Raws li ntiaj teb lub Koom huam tswj kev noj qab haus huv tshiab uas tau mus teeb txheeb txog ntiaj teb cov pej xeem seb puas nyiam exercise los yog ua cov physical activities ntawd, ces nws txheeb tau tias muaj ntiaj teb cov pej xeem 1 tug ntawm 4 tug twg uas yog cov muaj hnoob nyoog tshaj 18 xyoo los yog 4 tug ntawm 5 tug hluas hnoob nyoog 11 txog 17 xyoo tsis nyiam exercise li.
Ces thiaj ua rau cov koom haum tswj kev noj qab haus huv txhawj xeeb txog ntiaj teb cov pej xeem txoj kev noj qab haus huv thiab noj qab nyob zoo, vim cov kev tsis kub siab mus exercise tau ras los ua ib cov teeb meem tsis tau txais kev noj qab nyob zoo thiab noj qab haus huv rau ntiaj teb cov pej xeem lawm.
Yog li ntawd Dr. Tedros Adhanom Ghebreyesus uas yog WHO tus coj Director-General thiaj tau koom tes nrog teb chaws Portugal tus thawj pwm tsav António Costa los npaj cov tswv yim pab kom ntiaj teb cov pej xeem tau los exercise kom tau txais kev noj qab nyob zoo txij xyoo 2018-2030 hu ua
Cov neeg uas tsis tshua ua exercise yog cov me nyuam ntxhais, tej poj niam, cov laus neeg, cov neeg txom nyem, cov neeg puas cev thiab muaj mob ntev, cov neeg tsis tau txais kev pab cuam thiab nom tswv thiab tej zejzog tsis kub siab txog, cov neeg txum tim los sis cov keeb cag neeg yog cov uas tsis tshua muaj cib fim (opportunities) mus exercises pes tsawg.
Cov laj thawj ua rau tej neeg no tsis tau mus exercise yeeb vim yog tej zaum lawv ntshai tsam muaj lwm tus ua phem thiab tsim teeb meem rau lawv, mos, quab yuam lawv, tsis muaj nyiaj mus gym, tsis muaj tej tshav ncaws pob ntaus pob ntaus tib qaib, chaw ua luam dej etc, tsis muaj park tsis muaj kev taug ua si, tsheb coob heev hauv tej nroog tso tej pa tsheb tsis huv, muaj tej huab cua phem tsis huv paug tsuas rau tej ib puag ncig, los yog yuav tau siv sij hawm khwv nyiaj los tab lub cuab lub yig tsis khoom ces thiaj ua rau tej poj niam yog cov tau mus exercise tsawg tshaj txiv neej.
Yog li cov kev ua exercise kom tau qoj ib ce dua ntawm cov kev sib tw (sports) lawm ces kuj muaj tej yam yooj yooj yim peb ua tau thiab xws li, ua hauj lwm hauv vaj hauv tsev ib yam dab tsi, ua si, mus taug kev, mus ncig ib qho qhov twg los yeej yog cov physical activity los sis exercise tib yam thiab.
"Yog tias koj tsis mus exercise los yog qoj ib ce kom tawm hws thiab koj tej nqaij pob txhab kom zooj ces yuav ua rau koj muaj ntau yam mob tau thiab xws li ua rau koj mob tau ntshav qab zib, mob plawv, mob cancer thiab muaj teeb meem mob hlwb nyiaj siab ntxhov plawv uas yog tej yam kab mob uas mob ntev heev mam zoo los yog tej zaum kho tsis tau ces yuav ua rau yus tas sim neej tau ntau txog li 20-30% diam thiab."
Tab sis yog koj mus exercise no yuav tau ntau yam txiaj ntsim xws li pab kom koj txhog muaj teeb meem cuam tshuam txog plawv thiab hlab plawv, pab kom koj cov nqaij muaj zog, txhob ntog tau yooj yim, pab kom kom txhob mob ntshav siab, txhob mob kab mob hlab ntsha tawg saum paj hlwb (stroke), pab kom koj muaj zog cus plaws, pab kom koj lub cev yuag yiag txias txhob rog txhob muaj ceeb thawj, pab koj cov pab txha kom ruaj khov, pab kom koj lub plawv ua tau hauj lwm zoo, pab kom koj tau txais kev noj qab nyob zoo thiab noj qab haus huv, pab kom koj kaj siab lug tsis nco txhawj txog txoj kev nyuaj siab ntxhov plawv thiab kev mob hlwb.
Thiaj li tau ua rau ntiaj teb cov pej xeem hnoob nyoog txij 30 txog 70 xyoo tau tas sim neej ib lub xyoos twg los ntawm cov kab mob non-communicable diseases (NCDs) li mob plawv, ntshav qab zib thiab mob cancer vim lawv tsis kub siab mus exerciese txog li 15 roob (million) tus diam. Thiab raws li WHO tau kwv yees tsawg yog tias ntiaj teb tej tsoom hwv pom zoo nqe peev ib xyoo twg tshaj USD 134 billion ua USD 371 billion dollars coj los pab tswj cov kev noj qab haus huv ces yuav ua rau ntiaj teb tej pej xeem muaj hnoob nyoog nyob tau ntev txiv ntawm 3 xyoos mus ua 8 xyoos ntxiv, pab tiv thaiv kom txhog muaj neeg ze txog 100 roob tus tas sim neej uas yog 50 roob tus yog cov me nyuam mos thiab cov tas sim neej rau hauv niam plab uas tseem tsis tau yug tawm los thiab pab kom tej neeg txhob tas sim neej ze txog li 20 roob tus los ntwam cov kab mob NCDs.
Yog li UN thiaj li tau los siv sob lus Let’s Be Active: Everyone, Everywhere, Everyday coj los txhawb nqa kom neeg ntiaj teb kub siab los qoj ib ce los yog exercise kom thiaj dim ntawm tej kev mob nkeeg thiab kev ploj qaug no.
"Tej kev pauv hloov thiab coj tej cuj pwm txoj kev ua lub neej kom zoo uas tsis txhob noj zaub mov daw ntsev (salty), daw piam thaj (sugary foods) tsis hais tej dej qab zib (Softdrink) los yog mov mog qab zib (Cake), zaub mov khub roj (Saturated fat, processed foods) txhob haus luam yeeb haus dej hauv cawv, tab sis tig los haus dej kom txaus, noj txiv xyoob txiv ntoo, noj zaub thiab noj ntses kom ntau, noj nqaij kom tsawg thiab nquag mus exercise coj los pab rau yus lub cev ces thiaj li yuav tau txais kev noj qab nyob zoo (Well-being) thiab thiaj tau txais kev noj qab haus huv (Healthy)."
Ntawm tag nrho 168 lub teb chaws hauv ntiaj teb no, Australia yog lub tau zum (tau thib) 97, hos lub teb chaws nyiam exercise tshaj plaws hauv ntiaj teb no yog teb chaws Uganda ntawm nrim av Africa (African Continent), thiab tsuas muaj nws cov pej xeem txog li 5.5% thiaj tsis tau ua exercise txaus xwb.
Txawm muaj ib txhia pej xeem Australia xav tias lawv yog cov neeg nquag thiab nyiam ua exercise heev kom lawv tau txais kev noj qab nyob zoo thiab tau txais kev noj qab haus huv los WHO cov kev teeb txheeb tshiab no yeej qhia tau lawm tias tsis yog li lawv xav ntawd. Teb chaws Australia tej pej xeem tsuas ib nyuag nyiam ua exercise ntau dua nws cov teb chaws phooj ywg li teb chaws America thiab teb chaws New Zealand xwb.
Zes kais (Prefessor) Emmanuel Stamatakus uas yog ib tug paub zoo txog cov kev exercise ntawm lub txhooj faj lem (tsev kawm qib siab) University of Sydney hais tias pej xeem Australia yeej paub tias tsim nyog lawv yuav tau ua dab tsi tab sis lawv pheej tsis kub siab ua xwb.
Nws hais tias "Tej chaw nthuav xov xwm yeej tau qhia ntau tsav ntau yam xov xwm rau peb txhua hnub tias cov kev exercises yuav tau txais txiaj ntsim dab tsi rau peb, thiab tsim nyog peb coj tej cuj pwm ua lub neej zoo li cas thiaj yuav pab kom peb tau txais kev noj qab nyob zoo thiab tau txais kev noj qab haus huv, tab sis lawv yeej tsis qhia tias peb yuav tsum tau exercise li cas li. Ces tej neeg thiaj tseem tsis tau paub txog tej txiaj ntsim yuav tau txais los ntawm cov kev ua exercise no tias yog dab tsi tiag."
ntawm tuam ceeb Canberra tsab ntawv tawm tswv yim tau sau rau WHO tau coj ces nws tau teev 2 nqe lus tseem ceeb xws li:
1) tsim cai los txwv kom pub tsav tsheb khiav qeeb txog li 30km/hr hauv nroog los yog hauv tej zos kom tej neeg tau taug kev ntev me ntsi kom tej me nyuam tau chaw ua si hauv tej zos txhob txhawj txog tsam tsheb nrau thiab kom tso tej pa tsheb tsis huv tsawg me ntsis paug tsuas rau tej ib puag ncig.
2) Nrhiav sib hawm thiab npaj tej chaw ua si (Parks) chaw sib tw (Sport and recreational facilities) kom tej me nyuam los yog tej neeg tau ua si, tau khiav, tau qoj ib ce kom ntau tuaj ntxiv.
Julie Anne Mitchell ntawm lub koom haum The National Heart Foundation tau qhia tias tsim nyog txhua qeb theem nom qes txog theem tsoom hwv teb chaws yuav tau tshwm nyiaj txiag thiab npaj tej cai coj los pab kom pej xeem tau mus exercise thiab tau koom cov kev sib tw (National Sport Plan).
Nws hais tias "Peb yeej paub tias cov kev mus qoj ib ce tas mus li no muaj peev xwm pab kom peb txhob muaj teeb meem cuam tshuam txog tej plawv thiab hlab plawv txog 35% diam. Ntxiv ntawd los tseem tau txais txiaj ntsim ntau yam kom peb txhob mob ntshav qab zib, mob lwm yam mob ua mob ntev thiab tseem pab kom peb kaj siab txhob nyuaj siab ntxhov plawv thiab txhob mob hlwb tau thiab."
Nyeem tau ntxiv ntawm:
- h
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes tuaj koom ua tub koom siab thiab koom mloog tau tau ntawm #SBSHmong lub Facebook page tau.
