlub tshua paub tias yus xav tso dab tsi tej neeg yus hlub tshua.

Nws hais tias "Ua tib zoo xyuas kom yuas npaj tau txhua yam raws li qhov yus xav tau. Yog li ntawd qhov zoo tshaj ces tsis yog tias yus npaj tias yuav muab dab tsi rau tus twg xwb, tab sis xav kom los tham txog tej no kom yus tsev neeg thiaj paub tias yuav ua li cas, kom tsis txhob muaj tej yam dab tsi ua rau lawv ceeb.''

Peb yeej tsis nyiam tham txog peb cov kev nruam sim. Tab sis kuj yog ib yam ntawm lub neej uas tag nrho peb sawv daws yeej yuav tas sim neej rau ib hnub twg, ces yog yus npaj tau tej xub ke ntau yam zoo uas yuav los daws tau ntau yam teeb meem uas yuav muaj tau rau tej neeg yus hlub tshua zoo npaum li cas rau lawv ces yuav yog tej yam zoo npaum li ntawd rau yus.
Michael Spiegel, Executive General Manager at Victoria State Trustees

Yog tias koj siv cov online will kit, ces koj muaj peev xwm kom ib tug kws lij choj los yog ib tug Public Trustee pab txheeb. Thiab koj muaj peev xwm nrhiav tau Public Trustee lub tuam chav ntawm koj lub xeev raws li cov links hauv qab no: