Melissa Carbonell Fullerton tau ncaim teb chaws Colombia tuaj nyob rau teb chaws Australia no 10 lub xyoo dhau los lawm. Nws kuj tau nyob rau lub nroog Melbourne uas muaj neeg nyob coob heev ntawd rau lub sij hawm no ntau lub xyoo ua ntej yuav txiav txim siab mua nyob ntawm lub zos Mornington Peninsula nrog nws tus txiv.
“Tos kuv ho mus nyob lub zos ntawd los vim kuv xav hloov txoj kev ua lub neej ntawm lub nroog uas muaj ntau tsav nyam ntxhov hnyo mus nyog rau tej zej ntsiag tos tsis tshua toog ntsej heev."
Vim li cas thiaj mus nyob cheeb tsam tuaj ntug nroog hauv teb chaws Australia?
Muaj ntau yam laj thawj zoo ua rau tej neeg xav mus nyob rau tej zos tuaj ntug los yog tej zos yaj sab thiab, xws li vaj tse pheej yig thiab kuj muaj hauj lwm ua yog qhov tseem ceeb ua rau tej neeg xav mus nyob. Thiab tej zos yaj sab los yeej xav tau cov neeg kom coob mus pab lawv ua hauj lwm thiab.
Yog koj xav piv los yog xav paub tias tej lagluam ntawm cov zos yaj sab thiab nyob tuaj ntug nroog loj zoo li cas ces siv cov twj mus txheeb xyuas tau.
Lub koom haum tus coj Nick Tebbey los kuj ntseeg tias kev tsiv mus nyob rau tej zos yaj sab hauv teb chaws Australia no kuj yuav muaj peev xwm mus pab tau tej zos ntawd kom rov qab zoo dua tuaj ntxiv thiab.
"Vim cov kev tsiv ntawm tej nroog loj mus nyob cov zos yaj sab no ua rau yus mloog tau tias zoo li yus yog ib feem ntawm lub teb chaws no, ua lub neej ntsiag to thiab muaj kev sib txuas lus muaj kev sib raug zoo nrog tej neeg zejzog li ib txhia yeej tau ib txwm nyob ua zej ua zos rau lawv qub teb qub chaw dhau los ua ntej lawv tuaj nyob teb chaws Australia no."
Ntxiv ntawd los tej zaum ib txhia zos yuav tsis muaj tej neeg hais yus hom lus ntxiv lawm thiab yuav hais lwm hom lus txawv lawm xwb.
Txawm li cas los yog yus nyob swm lawm ces kuj tsis muaj dab tsi ntau thiab. Vim teb chaws Australia yeej muaj ib cov program coj los pab kom cov neeg txawv teb chaws tsiv tuaj nyob thiab tuaj ua dua lub neej tshiab hauv teb chaws Australia nyiam mus nyob rau tej nroog los yog tej zos yaj sab ntau cheeb tsam thiab. Piv txwv li cov zos, uas muaj cov neeg thoj nam African refugees tau mus pab cov neeg zejzog uas yog cov laus neeg kom rov qab kub siab ua lawv lub neej tshaj qub tuaj ntxiv thiab.
Nyob ntawm lub zos uas yog sab qaum teb ntawm lub zos Bendigo, ces yeej muaj cov neeg zejzog uas tau lub zoo neej thiab. Lawv kuj tau teeb tsa khw muag khoom ntawm lub zos no thiab.
Jace Archer uas yog tus coj lub koom haum tau qhia tias “Yeej muaj neeg zoo siab thiab xav paub xav pom heev txog tej yam uas cov neeg tshiab uas tau mus nyob tej zos ntawd tau pab lawv lub zos thiab.”
Cov kev npaj yuav mus nyob tej zos yaj sab:
Cov kev txiav txim siab ncaim txoj kev ua lub neej hauv nroog mus nyob yaj sab yeej tsis yog tej yam yooj yim.
Carbonell Fullerton hais tias “Thaum xub ces kuv yeej yoob tsis pom qab yuav ua li cas, vim 10 lub xyoo dhau los ua kuv tau tuaj nyob teb chaws Australia no, kuv yuav tau tsim kev phooj ywg thiab thiab nrhiav dua hauj lwm tshiab ua thiab yuav tau pib txhua yam tshiab dua.” "Yog li cov kev rov qab tsiv ntawm nroog mus nyob rau cov zos yaj sab ntawm xeev Victoria thiaj ua rau kuv mloog tau tias zoo li rov qab yog ib cov kev tsiv teb tsaws chaw dua ib zaug ntxiv thiab, tab sis kuj tsis yog ib lub tswv yim phem thiab, vim siv sij hawm tsis ntev xwb kuv twb swm txoj kev ua lub neej ntawm lub zos kuv mus nyob ntawd lawm thiab. Vim kuv paub lus zoo ces kuv thiaj nrhiav tau hauj lwm tshiab thiab tsim tau phooj ywg tshiab lawm thiab."
Tam sim no ces nws twb ntawm lub zos Mornington Peninsula ruaj lawm, nws twb yuav tau ib lub tsev ze ntug hiav txwv thiab nrhiav tau ib txoj hauj lwm ntawm lub tuam txhab tsim xov xwm qhia tej neeg zejzog cog zaub ua thiab tshwj xeeb tseem npaj yuav tau ib tug me nyuam tshiab sai sai no thiab.
Yog tias koj txiav txim siab tias yuav ua siab mus nyog cov zos yaj sab tiag, ces Archer thiab Tebby xav kom koj yuav tau mus teeb txheeb kom thiaj nrhiav tau thaj chaw zoo thiab koj nyiam tshaj plaws ua koj xav tsiv mus nyob ntawd haum raws li qhov koj xav tau.
Xav kom koj sib txuas lus, nug thiab nrog cov chaw pab cov neeg tsiv teb tsaws chaw hauv koj tej zejzog tham seb lawv ho puas pab tau koj mus xyuas ib co zos yaj sab ntawm ntau cheeb tsam twg. Yog thaum koj paub tias kom nyiam ib qhov chaw twg lawm, ces xav kom koj nrog cov nom tswv zos tham thiab mus txheeb xyuas cov chaw pab cov neeg tsiv teb tsaws chaw ntawm lub zos ntawd tham.
Tab sis ua ntej koj yuav txiav txim siab ua zaum kawg mus nyob lub zos tshiab ntawd, Archer xav taw qhia kom koj mus saib thiab mus xyuas kiag lub zos ntawd.
“Sau thiab teev cov zos ua koj nyiam ntau lub ntawd tseg, mus nrog tej neeg ntawm cov zos ntawd tham kiag los yog nrog tej neeg lawv paub tham, ntxiv ntawd ho mus nrog cov koom haum zejzog ntawm lub zos ntawd tham thiab caij tsheb mus xyuas kiag lub zos ntawd, mus nrog cov neeg ntawm lub zos ntawd tham kiag.” “Kuv ntseeg tias koj yuav txheeb tau ntau yam zoo thaum koj siv caij nyoog ntoj taw suam hneev mus xyuas thiab nrog tej neeg zejzog tham kiag lawm ces koj thiaj li yuav paub tias muaj cib fim dab tsi zoo ntawm lub zos koj xav mus nyob ntawd. Vim rau qhov tej hais no yog ib lub zoo tswv yim tsim nyog koj ua tsis hais yuav tsiv mus nyob rau qhov twg li, thiaj yog tej yam zoo rau koj dua yog koj mus saib mus xyuas kom pom kiag ntawm qhov muag seb zoo li cas ua ntej yuav txiav txim siab ua zaum kawg mus nyob lub zos ntawd."#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes tuaj koom ua tub koom siab thiab koom mloog tau tau ntawm #SBSHmong lub Facebook page tau.
