Ntsiab lus xov xwm:
- Txij no mus ces lub koom haum Australian Technical Advisory Group on Immunisation (ATAGI) tau tso cai rau Australia tej hluas hnoob nyoog 16 thiab 17 xyoo muaj cai hno tau koob tshuaj COVID-19 Pfizer vaccine koob 3 (Booster shot) lawm tom qab tau hno koob 2 ntev txog li 3 lub hlis.
- Anthony Albanese uas yog tus coj lwm pawg fai kum xeeb ntawm teb chaws Australia tau hais kom tus nom Richard Colbeck tawm tsis txhob ua nws txoj hauj lwm tswj thiab tu tsom kwm saib xyuas Australia tej laus neeg lawm tom qab muaj tej laus neeg txog 471 leej tas sim neej xyoo no. Thiab nws tau nqua hu kom Australia tus thawj pwm tsav muab tus nom no rho tawm hauj lwm.
- Professor Paul Kelly uas yog teb chaws Australia tus coj tswj dej num noj qab haus huv hais tias tej neeg kis tau kab mob COVID-19 uas tas sim neej tshaj 71 feem pua ces yog cov neeg uas yeej xub muaj mob ua ntej lawm li muaj cov mob ntshav qab zib, cev muaj ceeb thawj, mob plawv, mob ntsws los ntev.
- Tsoom fwv teb chaws Australia qhia tias yuav koom tes nrog nom tswv xeev Northern Territory tsim ib lub chaw khaws tej neeg Jewish cov qub puav pheej coj los ua ib cov kev qhia tej keeb kwm uas cov Nazis tau muab tej neeg no txog 6 million tus tua rau thaum ua tsov rog ntiaj teb zeeg 2 dhau los. Thiaj yog tej yam qhia txog yav tag los, tam sim no thiab lub neej pem suab. Txawm yog ib cov kev nqe peev nyiaj txiaj tsawg los cia siab tias yuav tau txais txiaj ntsim ntau.
- Tej koom haum pab cuam cov neeg txom nyem tau nqua hu kom tsoom fwv Australia nrhiav kev pab cuam rau teb chaw Afghanistan kom ntau tuaj ntxiv rau lub caij tej koom haum no ceeb toom tias mwb muaj neeg txom nyem thiab tshiab nqhis ntau tuaj ntxiv txij li tus tsoom fwv Taliban los txeeb tsoom fwv pej xeem tswj hwm. Vim tam sim no twb muaj tej me nyuam yaus txom nyem uas xav tau txais kev pab cuam tshuaj 13 million tus lawm. Tib lub caij no los tsoom fwv Taliban ntawm lbu teb chaws no kuj qhia tias nws rov qab tso cai rau tej tub kawm poj niam rov qab mus kawm ntawv qib siab ntawm 34 lub xeev ntawm lub teb chaws no thiab kuj tau rov qab tso cai rau tej me nyuam ntxhais hnoob nyoog tshaj 6 xyoo mus kawm ntawv tau. Yog li zejzog pej kum haiv thiaj tseem tos seb Taliban puas yuav siv cov cai nruj coj los tswj thiab txwv tsis pub poj niam thiab tej ntxhais hluas mus kawm ntawv lso yog tsis pub ua hauj lwm ntawm tej chaw ua hauj lwm los yog tsis pub ua lub neej koom teb chaws li nws tau tswj nruj rau lub caij xyoo 1990s uas nws tswj hwm ntawd.
- America tus coj uas tshaj xov xwm rau lub tuam chav tiv thaiv teb chaws Pantagon uas yog John Kirby tau qhia tias America cov kev xa 2000 tus tub rog mus pab cov teb chaws phooj ywg NATO tsuas yog mus tswj kev ruaj ntseg rau cov teb chaws no xwb tsis yog yuav mus koom cov kev sib ntaus sib tua los yog mus rau teb chaws Ukraine.
- Vientiane Times tau tshaj tawm tias nom tswv Nplog muaj tshuaj COVID-19 vaccine txaus coj los hno rau nws cov pej xeem ntau tshaj 7 million tus rau lub caij nom tswv Japanese tau pab nyiaj yuav laug txog li USD 9 million rau Nplog cov weather warning system ntawm Nplog 6 lub xeev.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download kom koj mloog tau SBS Hmong.
