Cov kev yuav nrhiav hauj tshiab lwm ua, pib lagluam tshiab tsis yog tej yam ua tau yooj yim.
Raws li Derynthia Byod muaj 60 xyoo uas yog ib tug neeg ua cov hauj lwm Human Resource thiab recruitment los tau 40 xyoo los yeej tseem ntsib teeb meem thaum lub tuam txhab nws ua hauj lwm rau txiv txim siab mus ua lagluam txawv teb chaws thiab nws tau txiav txim siab tawm nws txoj hauj lwm.
Nws hais tias yeej tsis xav tias yuav rov qab nrhiav hauj lwm ua dua tshiab los yog ua lagluam dab tsi li, tab sis thaum nws tau ntsib ib tug yoga teacher rau lub caij nws mus ncig txawv teb chaws ces txawm ua rau nws tig los kub siab txog cov yoga no lawm.
Nws tau mus kawm ua ib tug xibfwb qhia yoga thiab mus kawm kom paub txog tib neeg lub cev thiab cov kev ua hauj lwm 2 xyoos thiab tau los tsim cov chav qhia yoga rau cov neeg muaj hnoob nyoog li nws lawm.
Tab sis nws kuj tseem qhia tias yog tej yam nyuaj vim tseem muaj qee zaus yus pheej tseem xav tias xyov yus puas muaj peev xwm yuav ua tau tej hauj lwm tshiab los yog ua cov lagluam tshiab ntawd li.
Joanne Maxwell uas yog ib tug neeg pab sab laj txog tej hauj lwm (Career coach) rau cov neeg hnoob nyoog tshaj 40 xyoo rov sauv los kuj tau qhia tias vim peb muaj txoj sia nyob tau ntev txiv tuaj txog 4 lub xyoo, tau txais kev noj qab haus huv thiab muaj zog cus dua txheej pog yawg lawm ces yeej tsis yog tej yam dab tsi txawv uas tej neeg yuav ua dua lwm yam hauj lwm tshiab.
Tsis tas li no 2 lub tsev kawm qib siab Swinburne University of Technology thiab Queensland University of Technology txheeb tau tias cov neeg muaj hnoob nyoog tus zauv nrab 57 xyoo yog cov tswv lagluam tshiab txog li 34% diam.
Joanne Maxwell hais ntxiv tias yuav tsum tau sim cov lagluam tshiab li gig economy uas yog cov hauj lwm contract ua hauj lwm rau lwm tus ib ntus los yog freelance nrog rau cov tuam txhab li Air B&B, Airtasker, Uber seb ho puas nyiam puas haum yus los yog puas tau nyiaj mus puas tau zoo ua ntej yuav ua cov hauj lwm no los yog ua yam lagluam yus xav ua thiab ua ntej yuav siv tej nyiaj yus khaws tau ntawv coj los ua lagluam.
Lub koom haum Australian Human Rights tsab ntawv cej luam 2 xyoos dhau los los yeej txheeb tau tias tej tuam txhab lagluam yeej tsis tshua nyiam ntiav cov neeg muaj hnoob nyoog tshaj 50 xyoo ua hauj lwm. Tab sis Ailis Logan uas yog ib tug career coach uas pab nrhiav hauj lwm rau cov neeg tsiv teb tsaws chaw muaj hnoob nyoog ua tias nyob ntawm yus txoj kev xav xwb yog yus ntseeg yus tus kheej tias muaj peev xwm ua tau ces yus yeej ua tau xwb.
Alis Logan los kuj tau qhia tias yuav tsum tau mus nrog tej lagluam tham seb lawv, seb lawv ua lagluam dab tsi, lawv cov neeg sib tw lagluam yog dab tsi, lawv ua tau hom lagluam twg zoo, lawv puas yuav los yog xav ntiav neeg ua hauj lwm, thiab nug los yog tham kom paub txog lawv tej tuam txhab zoo los yog paub neeg zoo ntawm tej tuam txhab lagluam ntawd ces yus thiaj yuav nrhiav tau hauj lwm ua. Vim yeej tau muaj ib txhia tuam txhab tsis coj tej hauj lwm mus haub tau yaum (advertise) hauv tej ntawv xov xwm tab sis tsuas cev ncauj qhia lwm tus xwb uas yeej xav ntiav cov neeg muaj hnoob nyoog uas paub ua hauj lwm zoo thiab paub nrog tej neeg customer tham.
Raws li Australia lub tsev tsoom hwv (Parliament of Australia) tau qhia ces cov lagluam me thiab nrab yog cov ntiav tej neeg ua hauj lwm txog 70% diam.
Thiab Judy Higgins uas yog tus tswj lub vam sabuas yog ib lub vam sab ntiav cov neeg muaj hnoob nyoog ua hauj lwm los yeej tau qhia tias yuav tsum mus kawm kom tau ntawv pov thawj certificate III, IV thiab yog xav ua qee yam hauj lwm li tu tej laus, zov me nyuam, ua zaub mov noj, tus qab vag tsib taug los yog tu vaj thiab mus ua police check ces yeej nrhiav tau hauj lwm ua xwb.
Lub koom haum tau qhia tias rau tsaib no xyoo 2016 ces lawv tau kwv yees tias cov hauj lwm peb niaj hnub ua tam sim no txog li 40% yuav tsis muaj rau tej neeg ua ntxiv rau lub sij hawm li 10 los yog 15 xyoo ntxiv no lawm vim muaj tej technology los yog neeg tooj neeg hlau los ua tas lawm.
Yog li ces Judy Higgins thiaj xav kom peb yuav tau mus kawm thiab xyaum kom muaj tej txuj ci tej txuj tes tshiab kom muaj peev xwm ua tau tej hauj lwm tshiab.
