ທ່ານຫມູນໃຊ້ຄືນໃຫມ່ບໍ? ເຖິງແມ່ນວ່າພວກເຮົາສ່ວນຫລາຍຈະຕອບວ່າ 'ແມ່ນ' ຕໍ່ຄໍາຖາມນີ້, ແຕ່ຄວາມເປັນຫ່ວງທີ່ສໍາຄັນແມ່ນວ່າ ພວກເຮົາກໍາລັງ ເຮັດຢ່າງຖືກຕ້ອງຫລືບໍ່.
ຈຸດສຳຄັນ:
- “ການໝູນໃຊ້ຕາມປາຖນາ -Wish-cycling” ແມ່ນປັດຈັຍສໍາຄັນໃນການກໍ່ໃຫ້ມີການປົນເປື້ອນ
- ໃຫ້ຄິດວ່າສິ່ງທີ່ສາມາດນຳໃຊ້ຄືນໄດ້ນັ້ນ ເປັນຊັບພະຍາກອນ
- ການນໍາມາໃຊ້ຄືນໃຫມ່ ແລະ ການໝູນໃຊ້ ເພື່ອອະນາຄົດທີ່ດີກວ່າ
Pip Kiernan, ປະທານ Clean Up Australia ກ່າວວ່າ, ເຖິງແມ່ນວ່າຊາວອອສເຕຣລຽນສ່ວນໃຫຍ່ ຈະຮັບຮູ້ເຖິງຄວາມສໍາຄັນ ຂອງການນຳມາໃຊ້ຄືນໃຫມ່, ແຕ່ຫຼາຍຄົນກໍຍັງ "ສັບສົນ" ວ່າສິ່ງໃດສາມາດ ແລະບໍ່ສາມາດນໍາມາໃຊ້ຄືນໃໝ່ໄດ້, ແລະຍັງມີສິ່ງທີ່ຈະຕ້ອງປັບປຸງ.
89% ຂອງພວກເຮົາຄິດວ່າມັນເປັນສິ່ງສໍາຄັນ, ແຕ່ມີພຽງແຕ່ປະມານ ຫນຶ່ງໃນສາມຂອງພວກເຮົາເທົ່ານັ້ນ ທີ່ປະຕິບັດໄດ້ຖືກຕ້ອງ ເມື່ອເວົ້າເຖິງສິ່ງທີ່ພວກເຮົາໃສ່ໃນຖັງຫມູນໃຊ້ຄືນໃຫມ່ ຫຼື recycling bin.
ການເອົາສິ່ງຂອງທີ່ຜິດເຂົ້າໄປໃນຖັງຫມູນໃຊ້ຄືນ ຫຼືໃສ່ໃນຖົງ ມັນສາມາດ "ປົນເປື້ອນ" ສ່ວນທີ່ເຫຼືອຂອງສິ່ງທີ່ສາມາດນຳມາໃຊ້ໃໝ່ໄດ້ (Recyclables), ຊຶ່ງຈະເຮັດໃຫ້ຖັງທັງຫມົດຖືກສົ່ງໄປບ່ອນຝັງຂີ້ເຫຍື່ອແທນ.
ການສຶກສາຄົ້ນຄວ້າໄດ້ສະແດງໃຫ້ເຫັນວ່າຫຼາຍຄົນເອົາເຄື່ອງຂອງໃສ່ໃນ ຖັງຫມູນໃຊ້ຄືນໃຫມ່ ຫຼື Recycling Bin ເຖິງແມ່ນວ່າ ຈະບໍ່ແນ່ໃຈວ່າສິ່ງນັ້ນສາມາດນໍາມາໃຊ້ຄືນໄດ້ໃໝ່ຫຼືບໍ່. ນີ້ເອີ້ນວ່າ "wish-cycling " ແລະ ເປັນສາເຫດທີ່ສໍາຄັນອັນນຶ່ງ ໃນການປົນເປື້ອນ.
ສິ່ງຂອງຕ່າງໆເຊັ່ນ: ເຈັ້ຍເຊັດໜ້າ ຫຼື ແພຈຸລັງ, ຜ້າເຊັດໃນຄົວເຮືອນ, ຜ້າຕ່າງໆ, ແລະ ຜ້າອ້ອມ ສາມາດສ້າງຄວາມປົນເປື້ອນຕໍ່ຣົດບັນທຸກ ຂອງການຫມູນໃຊ້ຄືນໃຫມ່ ທັງຫມົດ ແລະສ້າງ ຄວາມເສັຍຫາຍໄດ້, ນາງ Kiernan ອະທິບາຍ.
Your recyclables should not be bagged when placing them into the kerbside recycling bin. Source: Getty Images/RUBEN BONILLA GONZALO
ອຸປກອນເອເລັກໂຕຼນິກ ຍັງເປັນບັນຫາຢູ່ ເມື່ອຖືກໃສ່ໃນຖັງຫມູນໃຊ້ຄືນໃຫມ່ ຫຼື recycling bin, ແລະພວກມັນຄວນຈະຖືກໃສ່ໃນສະຖານີການຫມູນໃຊ້ໃຫມ່ພິເສດ.
ກົດລະບຽບກ່ຽວກັບການຫມູນໃຊ້ຄືນໃຫມ່ບໍ່ພຽງແຕ່ແຕກຕ່າງກັນລະຫວ່າງພາກຣັຖແລະເຂດແດນ, ແຕ່ວ່າໃນລະຫວ່າງເຂດເທສບານກໍເຊັ່ນກັນ. ດັ່ງນັ້ນ, ການໃຫ້ຄວາມຮູ້ ແກ່ຊາວອອສເຕຣລຽນໃນທົ່ວປະເທດ ຈຶ່ງເປັນສິ່ງທີ່ທ້າທາຍ.
Recyclables ຫຼື ສິງທີ່ສາມາດຫມູນໃຊ້ຄືນໃຫມ່ເປັນຊັບພະຍາກອນທີ່ມີຄ່າ.
ມັນເປັນສິ່ງສໍາຄັນທີ່ຈະກວດສອບກັບ ເທສບານທ້ອງຖິ່ນຂອງທ່ານ ກ່ຽວກັບສິ່ງທີ່ສາມາດນໍາມາໃຊ້ຄືນໃຫມ່ໃນພື້ນທີ່ຂອງທ່ານ. ເຄື່ອງມືອອນໄລນ໌ຟຣີ ເຊັ່ນ , ຍັງໃຫ້ຄໍາແນະນໍາ ທີ່ຊັດເຈນກ່ຽວກັບການໃຊ້ຖັງຂີ້ເຫຍື່ອ ສະເພາະໃນພື້ນທີ່ທ້ອງຖິ່ນຂອງທ່ານ.
ແຕ່ກົດທົ່ວໄປທີ່ພວກເຮົາທຸກຄົນຄວນປະຕິບັດຕາມ ຄືເອົາ " Recyclables ຫຼື ສິງທີ່ສາມາດຫມູນໃຊ້ຄືນໃຫມ່ ທີ່ສະອາດແລະແຫ້ງ" ເຂົ້າໄປໃນຖັງຫມູນໃຊ້ຄືນໃຫມ່ແຄມທາງ (kerbside recycling bin), ແລະບໍ່ຄວນເອົາໃສ່ຖົງ.
ໃຫ້ຄຶດວ່າສິ່ງເຫຼົ່ານີ້ແມ່ນຊັບພະຍາກອນ ນາງ Kiernan ກ່າວ.
ຕອນໃສ່ລົງໃນຖັງ, ສິ່ງຂອງເຫຼົ່ານີ້ຈໍາເປັນຕ້ອງ ສະອາດແລະແຫ້ງ, ເພື່ອຈະໃຫ້ໄດ້ຮັບຊີວິດໃຫມ່
ດັ່ງນັ້ນ, ຖ້າແມ່ນຂວດ ຄວນຈະເປັນຂວດເປົ່າ, ສະອາດ, ແລະແຍກອອກຈາກຝາອັດໂລຫະຂອງມັນ, ສ່ວນກ່ອງ ພິສຊາ (Pizza boxes) ຄວນຖິ້ມໃສ່ໃນຖັງຂີ້ເຫຍື້ອທົ່ວໄປ.
ທ່ານ ນາງ Kiernan ກ່າວວ່າການປະຕິບັດຕາມກົດງ່າຍໆກ່ຽວກັບ “ສິ່ງທີ່ຄວນເຮັດ ແລະ ບໍ່ຄວນເຮັດ” ໃນການນໍາໃຊ້ຄືນໃຫມ່ສາມາດຊ່ວຍໄດ້ແທ້ໆ.
ປ້າຍຫມູນໃຊ້ຄືນໃຫມ່ ອອສເຕຣເລຊຽນ ຫຼື Australasian Recycling Label (ARL)
ປ້າຍຫມູນໃຊ້ຄືນໃຫມ່ ອອສເຕຣເລຊຽນ ໃນຫໍ່ຕ່າງໆ ສ່ວນໃຫຍ່ໃຫ້ຄຳແນະນໍາທີ່ດີແກ່ຜູ້ບໍລິໂພກ ກ່ຽວກັບສິ່ງທີ່ສາມາດ ແລະບໍ່ສາມາດນໍາມາ ໃຊ້ຄືນໃໝ່ໄດ້. ນີ້ອາດກ່ຽວຂ້ອງກັບການ ແຍກສ່ວນປະກອບຕ່າງໆ ເຊັ່ນ: ຝາອັດ, ແລະສິ່ງຫໍ່ພລາສຕິກ. ຂອງເຫຼົ່ານີ້ບາງສ່ວນ ເປັນຂີ້ເຫຍື້ອທົ່ວໄປ, ສ່ວນບາງສ່ວນກໍຖືກນໍາມາໃຊ້ຄືນໃຫມ່ໄດ້.
ຖ້າຫາກບໍ່ເຫັນ ARL ຢູ່ໃນຫໍ່, ແລະທ່ານບໍ່ແນ່ໃຈວ່າ ສິ່ງໃດຈະສາມາດຖືກນໍາມາໃຊ້ຄືນໃຫມ່ໄດ້ຫຼືບໍ່, ທ່ານຈະໃສ່ໄວ້ໃນຖັງຂີ້ເຫຍື້ອທົ່ວໄປ, ແທນທີ່ຈະ “ໝູນໃຊ້ຕາມປາຖນາ (wish-cycling)”, ແລະອາດຈະເຮັດໃຫ້ສ່ວນທີ່ເຫຼືອນັ້ນ ປົນເປື້ອນ.
Australian Recycling Label (ARL) Source: Clean Up Australia
ເອົາ Recyclables ຫຼື ສິງທີ່ສາມາດຫມູນໃຊ້ຄືນໃຫມ່ໄປຖິ້ມໄວ້ໃນສະຖານທີ່ ທີ່ກໍານົດໄວ້.
ເຖິງແມ່ນວ່າພລາສຕິກອ່ອນຈະບໍ່ສາມາດຖືກນໍາມາໃຊ້ຄືນໃຫມ່ໂດຍການໃສ່ ໃນຖັງເທສບານຂອງທ່ານ, ແຕ່ເຖິງຢ່າງໃດກໍຕາມ ມັນກໍສາມາດນໍາມາໃຊ້ຄືນໃຫມ່ໄດ້. ແຕ່ທ່ານຕ້ອງນໍາເອົາສິ່ງນັ້ນໄປທີ່ຈຸດຕ່າງໆທີ່ຖືກກຳໜົດໄວ້ ໃນທົ່ວປະເທດ.
ໄດ້ໃຫ້ວິທີການເກັບກູ້ແລະນໍາໃຊ້ພລາສຕິກອ່ອນຄືນໃຫມ່, ແລະຈຸດຮອງຮັບຫຼາຍກວ່າ 1,900 ແຫ່ງໃນທົ່ວປະເທດ, ລວມທັງຮ້ານຄ້າໃຫຍ່ທັງຫມົດ.
Rebecca Gleghorn ຜູ້ຈັດການດ້ານການຕລາດ ແລະ ການສື່ສານ ຂອງ RED Group ກ່າວວ່າ ພລາສຕິກອ່ອນ ຈຳນວນມະຫາສານໄດ້ຖືກແຍກອອກຈາກບ່ອນຝັງຂີ້ເຫຍື້ອຈົນເຖິງປັດຈຸບັນ.
ພລາສຕິກອ່ອນສີ່ລ້ານແຜ່ນຖືກສົ່ງກັບຄືນສູ່ຖັງ REDcycle ໃນແຕ່ລະມື້.
ນາງ Gleghorn ກ່າວ ວ່າ "ຄ່າສເລັ່ຍຂອງພວກເຮົາແມ່ນສີ່ກຣາມ, ສະນັ້ນ ພລາສຕິກອ່ອນ 16,000 ກິໂລ ທີ່ໄດ້ແຍກຈາກຂີ້ເຫຍື່ອທົ່ວໄປ ແລະ ບໍ່ຖືກຝັງດິນທຸກໆມື້ ທົ່ວປະເທດ."
ຈາກຖົງອາຫານສົດຈົນເຖິງຖົງເຂົ້າຈີ່, ຖົງ zip lock, ແລະ ຮວມເຖິງຫໍ່ຟອງ (Bubble wraps), ທ່ານຈະແປກໃຈທີ່ເຫັນວ່າພລາສຕິກອ່ອນ ຫຼາຍປານໃດ ທີ່ທ່ານສາມາດ ນໍາມາໃຊ້ຄືນໄດ້ແທ້ໆ.
ເຖິງຢ່າງໃດກໍ່ຕາມ ມັນຍັງມີຂໍ້ຍົກເວັ້ນ ແລະ ການຫມູນໃຊ້ຄືນໃດໆໃນອອສເຕຣເລັຍ ກໍເຊັ່ນດຽວກັນ, ພວກເຮົາຄວນຈະກວດສອບ ARL ສເມີ. ໃຫ້ຄໍາແນະນໍາສໍາລັບສິ່ງ ທີ່ສາມາດນໍາມາໃຊ້ຄືນໂດຍ ຜ່ານໂຄງການ ຂອງພວກເຂົາ.
ສິ່ງສໍາຄັນທີ່ພວກເຮົາບໍ່ສາມາດຮັບໄດ້ແມ່ນສິ່ງໃດທີ່ເປັນເງິນເຕັມ, ມັນມີເນື້ອຫາອາລູມິນຽມສູງເກີນໄປ. ພວກເຮົາຍັງບໍ່ສາມາດ ໃຊ້ພລາສຕິກອ່ອນທີ່ເປື່ອຍໄດ້ (Compostable) ແລະເປື່ອຍໄດ້ທາງຊີວະພາບ (Biodegradable).
ພລາສຕິກອ່ອນທີ່ ເປື່ອຍໄດ້ (Compostable) ແລະ ເປື່ອຍໄດ້ທາງຊີວະພາບ (Biodegradable) ໄດ້ຖືກອອກແບບມາ ເພື່ອການເປື່ອຍສລາຍ, ດັ່ງນັ້ນເມື່ອພລາສຕິກປະເພດນີ້ຖືກນໍາໃຊ້ເພື່ອຜລິດຜລິດຕະພັນໃຫມ່, ພວກມັນກໍຈະແຕກເປື່ອຍໄດ້ງ່າຍຂຶ້ນເຊັ່ນກັນ.
ເທສບານ ອາດກຳໜົດວັນທີ່ຈະເກັບຂີ້ເຫຍື່ອອື່ນໆໃນຄົວເຮືອນ ທີ່ບໍ່ສາມາດນໍາມາໃຊ້ຄືນໄດ້ເຊັ່ນ: ສິ່ງເສດເຫຼືອທາງອີເລັກໂຕຣນິກ, ເຄື່ອງໄຟຟ້າຕ່າງໆ ແລະ x-rays. ພວກເຂົາເຈົ້າຍັງອາດເກັບ ສານເຄມີ ແລະແບັດເຕີຣີ ທີ່ເປັນອັນຕະຣາຍເພື່ອການກໍາຈັດທີ່ປອດພັຍ.
ການນໍາໃຊ້ຄືນໃຫມ່ ແລະ ການໝູນວຽນໃຊ້ (Reuse and Repurpose) ສໍາລັບອະນາຄົດທີ່ດີກວ່າ.
ໃນຂນະທີ່ການປ່ຽນສິ່ງເສດເຫຼືອໃຫ້ກາຍເປັນສິ່ງໃຫມ່, ມີຜົນກະທົບໃນທາງບວກຕໍ່ສິ່ງແວດລ້ອມ, ມັນບໍ່ໄດ້ປ່ຽນຈາກຄວາມຈິງທີ່ວ່າພວກເຮົາຍັງຜລິດແລະບໍລິໂພກຜລິດຕະພັນຈໍານວນມະຫາສານ.
ປັດຈຸບັນມີແນວໂນ້ມທີ່ເພີ່ມຂຶ້ນໃນທົ່ວໂລກ, ລວມທັງອອສເຕຣເລັຍ, ບ່ອນທີ່ຜູ້ຄົນແບ່ງປັນແລະຮັບສິ່ງຂອງໂດຍບໍ່ເສັຍຄ່າ, ເພື່ອນໍາມາໃຊ້ຄືນໃຫມ່ແລະໝູນວຽນໃຊ້.
ຫຼື Buy Nothing Project ໄດ້ເລີ່ມຕົ້ນໃນສຫະຣັຖ ໃນປີ 2013 ແລະ ໄດ້ແຜ່ລາມໄປທົ່ວໂລກນັບແຕ່ນັ້ນມາ.
Liv McGuiness ຜູ້ບໍຣິຫານ ກຸ່ມ Buy Nothing Project ທີ່ກວ້າງຂວາງໃນເຂດ Hills ຂອງ Sydney ກ່າວວ່າ ຜູ້ຄົນ ກໍາລັງເລີ້ມຕັ້ງຄຳຖາມ ວ່າ ຊັບພະຍາກອນ ຂອງພວກເຂົາ ມາຈາກໃສ ແລະ ໄປໃສ.
ພວກເຮົາໄດ້ຢຸດຄິດກ່ຽວກັບຖັງຂີ້ເຫຍື່ອ ສີແດງ ເປັນລະບົບ “ມະຫັສຈັນ”, ບ່ອນທີ່ພວກເຮົາຖິ້ມຂອງຕ່າງໆໃສ່ ໂດຍບໍ່ມີຄວາມຮູ້ສຶກຜິດ, ໂດຍບໍ່ເສັຍຄ່າ ແລະຂີ້ເຫຍື່ອເຫຼົ່ານັ້ນກໍຫາຍໄປ.
ນາງເຊື່ອວ່າ, ຜູ້ຄົນບໍ່ຕ້ອງການທີ່ຈະປະກອບສ່ວນ ໃນການສ້າງຂີ້ເຫຍື່ອ ດັ່ງທີ່ເຂົາເຈົ້າໄດ້ເຄີຍເຮັດມາໃນອະດີດ.
7
ຈາກຂອງຫຼິ້ນທີ່ເດັກນ້ອຍບໍ່ໃຊ້ແລ້ວ, ຈົນເຖິງສິ່ງຂອງທີ່ຢູ່ໃນຕູ້ຂອງທ່ານ, ສິ່ງຂອງຕ່າງໆ ທີ່ໄດ້ຖືກແບ່ງປັນ ແລະ ໄດ້ຮັບຢູ່ໃນກຸ່ມທຸກໆມື້.
Reusing and repurposing, the way of the future Source: Getty Images/Su Arslanoglu
ນາງ McGuiness ກ່າວວ່າສິ່ງທີ່ມັກຖືວ່າບໍ່ມີ 'ຄຸນຄ່າທາງດ້ານເສຖກິດ' ແມ່ນຂອງທີ່ນິຍົມ ທີ່ຈະໃຫ້ເປັນຂອງຂວັນເຊັ່ນ: ກ່ອງບັນຈຸຂອງ ແລະ ກິ່ງຕົ້ນໄມ້ເພື່ອຈະນຳໄປປູກຕໍ່.
ການນໍາໃຊ້ຄືນໃຫມ່ ແລະ ການໝູນໃຊ້ສິ່ງຂອງ ບໍ່ພຽງແຕ່ມີຜົນກະທົບ ໃນທາງບວກ ໃນໄລຍະຍາວຕໍ່ສິ່ງແວດລ້ອມ, ມັນຍັງສ້າງຄວາມເຂັ້ມແຂງ ໃຫ້ແກ່ຊຸມຊົນອີກດ້ວຍ.
"ເມື່ອທ່ານໄດ້ຮັບປໂຍດຂອງຄວາມເມດຕາ ຂອງຄົນອື່ນໃນອິນເຕີເນັດທີ່ບໍ່ຮູ້ຈັກທ່ານ, ບໍ່ມີຄວາມສົນໃຈໃນຊີວິດຂອງທ່ານ, ບໍ່ຮູ້ຫຍັງກ່ຽວກັບສະພາບການຂອງທ່ານ, ແຕ່ເຕັມໃຈທີ່ຈະໃຫ້ບາງສິ່ງບາງຢ່າງແກ່ທ່ານ ໂດຍບໍ່ມີຂໍ້ຜູກມັດ, ຂ້າພະເຈົ້າຄິດ ວ່ານັ້ນເປັນສິ່ງທີ່ດີ."
ສໍາລັບຄົນທີ່ຍ້າຍເຂົ້າໄປໃນຊຸມຊົນ, ມັນຍັງເປັນວິທີທີ່ດີເລີດ ໃນການພົບປະ ກັບຜູ້ຄົນແລະການສ້າງເຄືອຂ່າຍ.
ຖ້າເຮົາທຸກຄົນໃຊ້ເວລາຈັກບຶດຫນຶ່ງ ແລະ ສັງເກດວ່າເຮົາກໍາລັງນໍາໃຊ້ຄືນໃຫມ່ ຫລື ກໍາຈັດສິ່ງເສດເຫຼືອ ຂອງເຮົາແນວໃດ, ກໍມີການປ່ຽນແປງຫລາຍຢ່າງທີ່ ເຮົາສາມາດເຮັດໄດ້ເພື່ອມີສ່ວນຮ່ວມຂອງເຮົາໃນໂລກໜ່ວຍນີ້ ແລະ ການປ່ຽນແປງນັ້ນສາມາດເລີ່ມຕົ້ນໄດ້ໃນມື້ນີ້.
