លោកនាយករដ្ឋមន្ត្រី ក៏បានប្រកាសបញ្ជាក់ប្រាប់បងប្អូនប្រជាពលរដ្ឋថា រាជរដ្ឋាភិបាល ក្នុងអាណត្តិថ្មីនេះ មិនមានពន្ធថ្មី ដាក់ឲ្យប្រជាពលរដ្ឋទេ មិនមានការបង្កើតពន្ធថ្មីនោះទេ ហើយអ្នកខ្លះ លើកយកពន្ធ ដែលគេមានតាំងពីឆ្នាំ១៩៨២ យកមកថា ជាពន្ធថ្មី មកបំភ័យប្រជាពលរដ្ឋ។
លោកបានបន្ដថា ទន្ទឹមនឹងការមិនបង្កើតពន្ធថ្មី រាជរដ្ឋាភិបាល នៅតែបន្តមិនយកពន្ធលើដីស្រែកសិកម្មលក្ខណៈគ្រួសារ សម្ភារៈកសិកម្ម កសិផលកសិកម្ម អចលនទ្រព្យតម្លៃថោកជាង ២៥,០០០ដុល្លារ។ ចំពោះ ពន្ធការផ្ទេរទ្រព្យពីឪពុកម្ដាយទៅកូន, ពន្ធផ្លូវចំពោះម៉ូតូ ក៏បន្តមិនយកពន្ធដែរ។ សម្ដេច បញ្ជាក់ទៀតថា «ទីពីរ ពន្ធ ដែលមានស្រាប់ គឺមិនដំឡើងអត្រាពន្ធទេ» ។
លើសពីនេះ លោកនាយករដ្ឋមន្ដ្រី ក៏បានណែនាំដល់អាជ្ញាធរគ្រប់លំដាប់ថ្នាក់ ត្រូវលុបបំបាត់ ការយកភាស៊ី ការលក់ដូររបស់ប្រជាពលរដ្ឋ តាមកញ្ច្រែង កញ្ជើ ល្អី គឺមិនត្រូវយកពន្ធទេ។
លោកនាយករដ្ឋមន្ត្រី ហ៊ុន ម៉ាណែត ក៏បានបន្តថា អាជ្ញាធរគ្រប់ជាន់ថ្នាក់ ត្រូវមើលលើករណីនេះ មិនត្រូវយកពន្ធលើប្រជាពលរដ្ឋឡើយ។
អត្ថាធិប្បាយរបស់លោកនាយករដ្ឋមន្ត្រី ហ៊ុន ម៉ាណែត ខាងលើនេះ បន្ទាប់ពីមានការរជើបរំជួល នៅពេលមានការលើកឡើងរបស់អគ្គនាយកដ្ឋានពន្ធដារ ពាក់ព័ន្ធនឹងការយកពន្ធ ២០% លើប្រាក់ចំណេញលក់ដី លក់ផ្ទះ។ ប៉ុន្តែខាងពន្ធដារ បានធ្វើការបំភ្លឺរួចហើយ ករណីនេះ ថាជាពន្ធចាស់ ដែលរាជរដ្ឋាភិបាលបានបង្កើតឡើង តាំងពីឆ្នាំ២០២០។
យ៉ាងណាក៏ដោយ លោកនាយករដ្ឋមន្ត្រី ហ៊ុន ម៉ាណែត បានបញ្ជាក់ថា ពន្ធលើប្រាក់ចំណេញលក់ដី លក់ផ្ទះ ២០% នេះ រាជរដ្ឋាភិបាល មិនទាន់កំណត់ពេល ដែលត្រូវអនុវត្តនៅពេលណានៅឡើយទេ។
ជាមួយគ្នានេះ លោក ហ៊ុន ម៉ាណែត ក៏បានឆ្លើយតបទៅអ្នកវិភាគ ដែលបានប្រៀបប្រដូចលោក ទៅនឹងនាយករដ្ឋមន្ត្រីថៃ អំឡុងពេលបំពេញបេសកកម្ម នៅអាមេរិក។
លោក ហ៊ុន ម៉ាណែត បានបញ្ជាក់ថា ដ្បិតតែលោក មិនបានជួបមហាសេដ្ឋីអាមេរិក អ៊ីឡុនម៉ាស់ (E lon Musk) ដូចនាយករដ្ឋមន្ត្រីថៃ ប៉ុន្តែលោកបានជួបធុរកិច្ចរបស់អាមេរិក ចំនួន ៥៨ក្រុមហ៊ុន ហើយលោកថា នាពេលខាងមុខ នឹងមានក្រុមហ៊ុនអាមេរិកជាច្រើន មកសិក្សាពីការវិនិយោគនៅកម្ពុជា។ លោកបានចាត់ទុកការប្រៀបធៀបនេះ ជារឿងមិនត្រឹមត្រូវ ដោយសារ លោកថា ប្រទេសនិមួយៗ មានគោលនយោបាយផ្សេងគ្នា៕
