2023 ජූලි 01 වනදායින් ඇරඹෙන ඔස්ට්‍රේලියාවේ නව මුල්‍ය වර්ෂයේදී ඔස්ට්‍රේලියානු වීසා සහ සංක්‍රමණ පද්ධතිය සඳහා වෙනස්කම් කිහිපයක් සිදුකිරීමට වත්මන් කම්කරු පක්ෂ රජය තීරණය කර තිබේ.
එම සංශෝධනවලින් කොටසක් පසුගිය අප්‍රේල් 27 වනදා ඔස්ට්‍රේලියානු මධ්‍යම රජයේ ස්වදේශ කටයුතු පිළිබඳ අමාත්‍ය Clare O'Neil විසින් හෙළිකළ අතර සෙසු වෙනස්කම් මැයි 09 වන දින ඉදිරිපත් කළ ඔස්ට්‍රේලියානු ෆෙඩරල් අය වැයෙන් ප්‍රකාශයට පත් කෙරිණි.
ඒ අනුව එම වෙනස්කම් පහත පරිදි වේ.
LISTEN TO
ඕස්ට්‍රේලියාවේ 2023 - 2024 මුල්‍ය වර්ෂය සඳහා ප්‍රකාශිත අය වැයෙන් ඔබට ලැබෙන 'සහන' සහ 'අහිමිවන දේ ' මෙන්න
SBS Sinhala
11:04
Skilled වීසා සඳහා ප්‍රමුඛත්වය ලබා දීම
2023–24 මුල්‍ය වර්ෂයේ ඔස්ට්‍රේලියාවේ ස්ථිර වීසා කෝටාව 190,000 දක්වා ඉහළ දැමීමට වත්මන් කම්කරු පක්ෂ රජය තීරණය කර ඇත.
එයින් 137,100 කෝටාවක් Skill වීසා ධාරාවට වෙන් කර තිබෙන අතර ඔස්ට්‍රේලියාවේ දැනට පවතින පුහුණු ශ්‍රමිකයින්ගේ හිඟය පියවීමට එයින් යම් පිටිවහලක් ලැබෙනු ඇතැයි මධ්‍යම රජය විශ්වාස කරයි.
කෙසේ වෙතත්, partner සහ child වීසා ඉල්ලුම මත රඳා පවතිනු ඇත.
———————————————————————————
ඩිජිටල් සහ සමාජ මාධ්‍ය ජාලයන්හි අපගේ SBS සිංහල සේවය හා සම්බන්ධ වීමට:
හෝ වෙතින් SBS Radio App නොමිලයේ Download කරගෙන සජීවීව SBS සිංහල වැඩසටහන සහ අපගේ අනෙකුත් podcast වලට සවන් දෙන්න.
———————————————————————————
මීට අමතරව පුහුණු ශ්‍රමිකයින් ඔස්ට්‍රේලියාවට වඩාත් ආකර්ෂණය කරගැනීම සඳහා සහ ඔවුන්ගේ ශ්‍රමය සූරා කෑමට ලක් නොවීමට වග බලා ගැනීම සඳහා Temporary Skilled Migration Income Threshold (TSMIT) $53,900 සිට $70,000 දක්වා 2023 ජූලි 01 වනදින සිට ඉහළ දැමීමට නියමිතය.
ඊට අමතරව දැනට ක්‍රියාත්මක සංක්‍රමණික ලකුණු ක්‍රමය හරහා සෑම විටම හොඳම අපේක්ෂකයින් තෝරා නොගන්නා බවත් එනිසාම වත්මන් සංක්‍රමණික ලකුණු ක්‍රමය වෙනස් කළ යුතු බවත් මධ්‍යම රජය පවසා තිබේ.
එමෙන්ම ඔස්ට්‍රේලියාවේ වත්මන් වීසා ක්‍රමය ඉතා මන්දගාමී සහ සංකීර්ණ එකක් බවත් එනිසාම ඒවා ඔස්ට්‍රේලියාවේ සංක්‍රමණ වැඩසටහනේ ගුණාත්මක භාවයට පැහැදිලිවම බලපා ඇති බවත් මධ්‍යම රජයේ ස්වදේශ කටයුතු අමාත්‍ය Clare O'Neil සඳහන් කළාය.
මේ හේතුවෙන් අනවශ්‍ය ලෙස සංඛ්‍යාත්මකව වැඩි වීසා, පද්ධතියෙන් ඉවත් කර ඔස්ට්‍රේලියාවේ වීසා පද්ධතිය කාර්යක්ෂම කර පුහුණු ශ්‍රමිකයින්ව වැඩ වඩාත් ආකර්ෂණය කරගැනීමට මධ්‍යම රජය කටයුතු කරන බව නිවේදනය කර ඇත.
LISTEN TO
ජූලි 01 සිට ඔස්ට්‍රේලියාවේ වීසා හා සංක්‍රමණ පද්ධතියේ සිදුවන වෙනස්කම් ගැන මෙතෙක් හෙළිවූ දේ විනාඩි 6 කින්
SBS Sinhala
06:21
ජාත්‍යන්තර සිසුන් සඳහා සිදුකළ වෙනස්කම්
2023 ජුලි 01 සිට, ජාත්‍යන්තර සිසුන් සඳහා රැකියා කිරීමේ පැය ගණනේ සීමාවන් නැවත හඳුන්වා දීමට ඔස්ට්‍රේලියානු මධ්‍යම රජය තීරණය කර තිබේ.
කොවිඩ් වසංගතය නිසා ඔස්ට්‍රේලියාවේ ඇතිවූ ශ්‍රම හිඟය පියවා ගැනීම පිණිස පසුගිය කාලයේ ශිෂ්‍ය වීසා ලාභීන්ට රැකියා කිරීම සඳහා පනවා තිබුණු පැය ගණනේ සීමාව ඉවත් කරනු ලැබීය.
ඒ හරහා ප්‍රාථමික සහ ද්විතීයික ශිෂ්‍ය වීසා බලපත්‍රලාභීන්ට සති දෙකකට පැය 40 ක සාමාන්‍ය සීමාවට වඩා රැකියා කිරීමට හැකි වුහ.
නමුත් 2023 ජූලි 01 සිට ජාත්‍යන්තර සිසුන්ට දෙසතියකට පැය 48 ක් පමණක් රැකියා කිරීමට අවසර ලැබේ.
කෙසේවෙතත්, aged care අංශයේ රැකියා කරන ජාත්‍යන්තර සිසුන්ට 2023 දෙසැම්බර් 31 දක්වා එම පැය 48 සීමාව බල නොපාන බවද මැයි 09 ඉදිරිපත් කළ මධ්‍යම රජයේ අය වැයෙන් ප්‍රකාශ කෙරිණි.
LISTEN TO
වංචනික ලේඛන ලබාදී ඕස්ට්‍රේලියාවෙන් ජාත්‍යන්තර ශිෂ්‍ය වීසා ඉල්ලුවොත්, ඔබ මුහුණ දිය හැකි ප්‍රතිවිපාක
SBS Sinhala
17:26
මේ අතර 2023 ජූලි 01 සිට 485 වීසා උප ඛාණ්ඩයේ තාවකාලික උපාධි වීසා බලපත්‍ර දරන්නන්ට ඔස්ට්‍රේලියාවේ වැඩි කාලයක් රැඳී සිටීමට ද හැකියාව ලැබේ.
ඒ අනුව සාමාන්‍ය උපාධිධාරීන් සඳහා වසර හතරක කාලයක්ද, ශාස්ත්‍රපති උපාධිධාරීන් සඳහා වසර පහක කාලයක්ද සහ ආචාර්ය උපාධිධාරීන් සඳහා වසර හයක කාලයක්ද ඔස්ට්‍රේලියාවේ රැඳී සිටීමට අවසර ලැබෙනු ඇත.
දක්‍ෂ උපාධිධාරීන්ට ස්ථිර පදිංචිය සඳහා වේගවත් මාර්ග ලබා දීමෙන් ජාත්‍යන්තර සිසුන්ගේ රැකියා සූදානම සහ ප්‍රතිඵල වැඩිදියුණු කිරීම ගැනද අය වැයේදී ප්‍රකාශ කෙරිණි.
LISTEN TO
ඔස්ට්‍රේලියාවේ PR ගන්න නම් ජූලි 1 සිට වාර්ෂික වැටුප වසරකට $70,000 තෙක් වැඩිවිය යුතු තාවකාලික වීසාලාභීන් මෙන්න
SBS Sinhala
03:25
තාවකාලික වීසාවල සිටින පුහුණු ශ්‍රමිකයන්ට ඔස්ට්‍රේලියාවේ ස්ථිර පදිංචිය සඳහා මාර්ගයක්
2023 වසර අවසන් වන විට, Employer Nomination Scheme (186 වීසා උප ඛාණ්ඩය) වීසා බලපත්‍රයේ Temporary Residence Transition (TRT) ප්‍රවාහය ක්‍රියාත්මක කිරීමට මධ්‍යම රජය පියවර ගෙන තිබේ.
මෙම ප්‍රවාහය සිය සේවා යෝජකයන් අනුග්‍රහය දැක්වීමට කැමති සියලුම Temporary Skill Shortage (TSS) වීසා දරන්නන් හෙවත් 482 වීසා ලාභීන් සඳහා වේ.
අදාළ අයදුම්කරුවන්ට ඔවුන්ගේ TSS වීසා සඳහා නම් කරන ලද රැකියාවේ දිගටම වැඩ කිරීමට අවශ්‍ය වනු ඇත.
දැනට, සංක්‍රමණිකයන් 173,000 ක් තාවකාලික රැකියා හෝ ශිෂ්‍ය වීසා මත වසර පහක් හෝ ඊට වැඩි කාලයක් ඔස්ට්‍රේලියාවේ සිටින බව වාර්තා වේ.
LISTEN TO
වැරදි වැටහීම් එපා, ඔස්ට්‍රේලියාවේ PR එකට මග පාදන 491 වීසාවලට ලැබෙන නිවැරදි ප්‍රතිලාභ මෙන්න
SBS Sinhala
12:42
වීසා ගාස්තු වැඩි කිරීම
2023 ජූලි 01 සිට ඔස්ට්‍රේලියාවේ බහුතරයක් වීසා අයදුම්පත්වල ගාස්තු 6% කින් ඉහළ දමන බව මැයි 09 වනදින මධ්‍යම රජයේ අය වැයෙන් ප්‍රකාශයට පත් කෙරිණි.
ඒ අනුව මේ වන විට $150 පවතින සංචාරක වීසා ගාස්තු $190 දක්වා $40 කින් ඉහළ දැමේ.
ජාත්‍යන්තර ශිෂ්‍ය වීසා අයදුම්පත්වල ගාස්තු $650 සිට $715 දක්වා $65 කින් වැඩි කෙරේ.
මේ වන විට $510 පවතින working holiday වීසා ගාස්තු $640 දක්වා $130 කින් ඉහළ දමනු ඇත.
අයවැයට අනුව Pacific Engagement වීසාවල සහ Pacific Australia Labour Mobility යෝජනා ක්‍රමයේ වීසාවල පමණක් වීසා ගාස්තු වැඩි නොකෙරේ.
මෙම වෙනස්කම් මගින් සෑම වසරකම ඩොලර් මිලියන 100 කට වඩා වැඩි මුදලක් එකතු වන අතර එමඟින් වීසා සැකසීමේ ක්‍රමය වැඩිදියුණු කිරීමට අරමුදල් ලැබෙනු ඇති බව මධ්‍යම රජය පවසයි.
Source: SBS
පවතින වීසා සැකසීමේ පද්ධතිය වැඩිදියුණු කිරීම
ඔස්ට්‍රේලියාවේ දැනට පවතින වීසා සැකසීමේ පද්ධතිය වැඩිදියුණු කිරීම සඳහා 2023-24 සිට වසර දෙක පුරාවට ඩොලර් මිලියන 75.8ක් වැය කරන බව අය වැයේදී මධ්‍යම රජය නිවේදනය කළේය.
එහිදී වීසා සැකසුම් නිලධාරීන් 500 දෙනෙකුට සහාය වීම සඳහා මධ්‍යම රජය මාස 12ක් තුළ ඩොලර් මිලියන 48.1ක් ලබා දෙනු ඇත.
