សេចក្តីប្រកាសរបស់ក្រសួងអប់រំ បង្ហាញថា នៅឆ្នាំ២០២៣ នេះ មានបេក្ខជនប្រឡងជាប់សរុប ចំនួន ៩៨៤៦០នាក់ ត្រូវជា ៧២.៨៩ភាគរយនៃចំនួនបេក្ខជនមកប្រឡង។ ក្នុងនោះ បេក្ខជន ជាប់និទ្ទេស A ចំនួន ១៦៧៣នាក់។ និទ្ទេស B ចំនួន ៦៩៦៤នាក់។ និទ្ទេស C ចំនួន ១៨៣០៨នាក់។ និទ្ទេស D ចំនួន ៣៤២៤៦នាក់ និងនិទ្ទេស E ចំនួន ៣៧ ២៦៩នាក់។
( សំឡេង )
ភ្លាមៗ ក្រោយប្រកាសលទ្ធផលនេះ លោកនាយករដ្ឋមន្ត្រី ហ៊ុន ម៉ាណែត បានផ្ញើសារ ចូលរួមអបអរសាទរសិស្សប្រឡងជាប់បាក់ឌុប និងលើកទឹកចិត្ត ឲ្យខិតខំបន្តទៀត សម្រាប់សិស្សប្រឡងធ្លាក់ សូមកុំបាក់ទឹកចិត្ត ហើយត្រូវខិតខំប្រឹងប្រែងរៀនសូត្របន្ថែមទៀត ដើម្បីប្រែក្លាយលទ្ធផលឱ្យបានគាប់ប្រសើរក្នុងការប្រឡងឆ្នាំក្រោយ ឬអាចចាប់យកឱកាសក្នុងការសិក្សាជំនាញវិជ្ជាជីវៈ ឬកម្រិតនៃការសិក្សាបន្ទាប់ ដើម្បីបន្តអភិវឌ្ឍចំណេះដឹង និងជំនាញ សម្រាប់ចាប់យកអាជីពច្បាស់លាស់ ដើម្បីកសាងអនាគតដ៏ភ្លឺស្វាង។
សូមបញ្ជាក់ថា លទ្ធផលប្រឡងបាក់ឌុប ដែលប្រកាស នៅរសៀលថ្ងៃទី២៣វិច្ឆិកា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល ខណៈខេត្តផ្សេងទៀត នឹងត្រូវប្រកាស នៅព្រឹកថ្ងៃទី២៤វិច្ឆិកា។
ការប្រឡងបាក់ឌុប ចាប់តាំងពីឆ្នាំ២០១៤ រហូតដល់ពេលនេះ ក្រសួងអប់រំ យុវជន និងកីឡា ក្រោមការដឹកនាំរបស់លោក ហង់ជួន ណារ៉ុន គឺបានកែទម្រង់ការប្រឡងបាក់ឌុប ដោយរឹតបន្តឹង មិនឱ្យមានការបើកចម្លងអ្វីទេ។ ពោលគឺ អ្នកចេះ ទើបប្រឡងជាប់ ហើយជាប់ដោយសមត្ថភាពពិតៗ៕
