ចំណែកតំណាងភាគីនិយោជក ជាថៅកែរោងចក្រកាត់ដេរ នៅរក្សាតួលេខ ព្រមឡើង ២ដុល្លារអាម៉េរិកដដែល លើតួលេខបច្ចុប្បន្ន ២០៤ដុល្លារអាម៉េរិក។
យ៉ាងណាក៏ដោយ កិច្ចប្រជុំចរចាដំឡើងប្រាក់ខែកម្មករកាត់ដេរ សម្រាប់ឆ្នាំ២០២៥ ភាគីទាំងបី នឹងបន្តពិភាក្សាដោះស្រាយ នៅថ្ងៃទី១៩ ខែកញ្ញា ឆ្នាំ២០២៤ មុននឹងដល់កិច្ចប្រជុំចរចាលើកចុងក្រោយ ដែលត្រូវប្រកាសលទ្ធផល នៅថ្ងៃទី២៦ ខែកញ្ញា ឆ្នាំ២០២៤ គឺនៅមុនពិធីបុណ្យភ្ជុំបិណ្ឌ។
បន្ទាប់ពីកិច្ចប្រជុំចរចា លើកទី៤ កាលពីថ្ងៃទី១២ ខែកញ្ញា លោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា ដែលបានដឹកនាំកិច្ចប្រជុំចរចាដំឡើងប្រាក់ខែកម្មករកាត់ដេរ បានបញ្ជាក់យ៉ាងដូច្នេះថា៖
( សំឡេង )
សូមរម្លឹកថា ការខ្វែងគំនិតគ្នារវាងសហជីពតំណាងកម្មករកាត់ដេរ នៅក្នុងភាគីសហជីព ដែលចូលរួមការចរចាឡើងប្រាក់ខែកម្មករកាត់ដេរ គឺបានកើតឡើងរៀងរាល់ឆ្នាំ។ ពោលគឺភាគីសហជីពកម្មករកាត់ដេរ នៅកម្ពុជា ក៏មាន ៣បក្ខពួកដែរ គឺសហជីពកម្មករ ដែលមានទំនោរគាំទ្រភាគីថៅកែរោងចក្រកាត់ដេរ សហជីពកម្មករ ដែលមានទំនោរគាំទ្រភាគីរដ្ឋាភិបាល និងភាគីសហជីព ដែលមានទំនោរទៅខាងកម្មករកាត់ដេរ។
យ៉ាងណាក៏ដោយ ការចរចាឡើងប្រាក់ខែ ដែលបានធ្វើ ១ឆ្នាំម្តង ចាប់តាំងពីឆ្នាំ២០១៤ គឺចុងក្រោយ នឹងត្រូវបោះឆ្នោតសម្រេច ដោយមតិភាគច្រើនដាច់ខាត។ ក្នុងនោះ គ្រាន់តែគិតពីសមាសភាពមកពីភាគីនិយោជក និងភាគីរាជរដ្ឋាភិបាល ក៏មានចំនួនច្រើនលើសលប់ លើសមាសភាពភាគីសហជីពកម្មករទៅហើយ។ នេះមិនទាន់គិតដល់សហជីពកម្មករ ស្ទើរតែទាំងអស់ ដែលបានគាំទ្រភាគីរាជរដ្ឋាភិបាល និងភាគីនិយោជក ជាថៅកែរោងចក្រកាត់ដេរ នៅឡើយទេ។
ប៉ុន្តែរៀងរាល់ឆ្នាំ ប្រាក់ខែកម្មករកាត់ដេរ នៅកម្ពុជា ក៏តែងតែបានឡើងជានិច្ច គ្រាន់តែឡើងតិច ឬឡើងច្រើនប៉ុណ្ណោះ៕
