Anthony Albanese kiseb rebħa fl-elezzjoni federali tal-2025, hekk kif il-Laburisti huma lesti li jiggvernaw għat-tieni terminu b’maġġoranza akbar.
Albanese qal lill-partitarji f’Sydney li l-fatt li serva bħala Prim Ministru kien l-akbar unur ta’ ħajtu.
“Huwa b’sens profond ta’ umiltà u b’sens profond ta’ responsabbiltà li l-ewwel ħaġa li nagħmel illejla hija li ngħid ’grazzi’ lin-nies tal-Awstralja għaċ-ċans li nkompli naqdi l-aqwa nazzjon fid-dinja,” huwa qal.
"Illum, il-poplu Awstraljan ivvota għall-valuri Awstraljani: għall-ġustizzja, l-aspirazzjoni u l-opportunità għal kulħadd.
“L-Awstraljani vvutaw għal futur li jgħodd għal dawn il-valuri, futur mibni fuq dak kollu li jgħaqqadna flimkien.”
Gvern Laburista se jiggverna waħdu b’numri akbar fil-Parlament wara xaqlibiet favur il-gvern f’diversi Stati.
Fost ir-rebħiet Laburisti kien hemm is-siġġu tal-Kap tal-Oppożizzjoni Peter Dutton ta’ Dickson fi Queensland.
Dutton tilef is-siġġu tiegħu li rebħitu Ali France tal-Laburisti. Din kienet l-ewwel darba li kap tal-oppożizzjoni tilef postu f’elezzjoni federali.
Australian Liberal Party leader Peter Dutton, third left, stands with his family as he makes his concession speech following the general election in Brisbane. Source: AP / Pat Hoelscher/AP
“Ma ħdimniex tajjeb biżżejjed matul din il-kampanja. Din hija ħaġa ovvja li tidher il-lejla,” huwa qal.
"Dejjem xtaqt fil-ħajja pubblika għall-aħjar ta’ pajjiżna u l-aħjar għal kull persuna Awstraljana.
“Hija okkażjoni storika għall-Partit Laburista, u din nirrikonoxxuha.”
Fost il-policies imħabbra minn Anthony Albanese kien hemm li dawk li jixtru l-ewwel dar tagħhom jitħallew jidħlu fis-suq tal-propjetà bi ħlas ta’ depożitu ta’ 5 fil-mija,filwaqt li wegħdu li se jonfqu $10 biljun biex jibnu sa 100,000 dar ġdida.
Wiegħed ukoll $8.5 biljun għal 18-il miljun żjara oħra ta’ tobba tal-familja sussidjati kull sena bħala parti mit-tisħiħ tal-Medicare.
Il-kampanija Laburista ikkommettiet ukoll $2.3 biljun biex tissussidja l-batteriji tad-djar għall-ħażna tal-enerġija mix-xemx, filwaqt li wegħdet ukoll li trażżan il-qtugħ tal-prezzijiet mis-supermarkets.
