དེ་རིང་ཨོ་གླིང་ས་གནས་མདོ་ཁམས་ཆུ་བཞི་སྒང་དྲུག་གིས་ཚོགས་པ་སྐོར་ལ་དོན་ཚན་དགུ་ཅན་གྱི་གསལ་བསྒྲགས་ཤིག་སྤེལ་འདུག་པའི་ནང་།
༼༡༽ སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བླ་ན་མེད་པའི་དབུ་ཁྲིད་འོག་བཙན་བྱོལ་བོད་མིའི་བཅའ་ཁྲིམས་དང་། སྒྲིག་གཞི་ཅི་རིགས་ལ་བརྩི་བཀུར་དང་ལེན་གྱིས་རང་གཞུང་གི་མཛད་འཕྲིན་རྒྱས་ཐབས་སུ་ཕྱར་གྲུ་མཉམ་འདེགས་ཞུ་རྒྱུ།
༼༢༽ལུང་ཚན་དང་། ཆོས་ལུགས། གྲལ་རིམ་སོགས་ཀྱི་དབར་འཐེན་འཁྱེར་གྱི་བསམ་བློ་སྤངས་ཏེ་བོད་མི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དང་མཛའ་མཐུན་དམ་གཙང་ཡོང་ཐབས་ལ་འབད་བརྩོན་བྱ་རྒྱུ།
༼༣༽ ཐུན་མོང་མ་ཡིན་པའི་བོད་ཀྱི་ཆོས་དང་། རིག་གཞུང་རྒྱ་ཆེ་གཏིང་ཟབ་ཡོད་པ་དེ་རྣམས་མི་ཉམས་གོང་འཕེལ་དང་། ཉམས་པ་སླར་གསོ་ཁྱབ་སྤེལ་རྒྱུནའཛིན་ཐུབ་ཐབས་བྱ་རྒྱུ།
༼༤༽ གཞིས་བྱེད་བོད་མི་ཡོངས་ཀྱི་འདོད་དོན་བོད་དོན་བདེན་མཐའ་གསལ་ཐབས་སུ་ཞི་དྲག་གཉིས་ཀྱི་ལས་འགུལ་གང་ཅིའི་ཐོག་ལ་དཀའ་ངལ་དང་ལེན་གྱིས་རང་སྲོག་ཚུན་ལའང་ལྟོས་མེད་མདུན་བསྐྱོད་བྱ་རྒྱུ།
༼༥༽ རང་རེའི་ཁོངས་ཀྱི་ན་གཞོན་རྣམས་ལ་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རེ་ལྟར་མ་འོངས་བོད་ཀྱི་འཛུགས་བསྐྲུན་སོན་རྩ་བཟང་པོ་འབའ་ཞིག་འབྱུང་ཐབས་སུ་ཕྱི་ནང་གི་ཤེས་ཡོན་སྣ་ཚོགས་སྤྱོད་ཐབས་དང་། དེའི་ཆ་རྐྱེན་བསྐྲུན་ཐབས་སུ་རང་གཞུང་ཤེས་རིག་ལས་ཁུངས་ཀྱིས་གཙོས་པའི་རོགས་ཚོགས་ཁག་ལ་སློབ་ཡོན་སོགས་མཐུན་འགྱུར་རོགས་རམ་འབོད་སྐུལ་ཞུ་ཐབས་བྱ་རྒྱུ། ཐོག་མར་ལྕགས་ཚ་གྲི་གུ་ཐང་དུ་དཔའ་བོ་ཨ་འབྲུག་མགོན་པོ་བཀྲ་ཤིས་མཆོག་གིས་གཙོས་རང་རེའི་དཔའ་བོ་དམ་པ་ཚོས་མ་བསྐུལ་དང་བླངས་ཀྱི་ཐོག་ནས་བོད་བསྟན་སྲིད་རང་དབང་གི་དོན་དུ་དཔའ་བོ་སྟོང་ཕྲག་མང་པོས་སྐུ་སྲོག་བློས་བཏང་སྟེ་དགྲ་རྒོལ་དང་། ༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་འཕགས་པའི་ཡུལ་དུ་གདན་ཞུ་ཐུབ་པ་སོགས་བོད་ཀྱི་ལོ་རྒྱུས་སུ་གྲགས་པའི་བྱས་རྗེས་རྣམས་བྱས་པ་རྗེས་མེད་དུ་མ་སོང་བའི་མཇུག་མཐད་གནང་རྒྱུ།
༼༧༽ མདོ་ཁམས་ཆུ་བཞི་སྒང་དྲུག་གི་ཁྱབ་ཁོངས་ལུང་ཚན་སོ་སོའི་རང་ལུགས་ཐུན་མོང་མ་ཡིན་པའི་ཆས་གོས་དང་། གོམས་གཤིས་སོགས་རིག་གཞུང་བཟང་པོ་ཡོད་པ་རྣམས་ཉམས་པ་སླར་གསོ་དང་། མི་ཉམས་རྒྱུན་འཛིན་ཐུབ་པའི་འབད་བརྩོན་ཞུ་རྒྱུ།
༼༨༽ མདོ་ཁམས་ཆུ་བཞི་སྒང་དྲུག་དབུ་བརྙེས་པའི་དུས་དྲན་གཅེས་འཛིན་སྲུང་བརྩི་དམ་ཟབ་ཞུ་རྒྱུ།
༼༩༽ ཚོགས་པ་དེབ་སྐྱེལ་བྱས་པའི་དམིགས་ཡུལ་དང་ཁྲིམས་སྒྲིག་རྣམས་ཚུལ་བཞིན་ལག་ལེན་དུ་བསྟར་བྱ་རྒྱུ་བཅས་བཀོད་འདུག
དེ་རིང་གི་མཛད་སྒོ་ཐོག་ཚོགས་པ་ངོ་སྤྲོད་དང་། གཞས་སྣ་གཟིགས་འབུལ། རིག་གཞུང་ཆས་གོས་འཁྲབ་སྟོན་སོགས་མཛད་སྒོ་ཟབ་རྒྱས་ཚོགས་གནང་ཡོད་པ་རེད།
ཨོ་སི་ཊོ་ལི་ཡའི་གྲོང་ཁྱེར་སིཌ་ནིང་ནས་ SBS བོད་སྐད་སྡེ་ཚན་གྱི་གསར་འགོད་པ་སངས་རྒྱས་རྡོ་རྗེ་ཡིན།
