ཐོག་མར་ཁེམ་བྷེལ་ཊོན་ས་གནས་བོད་ཡིག་འཛིན་གྲྭའི་དགེ་རྒན་རྭ་ལོ་དོན་ལྡན་ལགས་ནས་ཁེམ་བྷེལ་ཊོན་ས་གནས་སུ་གསར་དུ་བཙུགས་པའི་བོད་ཡིག་འཛིན་གྲྭའི་སྐོར་རིན་པོ་ཆེ་ལ་སྙན་སྒྲོན་དང་། དེ་ནས་ཕ་མ་དང་སློབ་ཕྲུག་རྣམས་ལ་སྟག་ལུང་མ་སྤྲུལ་རིན་པོ་ཆེའི་སྐོར་ངོ་སྤྲོད་གནང་གྲུབ་རྗེས། སྟག་ལུང་མ་སྤྲུལ་ཆེན་པོ་ཆེ་མཆོག་ནས་བོད་ཡིག་འཛིན་གྲྭ་འདི་འདྲ་ཞིག་བཙུགས་ཐུབ་པ་བྱུང་བ་དེར་ཐུགས་མཉེས་པོ་བྱུང་སྐོར་དང་། དེ་ནས་བོད་པ་ཟེར་བ་དེ་ཕྱི་ལོགས་ལ་མི་འབོར་ཉུང་ཉུང་ཡིན་ཡང་ཚང་མའི་ནུས་པ་གཅིག་ཏུ་སྤུངས་དུས་ས་གནས་ག་པར་ཡིན་རུང་མཉམ་དུ་འཚོ་གནས་ཐུབ་པ་ཞིག་ཡོང་གི་ཡོད་སྐོར་སོགས་བཀའ་སློབ་གནང་།
ཡང་རིན་པོ་ཆེ་མཆོག་གིས་བོད་མི་ཚོས་རིག་གཞུང་གི་ཐོག་ནས་སོ་སོའི་ཁྱད་ཆོས་ཧ་གོ་ཐུབ་པ་བྱུང་བ་ཡིན་ན། སྤུངས་གཅིག་ཏུ་སྒྲིལ་བར་ཕན་ཐོགས་ཡོང་གི་ཡོད་པ་དང་། མ་གཏོགས་ཆོལ་ཁ་དབྱེ་བ་ཕྱེ་བ་དང་། ཆོས་ལུགས་ཀྱི་དབྱེ་བ་ཕྱེ་ནས་ཁྱོད་དང་ང་ཟེར་ནས་བཤད་བསྡད་པ་དེ་ཚོ་བསམ་བློ་ཕུག་ཐག་ཐུང་ཐུང་ཡིན་པ་ཧ་གོ་ཐུབ་དགོས་པ་རེད། དེ་འདྲའི་བསམ་བློ་ཕུག་ཐག་ཐུང་ཐུང་དེ་ཚོ་ཕར་བཞག་ནས་སོ་སོའི་ཐུན་མོངས་མ་ཡིན་པའི་ཁྱད་ཆོས་དེ་ཚོར་ངོས་འཛིན་ཐུབ་དགོས་པ་དེ་གལ་ཆེན་པོ་ཡིན་སྐོར་གསུངས་སོང་། ཕྱི་དྲོར་རིན་པོ་ཆེ་མཆོག་ནས་ཁེམ་བྷེལ་ཊོན་དང་ཉེ་འཁོར་དུ་གནས་སྡོད་བྱས་ཡོད་པའི་བོད་མི་སྤྱི་ཡོངས་ལ་རྒྱལ་སྲས་ལག་ལེན་སོ་བདུན་མའི་བཀའ་ཆོས་དང་། རྡོ་རྗེ་རྣམ་འཇོམས་སྒོ་ནས་བྱབས་ཁྲུས། རྡོ་རྗེ་ཕུར་པའི་བཀའ་བསྒོ་སོགས་གནང་ཡོད་པ་རེད། 
