Mloog tau zaj xov xwm qhia txog koj txoj cai thiab tej luag hauj lwm koj yuav tau ua rau lub caij koj ua hauj lwm ntawm tsev tau ntawm no:
Kashmira Aspar ua hauj lwm casual tam li yog ib tug neeg tswj ntaub ntawv ntawm Sydney ib lub tsev kawm qib siab.
Ua ntej yuav muaj kab mob COVID-19 sib kis thoob ntuj, ces nws yeej xav ua hauj lwm ntawm tsev kom txuag tau sij hawm tsis txhob tau mus rau tej chaw ua hauj lwm, kom ho muaj zog thiab muaj sij hawm los nrog nws tus tub uas muaj 6 xyoo nyob.
Tab sis qhov tseeb tiag yeej nyuaj tshaj thiab txawv deb heev ntawm tej nws xav lawm, vim nws tsis muaj peev xwm yuav siv tau cov system thiab tej ntaub ntawv ntau yam coj los pab kom nws thiaj ua tau hauj lwm.
Kuv xav tias yog yuav tau xyuas kom muaj peev xwm siv tau tag nrho peb tej technology, tau txais kev pab cuam ntawm peb tej chaw ua hauj lwm, thiab xyuas kom kuv muaj tej twj tag nrho raws li qhov kuv xav siv.
Tim Downie yog tus kws lij choj pab tej neeg ntiag tug uas raug mob thaum tseem ua hauj lwm, ntawm lub tuam txhab Johnston Withers hais tias tej tswv lagluam muaj lub luag hauj lwm yuav tau ua tib zoo xyuas kom lawv tej neeg ua hauj lwm npaj kom tau ib qho chaw nyab xeeb los ua hauj lwm thiab haum raws li tej cai tswj kev noj qab haus huv thiab kev nyab xeeb rau cov kev ua hauj lwm .
Downie hais tias tej tswv lagluam tej luag hauj lwm yeej zoo tib yam li thaum tseem muaj neeg ua hauj lwm ntawm tej chaw ua hauj lwm thiab. Nws thiaj xav taw qhia kom 2 tog xyuas kom muaj txoj kev pom zoo txog tej chaw ua hauj lwm ntawm tsev kom yog ib co chaw tau txais kev nyab xeeb.
Source: Getty Images/360 Productions
Dr Robin Price uas yog ib tug zeskais qhia txog cov kev tswj tej peev txheej neeg thiab tswj tej kev ntiav neeg ua hauj lwm ntawm tsev kawm qib siab Central Queensland University hais tias yeej muaj cai teev tseg lawm tias koj tus tswv lagluam yuav tsum tau them nyiaj rau koj yog tias koj raug mob rau lub caij koj ua hauj lwm ntawm tsev.
Helen Sawa yog ib tug coj uas tswj cov hauj lwm kiab khw lagluam ntawm lub tuam txhab Melbourne IT consultancy hu ua hais tias tus kab mob tau sib kis thoob ntuj no tau yuam kom tej koom haum yuav tau hloov los tso cai rau lawv tej neeg ua hauj lwm ntawm tsev, thiab yeej muaj ntau lub tuam txhab yeej tsis muaj peev xwm nrhiav tau tej twj coj los pab kom tej neeg ua hauj lwm thiaj muaj peev xwm ua tau hauj lwm ntawm tsev.
Ua ntej yuav muaj tus kab mob coronavirus kis thoob ntuj no yeej muaj tej koom haum no ntau heev yeej tsis xav li tias yuav npaj tej tswv yim no thiab yeej tsis xav tias xyov puas npaj tej twj no rau lawv tej neeg ua hauj lwm li.
Source: Getty Images/Zoranm
Dr Price hais tias tej koom haum thiaj raug tsub nias kom npaj ntau lub tswv yim siv rau lub caij nyuaj heev no.
Lub tsev kawm qib siab uas kuv ua hauj lwm casual ntawd ces lawv twb tsis muaj cov laptops txaus rau tag nrho txhua tus neeg ua hauj lwm coj mus siv qhia ntawv hauv online tom tsev li.
Yog hais txog Aspar lawm ces tej twj siv no tsis yog ib cov teeb meem loj li tsis tau cov kev tsis tau cov internet zoo siv tom tsev. Yog li ntawd nws thiaj yuav tau ua hauj lwm hmo ntuj los hloov rau lub caij tsis muaj peev xwm siv tau internet zoo ntawd.
Michael Crocker uas yog tus coj lub koom haum Chartered Accountants Australia and New Zealand hais tias tej neeg ua hauj lwm uas tau npaj ib qho chaw ua hauj lwm ntawm tsev ces tej zaum muaj peev xwm rau lub caij ua tax returns.
Crocker thiaj tawm tswv yim kom tej neeg ua hauj lwm ceev faj thaum lawv siv ib qho chaw ntawm tsev los ua hauj lwm ntawd yuav tau ua tib zoo xyuas kom yus pov puag tej tej xov xwm ntiag tug tseem ceeb.
Yog li ntawd cov kev sib txuas lus thiaj yuav pab kom muaj peev xwm ua tau hauj lwm ua ke nrog lwm tus, kom ua tau hauj lwm thiab tiv thaiv kom lawv txhob mloog tau tias lawv nyob tib leeg kho siab khuav. Tim Downie thiaj xav tias tam sim no yog ib lub caij zoo uas peb yuav tau cais ua hauj lwm yog tias muaj tej technology pab kom ntau pab neeg sib cuag tau.
Source: Getty Images/RollingCamera
Peb yeej muaj technologies ntau yam siv tsis hais yog FaceTiming los yog lwm yam kom muaj peev xwm sib ntsib tim ntsej tim muag, kom muaj peev xwm sib tham tau, piv txwv li tau muaj peb ntau pab neeg tau siv FaceTime kom lawv muaj feem koom tau cov kev haus dej haus cawv rau hnub zwj Kuab (Friday) thiab.
Tab sis Aspar yeej tsis muaj peev xwm ua tau li tej hais no vim nws tsis muaj internet zoo siv, thiab tau ua rau nws tsis muaj peev xwm ua tau hauj lwm zoo raws li qhov tsim nyog. Qhov nyuaj tshaj ces yog qhov tsis paub tias xyov tseem yuav muaj tej xwm txheej no ntev nplaum li cas ntxiv.
Kuv yog ib tug neeg ua hauj lwm casual xwb. Yog tias lawv yuav rho neeg tawm ces kuv yog thawj tug yuav raug rho tawm ua ntej, thiab ib nqe ntxiv ntawd ces xyov kuv tsev neeg puas yuav tau txais kev nyab xeeb thiab?
Txheeb tau lub koom haum lub vas sab (website) kom tau xov xwm ntxaws ntxiv qhia txog koj tej cai thiab tej luag hauj lwm uas koj yuav tau ua rau lub caij tseem muaj kab mob coronavirus sib kis no.
Yog koj ntseeg tias koj kis tau kab mob virus lawm, ces hu rau koj tus kws kho mob los yog hu rau lub koom haum Coronavirus Health Information Hotline tus xov tooj 1800 020 080.
Thiab yog tias koj ho muaj kev nyuaj siab ntxhov plawv thiab muaj kev txhawj xeeb thiab xav tau txais kev pab cuam, ces hu rau lub koom haum tus xov tooj 13 11 14 los yog hu rau lub koom haum tus xov tooj 1300 22 4636 uas yeej muaj cov kev pab cuam 24 teev pab koj. Thiab yog koj muaj hnoob nyoog qes dua 25 xyoos, ces koj muaj peev xwm hu tau rau lub koom haum tus xov tooj 1800 55 1800 txhua sij hawm yog koj muaj ib yam kev txhawj xeeb dab tsi.
Koj yeej tseem muaj peev xwm hu rau lub koom haum txhais ntaub ntawv thiab txhais lus hu ua tus xov tooj 1800 131 450 thov kev pab cuam txhais ib hom lus twg kom koj muaj peev xwm siv tau cov kev pab cuam ntau yam ntawm tej koom haum uas koj xav siv ntawd.
