ਆਸਟ੍ਰੇਲੀਆ ਵਰਗੇ ਵਿਕਸਤ ਦੇਸ਼ ਵਿੱਚ ਪ੍ਰਵਾਸ ਕਰ ਕੇ ਆਉਣਾ ਆਪਣੇ ਆਪ ਵਿੱਚ ਇੱਕ ਬਹੁਤ ਹੀ ਨਿਵੇਕਲਾ ਤਜਰਬਾ ਹੁੰਦਾ ਹੈ। ਇਸ ਦੌਰਾਨ ਕਈ ਔਖੇ ਅਤੇ ਨਵੇਂ ਤਜਰਬੇ ਹੁੰਦੇ ਹਨ, ਜਿਨਾਂ ਵਿੱਚੋਂ ਦੀ ਲੰਘ ਕੇ ਇੱਕ ਨਵੀਂ ਜਿੰਦਗੀ ਦੀ ਸ਼ੁਰੂਆਤ ਕੀਤੀ ਜਾਂਦੀ ਹੈ। ਇਹਨਾਂ ਵਿੱਚੋਂ ਹੀ ਇੱਕ ਹੁੰਦਾ ਹੈ, ਨਵੇਂ ਘਰ ਲੈਣ ਵਾਸਤੇ ਕਰਜਾ ਲੈਣਾ।
ਹਰ ਦੇਸ਼, ਮੁਲਕ ਅਤੇ ਉਹਨਾਂ ਦੇ ਸੂਬਿਆਂ ਦੇ ਕਾਨੂੰਨ ਅਲੱਗ ਅਲੱਗ ਤਰਾਂ ਦੇ ਹੁੰਦੇ ਹਨ, ਅਤੇ ਉਹਨਾਂ ਨੂੰ ਸਮਝਣਾ ਕੋਈ ਅਸਾਨ ਕੰਮ ਨਹੀਂ ਹੁੰਦਾ। ਘਰ ਲੈਣ ਲਈ ਕਰਜਾ ਲੈਣਾ ਵੀ ਇੱਕ ਬਹੁਤ ਨਿਵੇਕਲਾ ਤਜਰਬਾ ਹੁੰਦਾ ਹੈ। ਐਸ ਬੀ ਐਸ ਦੀ ਮਦਦ ਨਾਲ ਐਮ ਪੀ ਸਿੰਘ ਨੇ ਅੱਜ ਦੀ ਸੈਟਲਮੈਂਟ ਗਾਈਡ ਵਿੱਚ ਇਹ ਜਾਨਣ ਦੀ ਕੋਸ਼ਿਸ਼ ਕੀਤੀ ਹੈ ਕਿ ਨਵੇਂ ਪ੍ਰਵਾਸ ਕਰ ਕੇ ਆਏ ਬਸ਼ਿੰਦਿਆਂ ਲਈ ਆਸਟ੍ਰੇਲੀਆ ਵਿੱਚ ਕਿਸ ਪ੍ਰਕਾਰ ਦੇ ਕਰਜੇ ਅਤੇ ਵਿੱਤੀ ਸਹਾਇਤਾਵਾਂ ਉਪਲਬਧ ਹਨ।
ਨਵੇਂ ਆਏ ਪ੍ਰਵਾਸੀਆਂ ਲਈ ਕਰਜਾ ਦੇਣ ਸਮੇਂ ਸਭ ਤੋਂ ਵੱਡੀ ਔਕੜ ਇਹ ਸਾਹਮਣੇ ਆਉਂਦੀ ਹੈ ਕਿ ਉਹਨਾਂ ਕੋਲ ਕੋਈ ਵੀ ਕਰੈਡਿਟ ਹਿਸਟਰੀ ਨਹੀਂ ਹੁੰਦੀ। ਕਈ ਕਰਜੇ ਦੇਣ ਵਾਲੇ ਇਸੇ ਕਰਕੇ ਹੀ ਕਰਜੇ ਆਦਿ ਦੇਣ ਸਮੇਂ ਆਨਾਂ ਕਾਨੀ ਕਰਦੇ ਹਨ। ਮੈਲਬਰਨ ਦੇ ਇੱਕ ਮੋਰਟਗੇਜ ਬਰੋਕਰ ਯਾਨਿ ਕਿ ਕਰਜੇ ਦਿਵਾਉਣ ਲਈ ਸਹਾਇਤਾ ਕਰਨ ਵਾਲੇ ਹਨ, ਮਾਰਟਿਨ ਮੂਰੇਥੀ, ਜੋ ਕਿ ਆਪ ਅਫਰੀਕਾ ਤੋਂ ਲਗਭੱਗ 15 ਸਾਲ ਪਹਿਲਾਂ ਆਸਟ੍ਰੇਲੀਆ ਇੱਕ ਪ੍ਰਵਾਸੀ ਵਜੋਂ ਆਏ ਸਨ।
ਕਿਸੇ ਕਰਜੇ ਨੂੰ ਦੇਣ ਤੋਂ ਪਹਿਲਾਂ, ਇਹ ਦੇਖਿਆ ਜਾਂਦਾ ਹੈ ਕਿ ਬਿਨੇਕਾਰ ਕੋਲ ਪਰਮਾਨੈਂਟ ਰੈਜ਼ੀਡੈਂਸੀ ਸਟੇਟਸ ਹੈ ਜਾਂ ਨਹੀਂ। ਅਤੇ ਨਾਲ ਹੀ ਇੱਕ ਠੋਸ ਕਮਾਈ ਦਾ ਸਾਧਨ ਵੀ ਜਾਂਚਿਆ ਜਾਂਦਾ ਹੈ। ਪਰ, ਮਾਰਟਿ ਮੂਰੇਥੀ ਅਨੁਸਾਰ ਇਹਨਾਂ ਦੋਵੇਂ ਜਰੂਰੀ ਨੁਕਤਿਆਂ ਤੋਂ ਛੋਟ ਵੀ ਹੋ ਸਕਦੀ ਹੈ।
ਅਤੇ, ਮਾਰਟਿਨ ਮੂਰੇਥੀ ਅਨੁਾਸਾਰ, ਉਹ ਲੋਕ, ਜੋ ਆਸਟ੍ਰੇਲੀਆ ਵਿੱਚ ਪਾਰਟਨਰ ਵੀਜ਼ੇ ਤੇ ਹਨ, ਉਹ ਵੀ ਕਰਜੇ ਲੈਣ ਵਿੱਚ ਕਾਮਯਾਬ ਹੋ ਸਕਦੇ ਹਨ।
ਕਰਜਿਆਂ ਤੋਂ ਅਲਾਵਾ ਹੋਰ ਵੀ ਕਈ ਪ੍ਰਕਾਰ ਦੀਆਂ ਵਿੱਤੀ ਸੇਵਾਵਾਂ ਦੀ ਪ੍ਰਾਪਤੀ ਵੀ ਪ੍ਰਵਾਸੀਆਂ ਲਈ ਅਹਿਮ ਹੁੰਦੀਆਂ ਹਨ। ਆਸਟ੍ਰੇਲੀਅਨ ਭਾਈਚਾਰੇ ਵਿੱਚ ਕਾਮਯਾਬੀ ਨਾਲ ਸਥਾਪਤ ਹੋਣ ਵਾਸਤੇ ਜਰੂਰੀ ਹੈ ਕਿ ਪ੍ਰਵਾਸੀਆਂ ਨੂੰ ਆਪਣੀ ਆਮਦਨ ਨੂੰ ਸਹੀ ਤਰੀਕੇ ਨਾਲ ਨਿਯੋਜਤ ਕਰਨਾਂ, ਸਟੇਟਮੈਂਟਾਂ ਆਦਿ ਨੂੰ ਸਮਝਣਾ, ਕਾਨਟਰੈਕਟਾਂ ਦੀਆਂ ਬਰੀਕੀਆਂ ਨੂੰ ਘੋਖਣਾ ਅਤੇ ਲੰਬੇ ਸਮੇਂ ਤੱਕ ਚਲਣ ਵਾਲੇ ਪਰਾਜੈਕਟਾਂ ਲਈ ਬਚਤ ਕਰਨੀ ਵੀ ਆਉਣੀ ਜਰੂਰੀ ਹੁੰਦੀ ਹੈ। ਅਜਿਹਾ ਮੰਨਣਾ ਹੈ ਟੇਰੈਸਾ ਕਲਾਰਕ ਦਾ ਜੋ ਕਿ ਐਂਗਲੀਕੇਅਰ () ਵਿੱਚ ਮੈਨੇਜਰ ਹਨ। ਐਂਗਲੀਕੇਅਰ ਕਈ ਹੋਰ ਸੇਵਾਵਾਂ ਦੇ ਨਾਲ ਨਾਲ ਵਿੱਤੀ ਸਲਾਹਾਂ ਵੀ ਮੁਫਤ ਹੀ ਪ੍ਰਦਾਨ ਕਰਦੀ ਹੈ।
ਬੇਸ਼ਕ ਏ ਐਮ ਈ ਐਸ ਕਈ ਪ੍ਰਕਾਰ ਦੇ ਛੋਟੇ ਕਰਜੇ ਪ੍ਰਦਾਨ ਕਰਦੀ ਹੈ ਪਰ ਨਾਲ ਹੀ ਇਹ ਸੰਸਥਾ ਕਦੀ ਵੀ ਨਵੇਂ ਆਏ ਪ੍ਰਵਾਸੀਆਂ ਨੂੰ ਪ੍ਰਵਾਸ ਕਰਨ ਤੋਂ ਤੁਰੰਤ ਬਾਅਦ ਹੀ ਕਰਜਿਆਂ ਹੇਠ ਆਉਣ ਦੀ ਸਲਾਹ ਵੀ ਨਹੀਂ ਦਿੰਦੀ, ਕਿਉਂਕਿ ਉਹਨਾਂ ਨੇ ਆਪਣੀ ਜਿੰਦਗੀ ਨੂੰ ਨਵੇਂ ਸਿਰਿਓਂ ਅਜੇ ਸਥਾਪਤ ਕਰਨਾ ਹੁੰਦਾ ਹੈ।
