Siv neeg txum tim tej duab sib cuag nrog lub teb chaws thiab yav dhau los

Gamilaraay/Bigambul and Yorta Yorta artist Arkeria Rose Armstrong Credit: Arkeria Rose

SBS Hmong

View Podcast Series

Get the SBS Audio app

Other ways to listen

Australia tej neeg txum tim Aboriginal thiab Torres Strait Islander yeej tau siv tej txuj kos duab coj los ua ib co twj los ceev txuag lawv ntau yam dab neeg cuam tshuam txog tej kab lis kev cai, kev ntseeg sab ntsuj plig thiab tej txuj ci tseem ceeb txog lub teb chaws.

Ntsiab lus tseem ceeb:

Neeg txum tim tej duab yeej muaj ntau yam tswv yim kos sib txawv tsis yog tib lub tswv yim kob duab uas tub tej kob (xim) ua ib tee ib tee xwb.
Yog li ntawd tej duab thiaj li yog ib yam twj uas teev txog ntau yam dab neeg kab lis kev cai, kev ntseeg sab ntsuj plig thiab tej txuj ci uas tau qhia ntawm ib phaum rau lwm phaum neeg los tau ntau tiam neej thiab yeej tseem ua li no txuas ntxiv los txog niaj hnub niam no.
Tej duab no tau pab kom tej neeg kos duab sib cuag tau nrog lawv tej teb chaws.
Tab sis tej cim uas tej neeg kos duab siv ntawd yeej muaj tej ntsiab lus sib txawv ntawm ib tug rau lwm tus thiab.

Tej neeg txum tim tej duab ces kuj yog tej yam ntawm ntau yam yam khoom qub tshaj plaws hauv ntiaj teb thiab yeej qhia txog ntau yam keeb kwm, uas

tej duab kos rau pob zeb kuj yog tej duab qub tshaj plaws

txog li 17,500 xyoo dhau los.

Tej duab no ces yeej yog ib co twj tseem ceeb uas Australia tej neeg txum tim Aboriginal thiab Torres Strait Islander yeej tau siv ua ntuv zus coj los qhia txog lawv tej dab neeg ntau yam txog lawv tej kab lis kev cai, tej kev ntseeg sab ntsuj plig thiab tej txuj ci tseem ceeb txog lub teb chaws.

Neeg txum tim tej duab ces yeej yog ib co duab los yog paj ntaub coj los dai ntawm tej phab ntsa, uas yeej ua ntau hom, thiab siv ntau yam txuj los ua, ib daim twg yeej qhia txog ib cov neeg txum tim twg lub teb chaws, lawv tej kab lis kev cai thiab lawv tej zejzog.

Raws li Maria Watson-Trudgett uas yog ib tug poj niam neeg txum tim caj ceg neeg Koori thiab yog cov neeg nyob ntawm lub teb chaws 'dej tsuag' ntawm tsav neeg Wiradyuri hais ces tej neeg yeej tseem totaub yuam kev tas mus li txog neeg txum tim Aboriginal tej duab.

Ms Watson-Trudgett ces yog ib tug neeg txum tim uas sab laj tawm tswv yim rau lwm tus thiab kuj yog ib tug neeg uas nws qhia nws tus kheej kom paub kos duab uas yeej kub siab heev xav qhia txog nws tej neeg txum tim Aboriginal tau kab lis kev cai rau lwm tus.

Maria Watson-Trudgett is a First Nations consultant, a self-taught artist, and a storyteller Credit: Maria Watson-Trudgett Credit: Courtesy of Richmond Fellowship Queensland, 2019

Nws tshab txhais tias “Yeej muaj ib txhia neeg tseem pheej xav tias tej duab kos ua ib tee ib tee yeej ib txwm yog Australia tej neeg txum tim Aboriginal tej duab tiag. Tab sis qhov tseeb tiag tsis ygo li hais ntawd, lawv xav yuam kev lawm.

“Peb tej duab peb ib txwm kos ces yog tej yam coj los kos rau peb tej twj ntau yam, coj los txaug rau tej ntoo coj los ua koom txoos thiab coj los kos qhia tej chaw tsev yeeb, los sis yog coj los pleev rau peb lub cev thaum ua tej koom txoos. Ces thiaj tsis yog tib co duab kos nkaus xwb.''

Ms Watson-Trudgett qhia ntxiv tias nyuam qhuav tau muaj tej duab kos ua ib tee ib tee tau tshwm sim rau lub caij xyoo 1970 tawm ntawd ntau tau muaj kev pauv hloov

rau cov kev kos duab ntawm thaj hav suab puam sab hnub poob ntawm Papunya xwb

, uas yog ib lub zos neeg txum tim Aboriginal nyob sab hnub poob qaum teb ntawm Alice Sprins xwb. Qhov chaw no thiaj yog thaj chaw uas Australia tej neeg txum tim Aboriginal kos duab tau pib siv tej kob (xim) dej coj los kos rau tej phiaj ntoo uas thaum qhuav ces tej xim no khub tsis nti lawm coj los qhia txog lawv tej dab neeg qub qub xwb.

Yeej muaj neeg txum tim Aboriginal ntau yam txuj kos duab uas tej neeg kos duab siv coj los qhia txog lawv tej dab neeg thiab lawv tej keeb kwm. Yog li ntawd neeg txum tim tej duab thiaj yog ib yam dab tsi uas ib tug neeg txum tim pleev/kos qhia qhia txog cov kev sib cuag nrog lawv tej teb chaws, tej kab lis kev cai ... thiab pab kom lawv muaj kev sib cuag tau los yog mloog tau tias lawv yog ib feem ntawm lawv lub teb chaws.
Maria Watson-Trudgett

Faib/Qhia tej kab lis kev cai rau lwm tus

Ms Watson-Trudgett yeej tau pib kos duab xyoo 2009 tam li yog ib txoj xub ke pab kom nws kaj siab thiab tau so rau lub caij nws nyuaj siab heev thaumt seem kawm tsev kawm qib siab full-time. Txawm li cas los tsis ntev tom qab ntawd ces nws kuj txheeb tau tias cov kev kos duab no tseem ceeb tshaj qhov uas ''pab tswj tau yus lub siab kom tus lawm thiab.''

Tej kev kos duab no yog tej yam uas muaj peev xwm siv coj los qhia txog kuv zaj dab neeg rau lwm tus, thiab pab ceev txuag kuv tej kab lis kev cai kom tsis txhob ploj. Tsis tas li ntawd los kuj pab kom kuv rov qab sib cuab tau nrog kuv cov neeg Aboriginal tej kab lis kev cai, sib cuag tau nrog kuv lub teb chaws, sib cuab tau nrog kuv tej laus neeg thiab kuv tej neeg, thiab qhia txog tej txuj ci uas kuv kawm tau thaum kuv tseem loj hlob ntawm kuv lub teb chaws nrog kuv tsev neeg.
Maria Watson-Trudgett

Arkeria Rose Armstrong ces yog ib tug neeg kos duab neeg txum tim caj ceg neeg Gamilaraay/Bigambul thiab Yorta Yorta uas yeej tseem nco tau ntau yam dab neeg uas nws pog nws yawg tau qhia rau nws.

Nws pog los luj yog ib tug laus neeg tseem ceeb ntawm cov neeg txum tim Gamilaraay thiab kuj yog tus neeg kos duab kawg ntwm hav suab puam ntawm thaj chaw ntawd.

Nws tshaj txhais tias “Thaum nws tseem zaum hauv pem teb ces nws yeej qhia nws tej dab neeg ntau yam, txog nws lub teb chaws, uas yog lub teb chaws hav suab puam, thiab nws yeej siv xuab zeb los qhia ntau yam dab neeg rau peb.''

Tej dab neeg no los yeej yog tej uas ntau phaum neeg dhau los tau qhia rau ib tiam dhau rau ib tiam neeg uas muaj tej dab neeg txog tus tswv tsim, tej tsiaj txhu, tej hnub qub, thiab tej uas nws pob tau paub tau pom tau ua dua rau lub caij nws loj hlob ntawm nws lub teb chaws. Ib zaj dab neeg twg ces yeej qhia txog ib yam dab tsi, raws li nws hais.

Art has always been part of Arkeria Rose Armstrong’s life. Credit Arkeria Rose Armstrong

Nws hais tias “Nws yeej qhia txog nws lub neej thiab yeej qhia txog nws tej dab neeg ntau yam ntawm nws tej duab. Ces nws thiaj siv tej cim ntau yam coj los qhia rau peb hauv nws tej duab.''

Ms Armstrong thiaj piv txog nws tej duab tias ''yeej muaj kev sib cuam tshuam nrog nws ob lub teb chaws.''

Ces nws thiaj tau siv tej cim uas nws pog qhia nws, thiab siv tej txuj uas nws yawg uas kuj yog ib tug neeg kos duab thiab tau qhia rau nws.

Yog li ntawd cov kev siv nws tej duab rov qab coj los qhia txog ntau yam dab neeg thiaj pab kom nws rov qab txheeb txog tej kev sub cuag mus los nrog zaj dab neeg ntawd, thiab kuj ua rau nws rov qab nco txog tej kev xav ntau yam — uas nws yeej qhia rau nws tus ntxhais thiab.

Yog tias koj xav kom tseem coj koj tej kab lis kev cai txuas ntxiv, ces koj yuav tau qhia/faib koj tej kab lis kev cai rau lwm tus, thiab yuav tau ua tej kab lis kev cai no. Cov kev qhia rau peb phaum neeg txuas ntxiv yog cov kev ua tib zoo xyuas kom lawv tau los koom ntau yam kev sib tham.
Arkeria Rose Armstrong

Cov kev sib cuag nrog tej kab lis kev cai

Davinder Hart ces yeej yog ib tug neeg kos duab uas nws tsev neeg nyob ntawm cheeb tsam sab hnub poob qab teb ntawm lub teb chaws Noongar ntawm xeev Western Australia. Nws yeej tau nyob rau ntawm nroog Adelaide thaum tseem yau ua ntej yuav rov qab muaj kev sib cuag nrog nws tej kab lis kev cai ntawm lub teb chaws Ngemba ntawm xeev New South Wales ntawm yav lig ntawm nws lub neej.

Mr Hart los kuj ntsib ntau yam teeb meem nyuaj rau lub caij ntau xyoo thaum tseem ntxov ntawm nws lub neej, nws thiaj tsis kawm ntawv thaum muaj hnoob nyoog 16 xyoo, thiab tsis muaj peev xwm nrhiav tau hauj lwm ua, thiab cuam tshuam txog tej teeb meem yaj yeeb txhaum cai.

Txawm li cas los vim tau txais kev pab thiab kev taw qhia ntawm nws tej txiv ntxawm txiv hlob thiab tej kwv tij ces thiaj muaj peev xwm tig thiab pauv hloov tau nws lub neej tshiab thiab pab kom nws rov qab sib cuag tau nrog nws tej kab lis kev cai, uas yeej ib txwm qhia rau hauv nws tej duab nws kos.

Nws hais tias “Kuv kuj muaj hmoo heev uas tau ntsib kuv tej ntxiv hlov txiv ntxawm thiab kuv tej kwv tij uas tau qhia ntau tsav ntau yam dab neeg txog kuv lub teb chaws rau kuv, thiab tej dab neeg no ces yeej qhia kom yus paub tias yus yuav tau coj yus tus kheej ua ib ib tug neeg zoo li cas.''

Yog tham rau Mr Hart lawm ces tej kev kos duab no tsis yog tias yog tej yam pab kom nws rov qab muaj peev xwm sib cuag tau nrog nws tej kab lis kev cai xwb, tab sis kuj tseem yog ib txoj xub ke pab kho nws kom ras los ua tau lub neej thiab.

Nws tshab txhais tias “Yog thaum kuv tab tom kos duab lawm ces yeej pab kom kuv tswj tau kuv lub siab kom tus. Thiab kuv xav tias feem ntau ces zoo li yus tus ntsuj yeej ua tus kos duab thiab yeej paub tias yuav kos li cas lawm. Ces thiaj yog tej yam pab tau kuv zoo heev li thiab.''

Davinder Hart at Saudi Arabia, UN gala dinner, 2023. Credit Davinder Hart

Yog ib feem ntawm cov kev sib faib sib qhia dab neeg nrog lwm tus

Ms Watson-Trudgett tshab txhais tias tej zaum neeg txum tim tej neeg kos duab kuj yuav siv tej cim ntau yam los kos lawv tej duab, ib txhia cim ces yeej qhia tsi ntsees rau lawv tej teeb chaws, piv txwv li qhia txog tej hneev taw tej lw tsiaj ntau yam.

Yog li ntawd cov kev siv tej kab thiab neeg txum tim tej cim ntawm nws tej duab thiaj qhia txog nws tej poj koob yawm koob cov kev sib tham thaum lawv kos duab qhia qhia txog ib yam dab tsi los yog ib co cim dab tsi hauv pem teb.

Txawm tias tej zaum qee cov cim yeej yog tej uas sawv daws yeej siv feem coob, los kuj muaj lwm yam cim nyias kuj muaj nyias ntsiab lus txhais sib txawv rau tej neeg kos duab thiab.

Nws hais tias “Ces thiaj li nyob ntawm seb tej neeg kos duab teev lub ntsib lus li cas rau tej cim lawv siv nawd xwb. Thiaj tsis xav kom peb cia li xav tias tej zaum tej cim ntawd sawv cev rau tib yam li lwm tus neeg kos duab xwb thiab.''

Ms Armstrong hais tias qhov chaw pib zoo tshaj plaws ces xav kom ntug txog tej dab neeg uas raug coj mus qhia rau hauv tej duab kos ntawd seb yog sawv cev rau dab tsi.

Nws hais tias “Kuj nug tias seb tus neeg kos duab ntawd yog tsav neeg txum tim twg? Yog tej neeg ntawm cov teb chaws twg thiab lawv ho zoo li cas? yog thaum yus pib nug tej lus nug no lawm ces yuav pib ua rau yus pom thiab yus paub txog tus neeg ntawd lawm,''

Kuv qee cov xub ke uas kuv nyiam siv coj los qhia txog kuv tej duab rau lwm tus thaum coj mus tso rau tej neeg sawv daws saib ces yog yus mus kiag rau ntawm thaj chaw ntawd, uas yus yeej muaj peev xwm zaum thiab nrog tej neeg tham txog yus tej duab yus tau kos ntawd.

“Kuv xav tias muaj qee zaus kuj yog tej yam nyuaj kawg thiab thaum peb siv ib daim card me me coj los qhia ib zaj dab neeg dab tsi ntawm daim duab ntawd ib sab xwb. Tsuas nyob rau ntawm seb yus ho muaj kev sib raug zoo npaum li cas nrog lwm tus neeg uas yuav ua rau yus qhia ntau npaum li ntawd txog daim duab ntawd rau tus neeg ntawd xwb. Tam li yog tib tug poj niam neeg txum tim caj ceg neeg Gamilaraay ces peeb yeej qhia rau ib tug neeg yog thaum nws npaj txhij tias yuav kawm mloog yuav kawm lawm.''

Mr Heart thia hais ntxiv tias ''Xav kom qhib siab dav, tsis txhob ntshai yuav nug tej lus nug ntau yam. Thiab thaum muaj cov kev sib tham ntawd lawm ces kuj pab kom peb muaj txoj kev sib cuag mus los tau lawm thiab.''