ቢንያም ግርማይ ንደቂ ጋንትኡ፣ ሰራሕተኛታትን ደገፍቱን ኣመስጊኑ ኣብ ቀረባ ግዜ የራኽበና ይብል

ሰሙናዊ መደብ ስፖርት (23/05/2022) * ግጥማት ኣትለቲክስ ኣልማዛዊ ሊግ ናይ’ዚ ወቕቲ ኣብ ከተማ በርሚንግሃም፣ ዓዲ እንግሊዝ፣ ተኻይዱ ኢትዮጵያዊያን ኣትሌታት ኣብ 5000 ሜ ብዓብላሊ ተዓዊተን፣ * ናብ ዋንጫ ዓለም ኩዕሶ እግሪ ደቀንስትዮ ት17 መንእሰያት መወዳእታ ዙር መጻረዪ ግጥማት ኢትዮጵያ ኣብ ቀዳማይ እግሪ ኣብ ኣዲስ ኣበባ 1-0 ብናይጀርያ ተሳዒራ፣ * ሃገራዊት ጋንታ ኢትዮጵያን ኣሰልጣኒ ዉበቱ ኣባተን እታ ሃገር ዘለዉዋ መጻረዪ ግጥማት ዝውክልዋ ናይ 28 ተጻወቲ ዝርዝር ስም ዘርጊሖም፣ * ፕሪምየር ሊግ ዓዲ እንግሊዝ ሰንበት ድሕሪ ዝተኻየዱ ናይ መወዳእታ ዙር ግጥማት ብዓወት ማንቸስተር ሲቲ ተዛዚሙ፣ * ኤርትራዊያን ናትናኤል ተስፋጽዮንን መርሃዊ ቅዱስን ንኡድ ተሳትፎኦም ኣብ ጂሮ ድ’ኢታልያ ኣብ ዝቐጸልሉ ቢንያም ግርማይ ግን ቦኽሪ ንኤርትራውያንን ኣፍሪቃውያንን ተቐዳደምቲ ዝኾነ መድረኻዊ ዓወት ድሕሪ ምምዝጋቡ ዓወቱ እናብዓለ ዓይኑ ስለዝተሃርመ ውድድሩ ኣቋሪጹ።