ការប្រឡងប្រជែងជ្រើសរើសមន្រ្តីកសិកម្មឃុំ ឆ្នាំ២០២៣ នេះ មានបេក្ខជន មានសិទ្ធិចូលប្រឡងជាង ៣ពាន់នាក់ ហើយក្រសួងកសិកម្ម រុក្ខាប្រមាញ់ និងនេសាទ សម្រេចជ្រើសរើស យកចំនួន ២៥០នាក់ នៅឆ្នាំ២០២៣នេះ ហើយក្នុងឆ្នាំ២០២៤ ចំនួន ៨០០នាក់ និងឆ្នាំ២០២៥ ចំនួន ៥៥០នាក់ទៀត។
លោក ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានលើកឡើងថា បេក្ខជន បេក្ខនារី ចំនួន ២៥០នាក់ ដែលមានសមត្ថភាពពេញលក្ខណៈ និងប្រឡងជាប់ ក្នុងឆ្នាំ២០២៣នេះ នឹងត្រូវបំពេញតួនាទី នៅតាមឃុំនានា នៅក្នុងបណ្តាខេត្តមួយចំនួន ដើម្បីបង្ហាត់បង្ហាញប្រជាពលរដ្ឋ ពីកសិកម្មស្រូវ។
( សំឡេង )
ចំណែកលោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានបញ្ជាក់ថា ការប្រឡងប្រជែងជ្រើសរើសមន្រ្តីកសិកម្មឃុំ ឆ្នាំ២០២៣ ដែលនឹងធ្វើឡើង នៅថ្ងៃទី១៧ ខែធ្នូ ឆ្នាំ២០២៣ ខាងមុខនេះ នឹងផ្តល់ឱកាសដល់បេក្ខជន បេក្ខនារី ដែលមានសមត្ថភាពច្បាស់លាស់ មានសិទ្ធិស្មើគ្នាក្នុងការចុះឈ្មោះចូលប្រឡង ហើយការប្រឡងប្រជែងទៀតសោត នឹងត្រូវធ្វើឡើង ដោយធានានូវតម្លាភាព និងប្រសិទ្ធភាពខ្ពស់។
( សំឡេង )
រាជរដ្ឋាភិបាលកម្ពុជា តាំងពីជំនាន់លោក ហ៊ុន សែន បានប្រកាសចេញនូវគោលនយោបាយថ្មី តាមការរៀបចំរបស់លោកបណ្ឌិតកសិកម្ម យ៉ង់ សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអតីតប្រធានអង្គការកសិកម្ម សេដាក ដើម្បីរៀបចំគ្រូបង្គោល ខាងជំនាញកសិកម្ម យ៉ាងហោចណាស់ ម្នាក់ នៅក្នុង ១ឃុំ ដើម្បីជួយដល់កសិករ ក្នុងការងារកសិកម្ម ពិសេសលើដំណាំស្រូវ៕
