Ntsiab lus tseem ceeb:
- 'Stop it at the Start' ces yog tsoom fwv Australia ib co program uas tshwm nyiaj coj los taw qhia thiab txhawb nqa kom tej laus nrog tej hluas tham txog cov kev hwm lwm tus.
- Tej niam txiv thiab tej neeg saib xyuas me nyuam tsim nyog paub txog tias yuav nrog lawv tej me nyuam tham li cas thiab yuav ua li cas thiaj yog ib cov kev sib raug zoo uas muaj kev sib hwm.
- Cov kev tiv thaiv yog tej yam tseem ceeb vim yuav pab tiv thaiv kom tsis txhob muaj teeb meem kub ntxhov hauv lub cuab yig ua ntej yuav muaj tej teeb meem no pib tshwm sim.
Lus ceeb toom: Zaj xov xwm no yuav qhia txog tej xov xwm ntxhais txog cov kev ua txhaum cai cuam tshuam txog teeb meem kub ntxhov hauv lub cuab yig uas tej zaum yuav ua rau ib txhia yuav ntsib tej xwm txheej teeb meem nyuaj thiab yuav ua rau ntsib kev nyuaj siab ntxhov siab.
Tej teeb meem kub ntxhov tsis yog pib ntawm cov kev ntaus lub cev ntaj tsug xwb; tab sis yeej ib txwm pib ntawm ntau yam uas tsis sib hwm, tswj lwm tus, thiab pheej hais lus ua rau lwm tus tu siab los yog tsis muaj neeg paub txog tej xwm txheej no thiab tsis kub siab los daws tej xwm txheej no.
Arman Abrahimzadeh ces yog ib tug neeg los qhia tej neeg kom paub tawm tsam tej teeb meem kub ntxhov hauv lub caub yig thiab los tiv thaiv kom tsis txhob muaj tej teeb meem kub ntxhov hauv lub cuab yig. Thiab tej xwm txheej phom sij uas tau tshwm sim rau nws tus kheej tau ras los ua kev txhawb siab kom nws los ua tej hauj lwm no.
Nws hais tias yeej tau pib muaj tej xwm txheej no txij thaum nws tseem yau uas nws yeej tau pom tej xwm txheej kub ntxhov hauv lub cuab yig thiab tej teeb meem ua phem rau lwm tus hauv nws tsev neeg tas mus li.
Peb tau poob rau tej xwm txheej uas ua rau peb yuav tau txiav txim siab sau nra thiab tawm ntawm peb tsev neeg mus vim rau qhov peb tsis xav ntsib teeb meem. Thiab thaum peb tau tsiv tawm ntawm peb lub tsev mus lawm, ces kuv tau xav tias tej zaum yuav tsis ntsib teeb meem nyuaj ntxiv lawm.Arman Abrahimzadeh
Tab sis tsis yog li nws xav ntawd. Mr Abrahimzadeh ntseeg tias cov kev tawm ntawm ib lub tsev uas pheej pom muaj cov kev hawv thiab cov kev ntaus ib tug twg tas mus li yog ib cov kev pib lub neej tshiab thiab yuav xaus cov kev ua lub neej uas pheej ntshai rwg tsam tsis tau txais kev nyab xeeb rau lawv.
Mr Abrahimzadeh, nws niam thiab nws tej muam thiaj tau ras los ua neeg tsis muaj vaj tse nyob, ntsib kev txom nyem thiab raug cais thaum lawv tsiv tawm ntawm lawv lub tsev mus.
Nws hais tias "Peb yeej tau ntxeem dhau tej xwm txheej ntawd. Thiab lub caij ib xyoos tom qab peb tau tsiv tawm ntawm lbu tsev uas pheej raug tsim teeb meem ntawd, ces kuv niam thiab kuv tus muam hlob tau txiav txim siab mus koom lub koom txoos Persian New Year.
''Lub koom txoos no ua rau ntawm Adelaide Convention Centre. Thiab ua rau lub 3 hlis ntuj xyoo 2010. Tab sis peb kuj tsis paub tias kuv txiv tau tuaj koom lub koom txoos no thiab. Ces nws thiaj tau txiav txim siab muab kuv niam nkaug tuag thiab muaj 300 tus neeg pom tej xwm txheej no,'' raws li nws nco tau.
Arman Abrahimzadeh with his late mother Zahra Abrahimzadeh. Credit: Arman Abrahimzadeh
Tej cim ceeb toom
Mr Abrahimzadeh hais tias tam sim no ces yog tej yam txaus txhawj xeeb, thiab tej xwm txheej no feem coob ces yeej yog tej txij nkawm tam sim no los yog tej txij nkawm tam sim no los yog tej txij nkawm dhau los yog cov tsim teeb meem.
Yog li ntawd thiaj txog caij lawm uas peb yuav tau los daws tej cib keeb uas ua rau muaj tej teeb meem kub ntxhov hauv lub cuab yig thiab txheeb tej cim ceeb toom thaum ntxov los tiv thaiv ua ntej yuav muaj tej teeb meem no tshwm sim.
Mr Abrahimzadeh hais tias "Tej cim ntau yam ua muaj thaum ntxov ntawd ces tej zaum kuj yuav yog tej kev ntau nqes yuam kev rau tej poj niam thiab ua kom lawv ntshai, tej cwj pwm tswj ib tug twg los yog qee cov kev xav uas tsis hwm lwm tus ntawm peb tej zejzog. Thiab muaj qee zaus ces kuj yog tej lus tawm tswv yim hauv online los yog cov kev tso dag tso luag los yog ib co cwj pwm twg thiab ib co kev xav twg uas peb pom ntawm peb tej zejzog.''
Tsim tus qauv sib hwm
Drawing from his experience and reflecting on his memories, Mr Abrahimzadeh says that driving change can start from our homes. It's about modelling respect at home.
Nws hais tias "Tam li yog ib tug me nyuam tub hluas, ces kuv yeej saib kuv txiv tam li yog ib tug qauv piv txwv, thiab thaum kuv pom kuv txiv ua ib yam dab tsi rau kuv niam ces...Kuv yeej tau kawm thiab ua raws. Kuj yog ib yam uas ib txwm ua xwb thiab yeej yog tej yam uas yus yeej paub lawm tias yuav ua li cas,
Txog rau theem uas kuv txiv tau muab kuv niam tua, ces tau ua rau kuv tau pib los ua tib zoo xav txog txhua yam cwj pwm, uas kuv txiv tau nrog kuv niam tham los yog seb nws coj yam ntxwv li cas nrog kuv niam. Thiab kuv tsev neeg ho zoo li cas,'' raws li nws hais ntxiv.
Txawm li cas los tom qab uas nws tau plam nws niam lawm, nws thiaj tau rov qab pib kawm txog tej cwj pwm ntawd dua thiab kawm dua ib txoj xub ke tshiab los ua ntau yam coj los txhawb nqa kom tau txais vaj huam sib luag rau nws tsev neeg tshiab.
Ces nws thiaj tau siv tej teeb meem ua rau nws ntsib kev nyuaj siab ntau xyoo tig los ua ib co hom phiaj, thiab los txhawb nqa kom muaj kev pauv hloov, thiab nrog xyuas tias peb ho yuav muaj peev xwm qhuab qhia peb tej me nyuam li cas kom muaj cov kev sib hwm thiab muaj txoj kev kub siab thiab hlub tshua txog lwm tus.
Mr Abrahimzadeh tshab txhais tias "Kuv xav ua tib zoo xyuas kom kuv yog ib tug qauv piv txwv zoo, thiab tej cwj pwm thiab tej kev xav uas kuv coj yeej xav kom kus tus tub tseem yau ua raws, vim rau qhov raws li tej kev teeb txheeb qhia lawm, ces tej me nyuam yeej yuav xyaum thiab ua raws tej cwj pwm thiab tej kev sib raug zoo uas lawv tsev neeg coj los yog muaj ntawd.''
Tej niam txiv thiab tej neeg uas tu saib xyuas me nyuam tsim nyog paub txog tias seb lawv ho sib tham li cas nrog lwm tus thiab ua li cas coj los qhia txog cov kev sib raug zoo nrog lwm tus uas muaj kev sib hwm. Source: iStockphoto / Jacob Wackerhausen/Getty Images
Nws kuj yog tus coj lub koom haum JK Diversity Consultants thiab kuj yog ib tug neeg muaj ntaub ntawv raug cai ua tau cov hauj lwm pab daws kev nyuaj siab uas pab tej neeg zejzog tsiv teb tsaws chaw thiab thoj nam ntawm teb chaws Australia.
Ms Kaur hais tias tej niam txiv tsim nyog yuav tau nug tias seb lawv sib txuas lus li cas nrog lwm tus, coj tej cwj pwm uas muaj txoj kev hwm lwm tus kom muaj kev sib raug zoo nrog lwm tus, nrog lwm tus tham thiab zam tsis txhob coj tej cwj pwm nruj tsiv, tsim teeb meem rau lwm tus, los yog ua phem rau lwm tus los sis coj tej cwj pwm uas ua rau lwm tus tu siab.
Nws kuj tshab ntxhais ntxiv txog qee yam uas tseem zais hauv online uas tej hluas tsis muaj cov kev hwm lwm tus uas yuav ua rau muaj feem tsis zoo rau tej hluas tej cwj pwm thiab.
Ms Kaur hais tias tej hluas yeej siv sij hawm ntau heev mus siv tej social media platforms. Tej hluas nyuam qhuav nto nkauj nto nraug los yeej tseem yog tej uas lub hlwb tab tom txhim kho, ces tej lawv pom thiab lawv kawm thiabj yuav raws los ua ib co kev paub rau lawv.
Nws tshab txhais tias "Yog tias tej xov xwm uas yog tias tej hluas ho tau tej xov xwm cuav, xov xwm tsis tsis raug, los yog tej xov xwm tsis ncaj, thiab tej kev ntseeg uas tsis muaj kev hwm lwm tus, ces yuav ua rau tej hluas xav tias tej lawv tab tom pom, tab tom saib, thiab tab tom ua ntawd yeej yog tej uas sawv daws yeej ib txwm ua''.
Tej hluas ces yeej ib txwm xyaum thiab ua raws tej cwj pwm uas lawv pom ntawm lawv tsev neeg ua, thiab tau siv thiab pheej xav tias yog tej uas ib txwm coj ib txwm ua. Credit: Phynart Studio/Getty Images
Tej fwj chim uas tsis ras/tsis faj txog
Danny Mikati ces yog ib tug tub ceev xwm NSW dhau los. Thiab tom qab tau ua hauj lwm los tau ntau xyoo, ces nws tau pib ua cov hauj lwm teeb meem kub ntxhov hauv lub cuab yig. Lub caij ntawd ces nws kuj tau pom tias tej xwm txheej no tau ua rau muaj teeb meem dab tsi rau tej zejzog.
Ces nws thiaj tau kub siab los kawm thiab txhim kho nws tus kheej kom paub tawm tsam tej teeb meem kub ntxhov uas pheem muaj rau tej poj niam thiab me nyuam.
Mr Mikati thiaj qhia txog qhov tseem ceeb ntawm tej niam txiv los yog tej neeg qhia ntawv lub luag hauj lwm tseem ceeb rau cov kev cob qhia thiab txhawb nqa tej kab lis kev cai uas muaj kev sib hwm. Nws ntseeg tias tej no yog tej yam tseem ceeb rau lub ntuj uas pheej muaj tej fwj chim tsis zoo uas yus tsis faj txog tsis hais ntawm online los yog offline uas pheej ua rau muaj teeb meem rau tej hluas.
Tej niam txiv tsis muaj lwm txoj xub ke lawm tab sis yam tsawg yuav tsum tau paub txog tej yam yooj yooj yim thiab muaj kev nkag siab txog social media tias zoo li cas. Vim lawv tej me nyuam yeej yuav siv mus tag lawv ib sim neej. Thiab Australia kuj yog ib lub teb chaws ntawm ntau lub uas muaj neeg siv social media ntau heev. Thiab peb tej me nyuam feem coob ces yeej yog cov uas siv tej social media yam tsawg li ib los yog ob lub. Ces thiaj xav kom tej niam txiv yuav tsum nkag siab txog tej kev phom sij no.Danny Mikati
Mr Mikati thiaj qhia txog qhov tseem ceeb ntawm cov kev tiv thaiv. Li yuav tau qhia rau tej hluas tias cov kev sib raug zoo nrog lwm tus uas zoo ntawd ho zoo li cas ua ntej lawv yuav coj tej cwj pwm tsis zoo.
Nws hais tias "Peb tsis muaj peev xwm pub thiab tsim tej chaw rau tej neeg raug teeb meem kub ntxhov hauv lub cuab yig tau nyob kom ntau ntxiv, txawm tias tej neeg xav tau cov kev pab no. Tab sis yog tias peb tsuas dws tej teeb meem uas tshwm sim no tas mus li xwb, ces yuav ua rau peb tsis muaj peev xwm los daws tau tej chiv keeb hauv paus tseem ceeb uas pheej ua rau muaj tej teeb meem no li.''
Tej niam txiav, tej lees kais, tej neeg tu thiab saib xyuas me nyuam tsim nyog yuav tsum npaj lawv tus kheej kom zoo tshaj qub ntxiv kom thiaj ras txog thiab paub txog thiab daws tej cim uas tsis muaj kev hwm lwm tus, thiab taw qhia tej me nyuam yaus kom nkag siab txog cov kev sib raug zoo tias zoo li cas. Source: iStockphoto / dusanpetkovic/Getty Images/iStockphoto
Cov pgoram xau tej teeb meem thaum tseem yuav xub pib muaj
Tsoom fwv Australia yeej tau sim ntau cov kev pab los tawm tsam nrog tej teeb meem kub ntxhov hauv lub cuab yig uas muaj cov program hu ua 'Stop it at the Start' nrog thiab.
Nws tshab txhais tias " ces yog bi co uas muaj lub hom phiaj los tiv thaiv txhua yam xo tsis zoo ntawm tej txiv neej uas tau coj mus nthuav tawm hauv tej social media tsis ntev los no.''
Ms Kaur ces yeej yog ib tug neeg txaus siab hlo los txhawb nqa cov hauj lwm xaus thaum tseem yuav pib no tam li yog ib tug neeg muaj fwj chim ntawm tej neeg coj ntseeg ntau yam kab lis kev cai.
Nws hais tias yog tej yam tseem ceeb yuav tau nkag siab txog tej kab lis kev cai ib txwm coj thiab tej kev vam kev cia siab ntawm tej neeg tsiv teb tsaws chaw thiab thoj nam rau lub caij lawv pib neej tshiab ntawm teb chaws Australia.
Ms Kaur tshab txhais tias "Yog tias lawv yog cov neeg uas yeej coj raws li tej kev coj taug li ib txwm coj los yog cov kev ntseeg ib txwm coj, ces tej zaum yuav tsis yog tej cwj pwm uas tej zejzog coj ntawm Australia. Thiab yog kuv txheeb txog tej kuv tau paub tau pom ntawm ntau phaum neeg sib txawv uas tau tuaj rau teb chaws Australia, ces yog xam raws cov kev xav txog cov kev hwm thiab tej kev cai uas txiv neej ua tus coj ntawd, ces tej zaum poj niam yeej tsis muaj vaj huam sib luag yuav hais tau sib nrawg nroos li txiv neej ntawm ib tse neeg twg thiab tej zaum yuav raug xam tias tsis muaj faj huam sib txig sib luag li txiv neej.''
Nws thiaj taw qhia kom tej niam txiv, tej lees kais, tej neeg tu thiab saib xyuas lwm tus yuav tau npaj lawv tus kheej kom zoo tshaj qub kom lees paub thiab los nrog daws ntau yam cim uas tsis muaj kev sib hwm thiab taw qhia kom tej me nyuam yaus nkag siab txog tias cov kev sib raug zoo uas zoo ntawd zoo li cas tiag.
Thiab tsis tas li ntawd los yuav tau tsim kom tau ib qho chaw uas tau txais kev nyab xeeb thiab muaj kev sib hwm kom thiaj muaj peev xwm sib tham yam tso tshav lug thiab nug tau ntau yam lus nug.
Ms Kaur thiaj hais tias ib txoj xub ke los pab kom tej zejzog muaj peev xwm pab tiv thaiv kom tsis txhob muaj teeb meem kub ntxhov hauv lub cuab yig thiab daws tej teeb meem no ua ntej yuav pib tshwm sim ces yog yuav tsum tau lees paub txog tej cwj pwm ua phem rau lwm tus los yog lees paub tej cwj pwm tsim kev kub ntxhov rau tej poj niam me nyuam thiab tej neeg dua kev uas pom tej xwm txheej no los yuav tsum tau kub siab nrog tawm tsam tej xwm txheej no.
Nws hais tias "Peb yuav tsum tau lees paub tias tej cwj pwm tsis tsim nyog coj yog tej cwj pwm yuav tsis nyog ntawm teb chaws Australia no. Thiab yog thaum ib tug twg dua kev pom tej xwm txheej no ces yuav tsum tawm tsam tsis pom zoo thiab pab tus neeg uas raug lwm tus tsim teeb meem rau. Thiab peb yuav tau ua tib zoo xyuas kom tej neeg no mus thov tau tej kev pab cuam raws li qhov tsim nyog pab rau lawv. Kuv xav tias lub caij nyoog twg tau dhau mus lawm, thiaj li xav kom tsis hais tag nrho tej poj niam, txiv neej thiab peb tej coj ntawm tej zejzog yuav tau kub siab tib yam nrog daws tej teeb meem uas pheej tsim kev kub ntxhov hauv lub cuab lub yig no.''
Yog tias koj los yog ib tug twg raug lwm tus yuam deev, thab zes los yog raug teeb meem kub ntxhov hauv lub cuab yig ces muaj peev xwm hu tau rau lub koom haum 1800RESPECT tus xov too 1800 737 732 los yog hu rau lub koom haum Lifeline tus xov tooj 13 11 14.
Koj kuj muaj peev xwm mus txheeb xyuas txog ntau yam cwj pwm uas tsis hwm lwm tus uas muaj hauv online tau ntawm
SBS yeej koom tes nrog tsoom fwv Australia cov hauj lwm Stop it at the Start.
